Ditë kulturore me mësuesin poet dhe shkrimtar,

Preng Cub Lleshi.

Preng Cub Lleshi sot në moshën 76 vjeçare edhe pse i kufizuar në ekstrem nga shqisa e shikimit, mbetet pa dyshim një ndër intelektualët më të zellshëm të Mirditës, i cili tenton të sfidojë kohën me studimet, publikimet të cilat e kanë zanafillën shumë vite më parë. I lindur në Kacinar të Mirditës dhe ndonëse i rritur jetim, pati fatin e madh të ishte një ndër universitarët e Mirditës, madje sic i pëlqen të deklarojë me krenari, nxënës i Cabejt të madh dhe koleg i shumë emrave të njohur të kulturës, e artit në Shqipëri.

Emri i Preng Cub Lleshit u bë i edhe më njohur në Kongresin e Drejtshkrimit (unifikimit) të gjuhës Shqipe në vitin 1972 në Tiranë. Të mbledhur në atë kuvend megjithëse shkencor, të gjithë i ranë fyellit në një vrimë, madje edhe të ardhurit nga zona që nuk kishin kontrollin e partisë shtet. Rradha i vjen edhe mësuesit mirditas i cili që me hyrjen e kumtesës së tij tërhoqi vemendjen jo vetëm të profesorëve që kishin injektuar te ai dijen dhe kulturë, por edhe te të gjithë të pranishmit.      

Fjala e plote ne kongresin e drejtshkrimit ne vitin 1972. kliko.....

Mjafton të citojmë hyrjen për të kuptuar mbrojtjen ekselente të gegnishtes që në atë kuvend ishte shpallur heretike. “Ka qenë dikur zakon për kristjanët që, kur vdiste një njeri, i binin kumbonares në njërën anë. Atëherë të gjithë e merrnin vesh se dikush kishte vdekur dhe po varrosej. Por, pasi ne jemi mbledhur në këtë kuvend të madh për të vënë në djep një krijesë të re, që do të rrojë në brezat e ardhshëm, më duket se nuk duhet t'i biem kumbonares vetëm në një anë, por në të gjitha anët, si në ditë feste. Kështu në këtë kuvend pune nuk do të na mërzisë muzika monotone e fjalimeve uniforme, siç ndodh ndonjëherë…” do te deklaronte poeti mësues i Mirditës. Më tej me argumeta të pa mohueshëm Preng Cub Lleshi vihet në një gjatësi vale me Arshi Pipën e të tjerë gjuhtarë në liri, por gjithësesi pa mundur të thyejë murin e mendimit të paravulosur të këtij kongresi.

Prenga kthehet në Mirditë mes heshtjes pse jo dhe frikës, për të punuar si mësues në shumë fshatra, por  edhe në shkollën e mesme “Bardhok Biba” në Rrëshen. Por gjithësesi me një vrull i cili la pas vepra të mirnjohura dhe të vlerësuara.

Jam Unë Ëndërrimtari, Faqe nga Visari Leksikor i Mirditës, Polemika per Kastriotët, Mirdita Vatër e Dukagjinasve dhe Kastriotëve, Mendime Kritike, Antikomunizëm apo Antishqiptarizëm, Këngët dhe Ëndërrat e Mija, Gjurmë Malli, Komandant dhe Komisar, Në Udhë Lindi një Këngë, janë vepra shumë të vlerësuara nga kritika që autori i ka në dispozicion të lexuesit. Por pjesë e prodhimtarisë së këtij autori janë botime të shumta të shtypin periodik të kohës.

 Ceremonia

Ka qënë një premtim publik i nxënësit por edhe kolegut për shumë vite, sot në cilësinë e Kryetarit të Bashkisë Rrëshen z. Ndue Gega që mësuesit poet dhe shkrimtar Preng Cub Lleshit në ditëlindjen e tij ti bëhej një përcjellje para publikut të veprës dhe aktivitetit të tij gjatë 76 viteve.

Qindra pjesmarrës kanë mbushur sallën e Qendrës Kulturore të Rrëshenit, ndër ta miq dhe kolegë të shkrimtarit. Në fillim z. Gjon Marku ka bërë një paraqitje të detajuar të të gjithë aktivitetit të mesuesit poet dhe shkrimtar, z. Preng Cub Lleshi.

Z. Ndue Gega, tha se unë do të flas shkurt, e jo si kryetar bashkie,  sepse kjo ka një tingellim disi metalike, por pak fjalë për mësuesin tim të nderuar, profesor Preng Cub Lleshin. Në qoftëse do të ulesha edhe një herë në bankat e shkollës, në bankat e gjimnazit “Bardhok Biba”  une do të zgjidhja, po të më jepej e drejta, si mësues letërsie,  profesorin tim të nderuar. Katër vite në gjimnaz unë e kam patur mësues kujdestar, e kam pasur mësuesin e letërsisë, por njëkohësisht edhe mësuesin e filozofisë. Profesor Prengën unë do ta përkufizoja kështu: Njeri skrupuloz, me erudicion e një vullnet të veqantë, shumë i guximshëm. Ekuivalenca e këtyre fjalëve do të ishte kjo: Preng Cub Lleshi është vetvetja. Kur them është vetvetja është krejt autentik në qëndrimet dhe karakterin e tij, në shpirtin e guximit, në marrjen e informacionit shkencor, në fushën e krijimtarisë si poet e shkrimtar, por edhe si studiues. Mirdita e ka për nder që Preng Cub Lleshi punoi një jetë të tërë për shkollën, për nxënësit. Eshtë nga ata njerëz që nuk i pëlqei kurrë servilizmi. Duke qënë ndër të parët universitarë me kërkesa shumë egzigjente ndaj vetes, asnjëherë nuk u thirr qoftë edhe për pak kohë të punojë inspektor arsimi a drejtor shkolle. Ka një histori tepër unikale në Komitetin e Partisë rreth 4-5 muaj, po edhe atje njerëz të veqantë nuk mund të rrinin pranë një njeriu që ishte vetëvetja. Megjithatë krejt qyteti, krejt Mirdita e din se me cilin subjekt politik është mësuesi im i nderuar. Edhe une do të thoja se njerëz të tilllë si Preng Cub Lleshi i bëjnë nder   cdo partie politke. Nuk është militant i jashtë zakonshëm, por përsëri është vetëvetja. Ka qënë dje,  është  edhe sot. Unë dua që mësuesit tim ti uroj jetë të gjatë dhe krijimtari të mbarë.

Ndërsa gazetari në pension nga Tropoja Halil Katana, drejtues i një reviste, Pavdeksia, lexoi pjese nga një letër që ai kishte shkruar kohë më parë autorit të librit “Jam une endërrimtari” kur ai sapo e kishte lexuar.

Në emër të Lidhjes së Shkrimtarëve të Shqipërisë ka përshëndentuar z. Ndue Gjika, ndërkohë që akademiku Mark Tirta tha se unë kam qënë në shkollë me Preng Cub Lleshin i cili  shënon rreth 60 vite krijimtari, pasi unë jam dëshmitar se ai ka botuar vjerrsha që në moshën 18 vjec. Kanë përshendetuar dhe shumë pjesmarrës të tjerë si Ndue Dedaj, Gjergj Shyti, Mark Mesuli, Gjon Dedaj, Zef Prenga, si dhe mbesa të autorit. Aktiviteti u shoqërua me elemnetë artistikë të realizuara nga Nikoll Dedaj, Prena Beleshi dhe fran Preci.

Në fund mësuesi poet, ka ndarë emocione të shumta me të pranishmit dhe i ka falenderuar përzemërsisht ata, për këtë ditë të veqantë me rastin e 76 vjetorit.

A.                      A.  Ndoja, 16.11. 2011