Bashkia në fokus për aktivitetin e saj gjatë vitit 2007.

 Pas një viti me ngarkesa të shumta pune, arritjet e shumta por edhe mosralizimet, janë analizuar me përgjegjësi të thellë, në një mbledhje maratonë që në emërtimin e përhershëm njihet si “Analiza vjetore e punës së Bashkisë Rrëshen”. Salla e mbledhjeve të Këshillit të Bashkisë ka qënë e mbushur me të gjithë punonjësit e kësaj njësie, të cilët përgjatë një viti kanë qënë në shërbim të komunitetit të Bashkisë Rrëshen.

Në fillim të mbledhjes Kryetari i Bashkisë z. Gjon Dedaj, në një hyrje të shkurtër ka falenderuar të gjithë stafin e Bashkisë për përkushtimin e tyre në punë dhe angazhimin e tyre në shërbim të komunitetit. Më tej kryetari Dedaj, ka kërkuar nga të gjithë drejtuesit e sektorëve përbërës të bashkisë, që të raportojnë për punën e tyre.

I pari që e ka marrë fjalën në këtë takim analizë, ka qënë N/kryetari i bashkisë z. Dodë Pepkolaj, i cili ka bërë një përmbledhje të gjithë punës së n/sektorëve të drejtuara prej tij. Ne veçanti ka vënë në dukje punën e mirë të Policisë Bashkiake dhe të Zyrës së Gjendjes Civile. Për të parën ka thënë se policia ka qënë e angazhuar në punën e saj, si për mbështetjen e aktiviteteve të shumta kulturore, ashtu edhe për zbatimin e vendimeve të këshillit Bashkiak, dhe të sektorëve të tjerë të Bashkisë. Po ashtu ai ka vënë në dukje se edhe Gjëndja Civile ka qënë gjithnjë në shërbim të qytetarëve ndonëse në ambiente të pa përshtatshme për shkak të sipërfaqes së ambienteve.

Ndërsa z. Ndokë Mrruku, drejtor i Departamentit të Shërbimeve ka vlerësuar angazhimin e strukturës së drejtuar prej tij, për ti ardhur në ndihmë  komunitetit sipas kërkesave të tyre. Ai ka bërë të ditur një sërë arritjesh në shërbim të komunitetit, si në ndërtimin e rrugëve, trotuarëve dhe lulishteve në ç'do metër të sipërfaqes së Bashkisë. Jashtë vëmendjes së këtij sektori nuk ka qënë edhe fshati me problematikën e shumtë të tij. Është punuar në shumë sektorë sidomos gjatë periudhës së vaditjes, por edhe në zgjidhjen e jo pak  problemeve që kanë të bëjnë me konflikte sociale, të cilat kanë qenë të pranishme gjatë vitit që kaluam. Z. Mrruku ka folur edhe për nevojat që ka ky sektor, sidomos në infrastrukturën elektronike, në zyrat e Ndihmës Ekonomike dhe përkrahjes Sociale.

Fran Canga si drejtues i sektorit të politikave të Zhvillimit, është ndalur gjatë në arritjet e këtij sektori por edhe në vizionin për të ardhmen e qytetit i cili ka shumë nevoja për dorën e specialistëve të këtij sektori.

Ndërsa z. Fred Shtinja në detyrën e drejtorit të Departamentit të Kulturës Rinisë dhe Sporteve, ka prezantuar një listë të gjatë të aktiviteteve kulturore që janë zhvilluar gjatë vitit që shkoi, por edhe për programin e këtij viti. Ai ka vënë në dukje se me lëvizjet e kohëve të fundit në Pallatin e Kulturës, në Muze dhe disa n/sektorë të tjerë, jeta kulturoro-artistike ka njohur një dimenson të ri zhvillimi. Po ashtu ai ka thënë se edhe në sektorin e Sportit u mundësua mbajtja e premtimit që ekipi i vajzave të qëndronte në kategorinë e parë.

Mirela Nikolli, drejtore e departamentit të Ekonomisë dhe Financave, ka bërë prezente situatën ekonomike të Bashkisë me të dhëna për të ardhurat dhe shpenzimet në të gjitha sektorët.

Në fund ka folur Sekretari i Këshillit të Bashkisë z. Martin Bushpepa. Ai ka thënë se mardhëniet mes Këshillit dhe Bashkisë kanë njohur një dimension optimal për vitin që shkoi. Z. Bushpepa ka vënë në dukje se mardhëniet mes Këshillit dhe Bashkisë, kanë qënë në kuota shumë të mira, dhe për pasojë në 76 vendime të miratuara nga Këshilli, vetëm tre prej tyre nuk kanë mundur të kalojnë në sitën e Prefektit. Ai ka premtuar për një bashkëpunim më të mirë pasi sipas tij, kjo është në të mirë të komunitetit të banorëve të Bashkisë Rrëshen.

I fundit që ka referuar ka qënë kryetari i Bashkisë z. Gjon DEDAJ. Ai ka thënë se rezultojnë të vlefshme për këtë analizë vjetore c’do element i një vlerësimi xheneral. Kishim dhe kemi ende vështirësi në funksionimin tonë administrativ. Kjo e lidhur me elementë të tillë si puna në grup, fleksibiliteti në komunikim, prirja për vehte që nuk dua t’i përkthej ndryshe se dihet se cili është vesi më i keq, niveli i ulët i dijeve dhe vullneti i ulët apo i kufizuar për të shërbyer. Në përgjithësi më rezulton se ndër ju ka mjaft të pa kënaqur nga vëndi i punës, pavarësisht përfitimit në raport me kapacitetin e tyre. Më tej z. Gjon Dedaj ka bërë një një ”radioskopi” të plotë për sejcilin prej sektorëve të Bashkisë.

Ja fjala e plotë e Kryetarit të Bashkisë z. Dedaj:

 Duke i marrë më rradhë!

 Përsa i përket n/kryetarit, besoj se duhet të biem dakort se ne nuk kemi këtu struktura mbështetëse dhe struktura urdhëruese. Kemi struktura identifikuese dhe për këtë duhet të jemi më shumë aktiv në kordinimin e të gjithë aktivitetit administrativ. Duhet me qenë më shumë të kujdesshëm dhe interpretues i akteve me cilësi dhe me sens analitik, më shumë i disponueshëm për sa sa lidhet me aksesin e nëpunësve edhe tej orarit 8-15.

 Për shefat e departamenteve”

 Të gjitha këto që po ju them përbëjnë vërejtje që do të klasifikohen duke ndaluar të drejtën të negociojmë në fund kur të merrni një provë shkresore të penalitetit për ju. Keni ende kufizim të ushtrimit të autoritetit. Vullnet i kufizuar individual në lidhje me projektet. Orientim i ngadaltë me vizionin e kryetarit. Mungesë masash penalizuese e monitoruese për nëpunësit që shkelin procesin administrativ. Mungesë lidhje vertikale me organet e qeverisjes qëndrore, rajonale, dhe organizata të tjera jo fitimprurëse apo dhe donatorë.

 Auditi i i Brëndshëm!

 Mungesë auditi vjetor analog me auditet e tjera bashkëkohore, qofshin ato të jashtme apo audite të tjera të përzgjedhura. Ende jashtë funksionit si proces i thellë auditimi. Ndërhyrje vetëm me porosi, për mungesë identifikimi të problematikës. Mungesë bashkëpunimi dhe këshillimi. Të pa lidhur sa dhe si duhet me auditin e jashtëm.

 Gjëndja Civile!

 Aftësi për të punuar në një ambient të pa përshtatshëm. Gatishmëria në çdo kohë, duket e lidhur me bashkëpunimin dhe kërkuesin e ndihmës nëpër zyrat e tjera.

 Policia Bashkiake!

 Më shumë aftësi për tu lidhur dhe ushtruar kompetencën ligjore, mardhënien morale dhe evitimin e kundërvajtjeve. E pa aftë për të funksionuar në përputhje me kërkesat e komunitetit. Një grup jo bashkëpunues. Mosnjohës sa dhe si duhet të ligjit, më shumë në konceptin e një policie private që ruan ose muret, ose Kryetarin e Bashkisë. Prirje për përfitim të pa ligjshëm.

 Departamenti i Politikave të zhvillimit!

 Sektori i Urbanistikës- Provë shkresore që duhet arkivuar për të mbrojtur arkivin e tyre në mënyrë elektronike dhe manuale. Mungesë shprehje idesh dhe prodhim projektesh, vetëm në raste kur ato janë burimisht individuale. Mungesë kompromisesh dhe ulje kapacitetesh në raste problemesh dhe problematikash. Vështirësi për të mbrojtur imazhin e bashkisë dhe të Kryetarit të Bashkisë, në komunikim më qytetarët. Mungesë adresimi individual të projekteve dhe ideve.

 Sektori i mardhënieve me jashtë!

 Ulje e përkohshme e ritmit të komunikimit dhe kërkesave. Lidhje jo shumë funksionale me Ministrinë e Jashtme, Ministritë e Linjës dhe atë të integrimit. Bashkëpunim më i shpejtë dhe funksional për të përfituar nga vullnetari i Korpusit të Paqes, Mrs. Den, të cilin para jush e falenderoj.

 Burimet njerëzore!

 Ngadalësi në ndaljen e akteve të parregullta, dhe vonesa në daljen në komunikim të drejtëpërdrejtë dhe përfitime nga grupet e interesit. Mungesë projekti apo perspektive për rritjen dhe ruajtjen e kapaciteteve që ne disponojmë. Informatizim i kufizuar, ende jo funksional i të dhënave dhe burimeve.

 Departamenti i Ekonomisë

 Financat- Informim jo efektiv, formim profesional jo permanent, mungesë aplikimi për projektet bashkëkohore. Mungesë kompjuterizimi për procesin informues.

 Tatimet-Pjesa më e dobët e kësaj periudhe. Mosnjohje e përgjegjësive, pa aftësi për ushtrimin e aktivitetit, defekte në komunikim dhe në raporte më bisnezin, jo bashkëpunues me Policinë Bashkiake dhe organizma të tjerë të mbështetjes.

 Departamenti i Shërbimeve!

 Përsa i përktet shërbimeve të brendshme, të pa kujdesshëm për aksesin e shërbimeve. Qytetari ende është vartës i nëpunësit. Nevojë për urdhëra të përsëritur, të pa aftë të punojnë me kontribute grupi. Ende larg provave standarteve shkresore të kësaj bashkie. Jashtë funksionit të shërbimit fleksibël për çdo shkresë përfshirë edhe atë arkivore.

 Shërbimet e Ndihmës Sociale!

 Amulli në shërbim, mungesë formimi profesional bashkëkohor për sa i përket lidhjes me fushën e shkencave sociale, dhe adoptimin me këto shkenca. Komunikim jo efikas me qytetarët, mungesë kurajo për të ndarë përfituesit me të drejtë, nga përfituesit pa të drejtë. Të vish në bashki për të marrë një ndihmë ekonomike dhe mos ta marrësh, nuk do të thotë se je humbës. Mungesë komunkimi shkresor dhe kontributesh të ndërsjellta me kryetarët e fshatrave. Lidhje të kufizuara me organizma vertikal dhe donatorë, dosje dhe rregjistra që sjellin probleme në interpretim. Interpretim i kufuzuar i ligjit dhe mbrojtje e kufizuar, për sa i përket materialeve elektronike në raste problemesh të funksionimit të administratës.

 Shërbimet në komunitet!

 Jo misionarë të lidhjes me problemet e komunitetit. Pa projekte dhe të pa lidhur me vizionin e kryetarit, indiferencë dhe tendencë shmangie nga shërbimet, nevojë për hierarki, pa monitorim të  arkivit dhe nëpunësit.

 Shërbimet e mirëmbajtjes!

 Jo bashkëpunues dhe jo bashkëveprues. Dëshirë për tu sjellë si nëpunës, e jo si të punësuar. Prirje për përfitime dhe ç'organizim. Konflikte që duhen përjashtuar me çdo kusht. Të pa lidhur shpirtërisht me mirmbajtjen e këtij qyteti, dhe të kësaj bashkie.

 Departamenti i Kulturës, Arsimit, Turizmit dhe Sportit!

 Kultura - Konflikte penguese dhe jo profesionale. Situatë ende larg modelit bashkëkohor të performancës së kërkuar kulturore. Prirje përfitimi personal të pa ligjshëm. Mungesë projektesh dhe pa aftësi aplikuese për ruajtjen e pasurisë dhe prodhimin e vlerave kulturore. Përcaktime të paqarta funksionesh. Persona të pa mbuluar dhe të pa monitoruar në punë.

Shërbimet e çerdhes- Pa aftësi për të ruajtur imazhin e bashkisë në lidhje me qytetarët në ç’do rrethanë. Kërkesa për Bashkinë sikurse nuk janë në pjesë e bashkisë.

Turizmi- nuk ka ende shënja të projektit të rradhës në këtë fushë.

Sporti- Probleme në menaxhim, raporte ligjore të panjohura dhe ende të pa parashikuara. Pak lidhje me aktorë të kësaj fushe. Projkete të kufizuara dhe mungesë strategjie afatgjatë. Impakt në komunitet, me disa përjashtime.

Përgatiti: A. Ndoja