Audicioni rinor “Pranverë 2008”

Për dy netë me rradhë u finalizuan suksesshëm përpjekjet e bëra nga stafi organizator i “audicionit pranveror 2008” ku garuan në dy netët finale me këngët dhe interpretimet e tyre 8 këngëtare të përzgjedhura me kujdes prej më se 4 muaj. Të tetë këngëtaret ishin vajza që vinin nga shkolla e mesme e Rrëshenit dhe ajo e Rubikut.

Dy netët finale sollën entusiazëm tek moshat rinore të Rrëshenit, Rubikut dhe të disa fshatrave që kishin zbritur për të shijuar një event të tillë artistik i aplikuar për herë të parë që nga viti 1990 ne sallen e pallatit te kultures "Mirdita".  Një festival tipik i “Këngës Magjike” apo lloji i Top-Fest e të tjera kompeticione të këtij lloji, por me një ndryshim, se gjithcka lidhej me natyrën intepretuese dhe jo atë krijuese, duke evidentuar thjeshtë vokalin e zërave të rinj në Mirditë.

Kështu të tetë këngëtaret që kanë punuar më shumë vetë në mënyrë autodidakte, kaluan në prova një mujore në skenën e pallatit të kulturës, me juri të improvizuara nga specialistë të këtij pallati por dhe të ftuar nga Tirana deri sa u arrit në mendimin se mund të bëhej një audicion i tillë zërash të rinj edhe në Mirditë.

Të tetë vajzat këngëtarëve, sipas specialistëve, ishin të intonuara në interpretimet e tyre ndërsa gjysma prej tyre shfaqnin talent të vërtetë në fushën e këngës dhe nëse do të ishte punuar më shumë me muzikantë do të kishin qenë një suprizë për muzikën e lehtë të këtij rajoni.

Pjesëmarrëset:

Rezarta Kola, nxënëse e vitit të dytë Rrëshen

Mirela Doda, nxënëse e vitit të dytë Rrëshen

Egla Filopati, nxënëse e vitit të katërt Rrëshen

Ilia Jahja, nxënëse e vitit të parë Rrëshen

Eliona Kola (debutuese), nxënëse e klasës së gjashtë Rrëshen.

Valbona Kola, nxënëse e vitit të katërt Rubik.

Enida Përlala, nxënëse e vitit të dytë Rubik

Elsa Mrruku, nxënëse e vitit të tretë Rubik.

Nata e parë:

Gjithcka ka qenë ndryshe në sallën e pallatit të Kulturës “Mirdita” këtë natë, që nga dekori dhe skenografia, gjysëmvideoprojektive e ideuar nga organizatorët, skenografia ballore e Gjok Pepës dhe ajo videoprojektive me tre monitorë të mëdhenj në skenë e Olsi Simonit, përgjegjës teknik në TV Mirdita, pulti fonik dhe transmetimi nga Lin Kiku, si dhe regjistrimi përmes kamerave të këtij televizioni lokal me operator Aldor Përtena e Hil Gjaci. Ky bashkëpunim ka sjellë dhe efektin e parë tek spektatori i mësuar me skena të thata dhe pa nerv. Kjo ka qenë dhe një suport pozitiv për këngëtarët në performancën e tyre interpretative.

Spektakli show ka nisur me siglën e audicionit ndërsa më pas trupa e baletit Lezhë e cila sapo ishte kthyer nga Top-Fest, ka interpretuar një kërcim shumë ritmik duke e futur spektatorin në një ritën më të vecantë. Në kërcim kanë interpretuar dhe vëllezërit Filopati.

E ndërkaq nën prezantimin e gazetarit Gjergj Marku që ishte dhe iniciator i kësaj veprimtarie rinore, drejtues i këtij pallati, është bërë dalja e këngëtareve përmes blobeve filmike nga vetë ato një e nga një, arsyen përse ato vinin në këtë audicion dhe cfarë përcillnin për teleshikuesin. Dhe kjo e ngjitur më pas me tetë interpretime pa muzikë për të evidentuar vetëm vokalin e tyre.

Ja dhe pjesët e kënduara nga secila këngëtare:

Rezarta Kola me motivet e këngës “Për ty po flas” të Edona Llalloshit.

Mirela Doda me “Gabova” të Artiola Toskës.

Egla Filopati me një pjesë nga Sara Koner.

Ilia Jahja me pjesë nga kënga “No one” e Alisa Keys

Valbona Kola me një pjesë nga kënga “Ani” e Elvana Gjatës.

Enida Përlala me një pjesë të këngës “Pa yllin tënd” të Besës

Elsa Mrruku me një pjesë nga kënga “Nushu ime” e Elvana Gjatës.

Eliona Kola, debutese me “Valsi i lumturisë” të Vaçe Zelës.

Ky ishte dhe prezantimi i parë i tetë këngëtareve të reja, që sollën individualitete të spikatura në të kënduarit “live”.

Këtij kalimi këngësh i erdhi vlerësimi flesh i jurisë që përbëhej nga Gent Bushpepa, këngëtarë në Top SHOW, Blerti Leci, muzikant në Tiranë, Indrit Jushi, këngëtare, Gjin Dona, muzikant në Rrëshen, Arinda Gjoni.

PROMOCIONI:

Duhet theksuar se sponsor gjeneral i kësaj veprimtarie ishte “Shoqata e impreditorëve mirditorë në Milano”, një nga shoqatat më aktive të shqiptarëve në këtë zonë. Prezente në këtë spektakël ishte dhe anëtare e komitetit drejtues të kësaj shoqate Dava Gjoka, që mori dhe përshëndetjet e publikut për mbështetjen e këtij audicioni të parë në Mirditë.

Me procedurat e dërgesës së fondit u mor dhe mirditori tjetër përefaqësues i kësaj shoqate në Milano, Lek Preci. Kjo shoqatë gjithashtu ka kërkuar hartimin e procedurave të sponsorizimit edhe për ansamblin “Mirdita” në një turne në Itali.

Seti i dytë i interpretimeve ka qenë përmes të kënduarit me bazë muzikore dhe vokalin e këngëtarit origjinal, të hequr. Edhe pse me probleme në këtë program kompjuterik është arritur të evidentohen zërat “live” origjinalë të tetë vajzave që interpretuan këto këngë:

1. Duke filluar me këngëtaren Rezarta Kola që vjen  si gjithnjë me motive të shtruara, me këngën “Autostop” të Kaltrina Selimit.

2. Mirela Doda zgjodhi këngën “Kam mall” të Greta Koçit, si e zgjedhura e moshës.

3. Egla Filopati me këngën “Një herë në jetë” të Leonora Jakupit.

4. Kënga që erdhi nga zëri poetik i të madhit Gjok Beci dhe e kënduar që herët nga Artistja e Popullit  Vaçe Zela “Një zambak i bardhë mbi gur” është zgjedhur për t’u interpretuar nga Ilia Jahja.

5. Me një serenatë erdhi Valbona Kola, pasi i ka pëlqyer të kënduarit e Çiljetës, por jo se ka dëshirë ta imitojë atë. Sjell origjinalitetin e saj në të kënduar.

6. Me një këngë të Anjeza Shahinit, një interpretim i vështirë i marrë përsipër në sfidën e saj të parë Enida Përlala me titullin “Nxënësja më e mirë”.

7. Me “Asnjë milimetër” të Arta Bajramit erdhi Elsa Mrruku

8. Debutuesja më e re Eliona Kola me këngën që jep pak më shumë ritëm popullor “Kur bjen fyelli e çiftelia” të Irma Libohovës.

Sharmi i humorit

Të ftuar më këtë shfaqje kanë qenë edhe këngëtarë dhe humoristë. Natën e parë ka kënduar Indrit Jushi. Gent Bushpepa është kërkuar me ngulm nga spektatorët, dhe për ta, ai ka performuar “live” në skenë, duke premtuar se shumë shpejt do të jetë me një koncert po “live” në Rrëshen. Ndërsa në natën e dytë këndoj Arinda Gjoni.

Por pjesë e spektaklit ka qenë dhe humori. Humoristët e njohur Behar Mera dhe Rita Lati janë sjellë në skenë nga Lek Doda, që punon në policinë bashkiake të Tiranës, i cili ka sjellë dhe disa imitime interesante ndërsa dy humoristët Mera e Lati janë përcjellë me shumë duartrokitje në interpretimet e tyre.

Ndërsa natën e dytë kanë sjellë interpretime orgjinale humoristët e Rubikut Aleksi, Gerti, Drini e Klaudia.

Seti i tretë i këngëve ka qenë dhe momenti deciziv i përcaktimit të fituesve.

1. E para Rezarta Kola, përmes interpretimit të këngës “Për ty po flas” të Edona Llalloshit.

2. Mirela Doda me këngën e Anila Mimanit “E ta dish”.

3. Egla Filopati me interpretimin e Celine Dion,  të njohur si “Titaniku”, një nga këngët më të bukuara të saj dhe hitet botërore për disa vite.

4. Ilia Jahja ka zgjedhur Anastazian për të treguar fuqinë e këngës së saj “Im outte love”.

5. Valbona Kola, me këngën e Greta Koçit “Eja zemër”.

6. Enida Përlala me Britny Spears. “Baby one more time”

7. Elsa Mrruku me këngën “Ku jeton dashuria ime” të Elvana Gjatës

8. Këngëtarja e fundit, Eliona Kola me (Hidhni vallen...), e cila u shoqërua nga tetëshja e audicionisteve të para të këtij spektakli.

Cmimet

Juria në fund të konkurimit nxori si fitues:

me çmimin e parë këntgëtaren nga Rubiku, Elsa Mrruku

çmimi i dytë: Enida Përlala

çmimi i tretë: Ilia Jahja

çmimi i debutueses: Eliona Kola.

Fituesit i përshëndetën kryebashkiaku i Rrëshenit Gjon Dedaj dhe Mark Ruçi, të cilët kanë përcjellur falenderimet për këtë audicion të suksesshëm, duke i këndvështruar si një risi që duhet të bëhet kujtesë për përzgjedhje të tilla në të tëra fushat.

Ndërkohë që kjo veprimtari do të shpërngulet dhe në qytetiun e Rubikut si dhe të synohet pjesëmarrja e fituesve në audicione në qark a gjetkë.

Tashme kjo veprimtari qe ka patur edicionin e pare shume te suksesshem, do te jete e pervitshme ne ç’do pranvere.

A. Ndoja