Ansambli i shtetit, tour artistik dhe turistik nëpër Mirditë

Fjala pershendetese e Kryetarit te Bashkise z. Gjon DEDAJ...

- Ne ditet  e "Javes Evropiane te Demokracise Vendore" 

  40 artistët e mrekullueshëm të Ansamblit Shtetëror Kombëtar të Këngëve dhe Valleve Popullore kaluan një tour artistik dhe turistik nëpër Mirditë, ndryshe nga veprimtari të organizuara të këtij lloji në rajone të tjera, pasi kjo trupë është përfshirë në një axhendë aktivitetesh nëpër Shqipëri. Bashkia Rrëshen dhe faktori kulturor u ka përgatitur një terren të ndryshëm nga rajone të tjera duke përfituar edhe nga ana turistike të vecantat e këtij ansambli kombëtar.

Pritja e parë Ansamblit i është rezervuar tek lokal „Kosova“ që gjendet përballë autostradës, në hyrje të saj për Kosovë. Më së pari urimin ua kanë përcjellë shoqëruesit turistike të Mirditës, ndërsa përshëndeti për këtë ardhje në Mirditë kryebashkiaku i Rrëshenit Gjon Dedaj, i cili ndër të tjera theksoi se jemi duke hyrë ne ditet  "Javes Evropiane te Demokracise Vendore"  dhe prania juaj ketu, eshte nje rastesi e kendshme, nje besim  i palekundur se identititeti yne kulturor  do promovohet dhe rigjenerohet  gjithnje  sebashku. Le te jete kjo dite nje privilegj i imi si kryetar bashkie  dhe një pritje jubilare  ne kuader  te “Javes Europiane te Demokracisë Vendore” per nje qeverisje te hapur dhe ne sherbim te qytetareve qe nis  të zhvillohet nga data 12-17 Tetor 2009  ne pervjetor te  nenshkrimit te Kartes Evropiane per Autonomi Vendore  (me 15 tetor 1985 ) pasi  Ju jeni pjesa me e vyer dhe me e paharruar e  kesaj jave-feste te perbashket, ku promovohen e analizohen parimet, vlerat, konsolidimin e procesit te decentralizimit, konsolidimin e mandatit te te zgjedhurit vendor, pjesemarrja e publikut ne vendimmarrje, bashkepunimin mes qeverise vendore dhe asaj qendrore, vlera te cilat shprehen  e nderthuren me shume se kurre me ato te  ansambleve artistike .

Për ofertën turistike të Mirditës dhe axhenden e kësaj dite shtegtimi nëpër Mirditë, ka folur përgjegjësi i Pallatit të Kulturës Rrëshen Gjergj Marku, ndërsa mikpritja është shërbyer me një mëngjes të thjeshtë. 

Më pas artistët e Ansamblit morën udhën për në autostradë për disa kilometra, të mahnitur nga kjo vepër madhështore por dhe pamjen panoramike të peisazhit që nga Ndërfana, Gëziqi, e më tej për në Reps. Studiuesi Bardhok Pulaj ka bërë shoqërimin në autobusin e artistëve duke spjeguar dhe historinë e kësaj treve, mikpritjen e saj, doket zakonet dhe gjithcka të bukur qe mbart kjo trevë, si paketë turistike unike në Veriun e vendit dhe në Shqipëri.

Trupa artistike më pas është pritur tardicionalisht tek shtëpia e Preng Ndue Gjonit në Spaç, si një eveniment i paharrueshëm për artistët. Gjithcka është servirur aty tradicionalisht me ushqime-bio dhe prodhime vendase, si ata të bulmetit, mishi, fruta vendase, pijet etj. Kjo është paraqitur dhe si një paketë gastronomike e mundësive turistike që ka Mirdita. 

Këto produkte janë servirur në një tavolinë në oborrin e jeshiltë, ndërsa artistët e Ansamblit janë mrekulluar në këtë sajdisje të shpenguar duke provuar një larmi ushqimesh-bio që nga vera musht apo ajo pak e „kërcyer“,rakia disa llojëshe, qumështi dhe hirra, byreqet disa lloje, mishi i kecit aq i shijshëm, petulla me mjaltë, turshi,domate dhe tranguj vendi, fruta si arra vendi, gështenja, rrush disa llojesh e plot asortimente të tjera tejet të shijëshme.

Irini Qirjako nuk ka përtuar t’ia marrë valles aty në oborr, ndërsa është vënë disku me këngët e saj të kërcyer e duartrokitur nga gjithë të pranishmit. Ndërsa janë lidhur miqësi e bërë kuvende të urta në mes artistëve dhe të zotëve të shtëpisë.

Më pas trupa artistike mori udhën për në Rrëshen ku e priste skena gati për të performuar nga arsenali i mrekullueshëm popullor i tërë krahinave mbarëshqiptare, stilizuar bukur dhe me një interpretim virtuoz. Mbrëmja koncertore solli një atmosferë të gëzueshme për qytetarët e Rrëshenit, që kanë vazhduar duke u grumbulluar në shesh për të ndjekur vallet dhe këngët me motive nga gjithë krahinat e Shqipërisë.

Artistja, Mjeshtre e Madhe e Punës, Irini Qiriako e ka ndezur krejt natyrshëm atmosferen me këngët e saj përmes një zëri e vokali të ëmbël e potent ashtu si dhe këngëtarrët e tjerë si Besa Xhelili, Bardhyl Xhafko, Sabahet Vishja, Lek Pecnikaj, Genciano etj, si dhe grupi aq i intonuar vokal nën drejtimin e një orkestre tejet profesionale nën drejtimin e Vladimir Hasimi,dirigjent. Pallati i kulturës u ka siguruar gjithë komoditetin e nevojshëm fonik dhe infrastrukturen e veshire në kësi rastesh të interpretimit „live“.

Vallet dhe konstumografia e larmishme e krahinave të Shqipërisë kanë qenë pjesa magjepsëse e këtij koncerti të bukur, vallet nën drejtimin e Mjeshtrit të Madh të Punës Rexhep Celiku, një nga ikonat e këtij ansambli,duke sjellë dhe disa valle të reja me stilizime mjeshtërore si vallja e ciganëve „Tradhëtia“, që është pritur me ovacione nga publiku në shesh. Gëzimi solist dhe Elga Saraci,kanë qenë aq lart në kërcimin e tyre ashtu si dhe djemtë me „tarabuk“,duke sjellë një alegri të jashtëzakonshme me këtë valle brilante.dhe vallet e tjera me solist Vjera Curcia apo Olta Ahmetaj, që sollën atmosferë të bukur aty në shesh duke ardhur tek një përmbyllje fantastike me vallen „Mbledhja e gështenjave“, me solist Rexhep Celiku dhe Brikena Jaupaj, e duartrokitur gjatë nga publiku, i cili më pas është „shkrirë“ në takime miqësore me trupën e artistëve duke i falenderuar për këtë mbrëmje të magjishme që i sollën Rrëshenit dhe Mirditës.

Trupa vizitoi dhe pavionin etnografik të ansamblit „Mirdita“ duke mbetur të mrekulluar nga ky projekt shume interesant, i vetmi i këtij lloji në Shqipëri, ...„është një kujtesë shumë e vecantë“, u shprehën drejtoresha Agolli dhe koreografi Celiku e të tjerë, ndërsa premtuan bashkëpunime shumë të frutshme me këtë ansambël dhe pallatin e klulturës "Mirdita"

E ndërkaq më pas për trupën tek një lokal privat sërish me prodhime vendase, është shtruar një darkë, e cila kaloj në një atmosferë shumë miqësore.

Drejtoresha Lejla Agolli u shpreh se kjo është ndër pritjet më të bukura që i është bërë kësaj trupe nëpër trevat e Shqipërisë apo jashtë, dhe ky "mision turistik" që keni shpallur për krahinën tuaj, është sa i bukur aq dhe i vecantë, ne ndjehemi krenarë që sot u bëmë pjesë e tij.

A. Ndoja