Qendra e Alencës Gjinore për Zhvillim, dhe AECI, trainime për barazinë gjinore në komunitetin e Rrëshenit.

 Për dy ditë më rradhë në ambientet e Muzeut Historik të rrethit, u zhvillua trajnimi me temë “Politika Gjinore dhe Integrimi Europian” . Ky seminar trainues u zhvillua nga Qendra e Alencës Gjinore për Zhvillim me qëndër në Tiranë, ndërsa pjesmarrës ishin punonjës të bashkisë Rrëshen dhe të disa instuticiove të tjera në rreth. Aktiviteti ka nisur në ora 10 të ditës së martë, dhe ka vijuar edhe ditën pasuese. Trainuese të këtij seminari ishin znj Dajana Berisha, punonjëse në Ministrinë e Punës, Ceshtjeve Sociale dhe Shanseve të Barabarta, si dhe znj Aurela Bozo nga Qëndra e Aleancës Gjinore për Zhvillim.

Në këtë aktivitet pjesmarrësit u trainuan për temën Barazia Gjinore dhe Integrimi Europian. Ky aktivitet është pjesë e një projekti “Fuqizimi i mirkuptimit nga ana e shoqërisë Shqiptare në lidhje me mundësitë e barabarta midis gjinive në kuadër të integrimit Europian” e finacuar nga Agencia Espanola de Cooperacion Internacional (AECI).

Në fillim të këtij takimi foli znj. Dajana Berisha e cila vuri në dukje se për të pasur një barazi gjinore sa më efikase është bërë një punë e konsiderueshme për sa i përket legjislacionit. Ajo vuri në dukje të gjitha mbrojtjet ligjore që ofron legjislacioni shqiptar dhe ai ndërkombëtar, duke ju referuar Kushtetetutës, Ligjeve dhe akteve nën ligjore. Znj Berisha duke ju referuar një manuali me titull “Platforma udhëzuese e BE për barazinë ndërmjet grave dhe burrave” dhe përmes një paraqitje me slaidera në një video-projektor, vuri në dukje se BE-ja është e vendosur të luftojë të gjitha format e dhunës. Gratë janë viktimat kryesore të dhunës gjinore. Kjo përbën shkelje të të drejtave thelbësore të jetës, sigurisë, lirisë, dinjitetit dhe integritetit fizik dhe emocional. Dhunimi i këtyre të drejtave nuk mund të tolerohet apo përligjet për asnjë arsye. Parandalimi është thelbësor dhe kërkon arsimim dhe njohuri, përhapjen e rrjetit dhe partneritetit dhe shkëmbimin e praktikave të mira. Nevojitet veprim i menjehershem per eleminimin e qendrimit dhe praktikave te bera zakon, ose tradicionale, ku perfshihen gjymtimi gjenital femeror, martesat e hereshme dhe të detyruara, dhe krimet e nderit.

Ndërsa kryetari i Bashkisë z. Gjon Dedaj pjesmarrës në këtë takim, tha se pak nga pak po bie ai hendeku ndarës mes burrit dhe gruas në Mirditë. Kjo pababarazi gjinore ka qënë ndoshta më e theksuar se diku tjeter, pasi kjo vinte nga mentaliteti shoqëror, rregullat e familjes së kohës, zakonet etj. Më tej ai bëri një panoramë të gjatë për zhvillimet e hershme, dhe të kohëve të fundit në trevën e Mirditës, duke vënë në  dukje se kjo pabarazi tashmë është zbutur në kufinjë të pranueshëm, ndërkohë që duhet të punohet sa më shumë në këtë drejtim. Z. Dedaj vuri në dukje edhe punën e shumë shoqatave të ndryshme të cilat kanë shtrirë aktivitetin e tyre edhe në Mirditë.

Znj Aurela Bozo foli për konventën  për eleminimin e të gjitha formave të dhunës që cënojnë barazinë gjinore.  Znj Bozo i mëshoi faktit se dhuna në familje bie kryesisht mbi gratë dhe fëmijët, dhe për rrjedhojë është një dhunë me bazë gjinore. Shpesh hasim në diskriminim të tërthortë, tha znj Bozo duke dhënë shëmbuj në këtë lloj diskriminimi.

Po ashtu, në debat dhe diskutime janë përfshirë edhe pjesmarrësit në këtë takim të cilët kanë dhënë mendimet e tyre në lidhje me situatën ku gjëndet aktualisht shoqëria shqiptare, e në vecanti ajo mirditore. Ata kanë vënë në dukje se trainime të tilla janë një ndihmë e madhe për të kuptuar më mirë realitetin, dhe për tu formuar gjithnjë e më shumë si kurues të këtij realiteti.

Gjatë ditës së dytë u fol për platformën udhëzuese 2006-2010. Znj. Berisha i mëshoi faktit se cdo projekt-ide në lidhje me barazinë gjinore do të kalojë nga Ministria e Integrimit dhe e Shanseve të Barabarta, pasi përmes këtyre do të bëhet e mundur një lidhje me BE, i cili mund të ofrojë mbështetjen e tyre për projekte të kësaj natyre.

Alfred Shtinja

Shef. Dep. Kultures