Bashkia Rrëshen dhe Bechtel-Enka, takime bashkëpunuese me banorët e fshatrave që përshkon traseja e rrugës.

 Disa prej problemeve që kanë dalë gjatë punës për ndërtimin e trasesë së rrugës Rrëshen-Kalimash, kanë bërë që banorët e fshtrave Ndërfanë, Ndërfushaz dhe Gëziç të Bashkisë Rrëshen, të trokasin nëpër dyert e institucioneve të ndryshme për të kërkuar ndihmë. Pikërisht për këtë, Bashkia Rrëshen ka organizuar një takim të zgjeruar mes banorëve të këtyre fshatrave dhe përfaqësuesve të firmës ndërtuese të rrugës Bechtel-Enka. Takimi është zhvilluar në shkollën 9-vjeçare “Ndue Broz Leci” Ndërfanë, me pjesmarrjen e Iva Zagar, përgjegjëse e mardhënieve me publikun, Bulik Kapidan, dhe Ela Ruçi specialistë në këtë zyrë. Ndërsa si përfaqësues të Bashkisë Rrëshen kanë qënë n/kryetari i kësaj Bashkis z. Dod Pepkola dhe juristi Gaspër Topollaj.

Në fillim ka folur z. Bulik Kapidan i cili tha se ky nuk është takimi i parë, ndërkohë që këto lloj takimesh për sqarime të ndërsjellta mund të bëhen ç’do dy javë a më shpesh. Duke vijuar më tej z. Bulik Kapidan shprehu falenderimet e firmes Bechetel-Enka për mbështetjen e treguar nga banorët, ndërkohë që evidentoi faktin se problem mbetet çështja e shpërthimeve. Për këto fshatra nuk ka shumë problem pasi ato janë larg trasesë së rrugës, ndërkohë që në Geziç apo më lart probleme të tjera janë evidente. Gjithashtu ai bëri të ditur faktin se punimet po ecin me ritmet e duhura, dhe deri në fund të vitit traseja ka për të përfunduar. Kjo do të thotë që edhe problemet do të marrin fund, pasi nuk ka për tu bërë volume të madha pune, siç janë lëvizet e dherave. Po ashtu edhe punimet në tunelin e Kalimashit kanë avancuar me sukses të plotë, dhe deri tani është kryer më shumë se gjysma e punimeve. z. Bulik Kapidan tha se do të lutesha që fëmijët të mos dalin në trase, pasi makinaeritë janë shumë të mëdha dhe manovratorët e kanë shumë të vështirë për ti parë.

Më tej shefja e mardhënieve me publikun znj. Iva Zagar, tha se jemi duke u munduar që problemet të marrin zgjidhje sa më shpejt, por problemet nuk janë të lehta, pasi po kryhen volume të mëdha punimesh. Ne punojmë në shumë vënde të botës, edhe unë personalisht kam punuar në pesë vënde. Ne mundohemi që punën ta bëjmë me sa më pak probleme për banorët, dhe kjo është arsyeja që ne jemi këtu, pikërisht për të marrë mendimet tuaja.

 Problemet.

 Gjin N. Cupi, një banor i këtij fshati tha se firma më ka shkatërruar një rezervuar prej 33000 m3 ujë, dhe askush nuk më jep përgjigje se kur do të rregullohet. Ndërsa një banor tjetër Vlash Gjoci, tha se ne kemi probleme me ndryshime në projekt, pasi me ndërtimin e urës së parë janë dëmtuar shumë ha tokë, ndërkohë që nga mos parashikimi i ndërtimit të një mbikalimi, është izoluar fshati Qafmollë etj. Edhe Pashk Leci tha se nga shpërthimi i 2. 5 ton tritol banesa e tij është dëmtuar dhe ende nuk është dëmshpërblyer. Probleme të tilla janë evidentuar edhe në fshatin Geziç etj. Mëhill Bardhi banor i fshatit Ndërfanë tha se po të kisha bërë unë ato çfar më janë bërë mua, unë do të isha në burg, ndërkohë që ju nuk jepni asnjë llogari. Nga punimet e pa parashikuara në rrugë, më janë shkatërrur mbi 3 ha tokë, ndërkohë që lagjia ime është ndarë në dy pjesë, dhe jemi ndarë nga fshati si për shkollë, kishë, sëmundje apo raste vdekjesh. Po ashtu edhe Nikoll M. Biba këmbënguli se i janë shkatërruar totalisht rreth 3 ha e 100 metra, dhe askush nuk ka dhënë ndonjë përgjigje. Edhe banorë të tjerë të këtij fshati kanë ngritur probleme të ndryshme, si dëmtim të tokës së pa shpronësuar, dëmtim reservuarësh dhe ujsjellësash, izolim të lagjeve të ndryshme nga qëndra e fshatitit etj.

 Në përgjigje të këtyre shqetësimeve, znj. Iva Zagar tha se jemi në dijeni të problemeve dhe  janë inxhinierët tanë ata që po punojnë për ti dhënë zgjidhje problemeve. Këto probleme që ju ngrini ne i kemi të listuara dhe po ndikojmë për zgjidhjen e tyre. Shumë nga ju tashmë i njihni specialistët tanë dhe ata ju kanë shoqëruar në vëndet ku janë krijuar problemet. Jemi në fazën ku tashmë është ngritur një grup pune që të evidentohen të gjitha problemet. Për këtë ka garanci të plotë, por më parë ne po evidentojmë problemet. Problemi me rrugët dhe linjat nuk janë përgjegjësi e firmës, por e projektuesit. Ndërkohë që shpronësimet janë kompetencë e qeverisë, ndërkohë që deri më tani janë shpronësuar rreth 500 prona, kryesisht tokë bujqësore.

Iva Zagar pranoi se janë bërë edhe gabime, por këto kanë ardhur si rezultat i faktit se jemi ballafaqur e të pa prituara në aspketin gjeologjik, dhe për pasojë është dashur të lëvizet prej projektit fillestar. Por, për këto probleme është i interesuar shumë edhe Kryetari i Bashkisë i cili i ka deleguar ato pranë Drejtorisë së Përgjithshmë të Rrugëve, pasi ato janë autoriteti i duhur për zgjidhjen e këtyre problemeve. Ne jemi ndërtues dhe zbatojmë projektin që na është vënë përpara. Duke vijuar më tej, Iva Zagar tha se duhet durim dhe gjithshka do të marrë zgjidhje. Edhe pse mund të përfundojë traseja dhe të zhvendosen makineritë e rënda, kjo nuk do të thotë që ne do të ikim. Ne do të jemi këtu deri në përfundim të gjitha punëve dhe problemeve tuaja që kanë ardhur nga puna për ndërtimin e rrugës. Në fund, të pranishmit kanë falenderuar përfaqësuesit e firmës Beachtel-Enka dhe Bashkisë Rrëshenit, për një takim të tillë i cili do të vendosë në rrugën e zgjidhjes shumë prej problemeve të ngrituara aty.

 Disa të dhëna për ndërtimin e autostradës Rrëshen – Kalimash:

 Projekti i Autostradës në Shqipëri parashikon ndërtimin e një autostrade prej 61 km, me katër korsi, e cila fillon në Rrëshen, në Shqipërinë Qëndrore dhe zgjatet në veri-lindje deri në Kalimash, në afërsi të kufirit me Kosovën.

 Projekti po zbatohet nga ndërmarrja e përbashkët Bechtel-Enka, nën në një kontratë me çmim njësi të caktuar, të nënshkruar me Drejtorinë e Përgjithshme të Rrugëve të Shqipërisë.

Projekti i Autostradës në Shqipëri është projekti më i madh infrastrukturor i zbatuar ndonjëherë në këtë vënd. Pas përfundimit, autostrada Rrëshen-Kalimash do të jetë pjesë e një autostrade prej 170 km që lidh bregun e Adriatikut me kufirin me Kosovën. Autostrada e projektit në fjalë, do të jetë një segment i rëndësishëm i transportit rrugor kombëtar në Shqipëri, sepse realizon një lidhje jetike me Kosovën dhe rajonin. Ndërtimi i autostradës është veçanërisht i rëndësishëm për zhvillimin ekonomik të Shqipërisë, sepse lidh tregjet e Europës juglindore me rrugët kryesore ndërkombëtare detare, nëpërmjet Portit të Adriatikut në Durrës.

Si gjatë ndërtimit, edhe pas përfundimit, autostrada do të sjellë zhvillim ekonomik në zonën verilindore të vëndit, duke tërhequr sipërmarrje dhe turistë në malet e Shqipërisë veriore.

 Nga pikpamja teknike, autostrada është e ndarë në tre segmente:

     1.     Rrëshen – Reps (19.5 km)

2.     Reps – Thirrë (26.5  km)

3.     Thirrë – Kalimash (14.8 km)

          Totali: 61 km.

 Segmenti 3 përfshin një tunel me dy shpime paralele 5.5 km të gjatë, që kalon përmes Malit Qafa e Kumbullës. Ky tunel do të jetë ndër më të gjatët në rajon.

 Për më shumë informacion, lutemi kontaktoni:

Iva Zagar

Mardhëniet Publike

Tel: 068 40 93 602. email: izagar@bechtel.com

Pergatiti: Aleksandër Ndoja