Prej ditës së sotme qyteti Rrëshen nën monitorimin e kamerave vëzhguese.

-Me ftesë të Kryetarit të Bashkisë z. Gjon Dedaj, drejtuesit e policisë vendosin rregullin në kryqëzime duke komanduar nga zyrat e Bashkisë-

 Vendosja e kamerave vëzhguese në kryqëzimet kryesore të qytetit Rrëshen ka bërë që dhjetra shkelje të rregullave të qarkullimit në rrugët e qytetit të fokusohen brenda ekranit të një kompiuteri, në një nga zyrat e godinës së bashkisë. Pikërisht në ditën e parë të funksionimit të sistemit vëzhgues, por edhe të  kësaj zyre, kryetari i bashkisë z. Gjon Dedaj ka ftuar në institucionin e bashkisë, shefin e rendit z. Avni Doçi i cili ka ardhur i shoqëruar nga dy inspektorë të policisë z. Preng Kaçorri dhe Artan Gjini.

Shefi i Rendit z. Avni Doçi është njohur me procesin e monitorimit të qytetit Rrëshen përmes kamerave vëzhguese. Drejtuesit e policisë janë informuar për faktin se të gjitha lëvizjet e qytetarëve dhe mjeteve mund të monitorohen gjatë 24 orëve në ditë, dhe pamjet filmike akumulohen në një server me një afat 4 mujor. Më tej serveri fshin në mënyrë automatike ditën e parë të para katër muajve, dhe rregjistron ditën vijuese. Procesi ka opsione të tilla që cdo ditë apo minutë brënda këtij katër muajshi, mund ta identifikosh në mënyrë shumë të shpejtë, dhe ti bësh ruajtje në DVD, apo edhe mund ta printosh në letër.

Pas marrjes së informacionit përkatës, z. Gjon Dedaj i ka ftuar drejtuesit e policisë për një provë monitorimi të rrugëve të qyetit nga zyra. Drejtuesit e policisë janë fokusuar kryesisht në kryqëzimin kryesor pranë qëndrës së kambizmit, ku është edhe ngarkesa më e madhe, pasi në afërsi të këtij vendi janë stacionet e furgonëve, autobuzëve dhe taksive.

Nga monitorimi për rreth 30 minuta u konstatuan dhjetra shkelje të rënda të qarkullimit rrugor, të cilat fare lehtë mund të ishin përkthyer edhe në aksidente. U konstatua që një furgon i bardhë ishte stacionuar në shkelje të rëndë të qarkullimit, pingul me kryqëzimin. Po ashtu edhe shumë mjete të tjera rezultonin të pozicionuara në kundërshtim me rregullat. Drejtuesit e policisë kanë komanduar përmes radiove patrullën e policisë për të vendosur rregullin në kryqëzim dhe pastruar vendin nga mjete në kundërshtim me rregullin, duke i shoqëruar ato me xhoba. Në pak minuta situate është normalizuar.

Më tej kryetari i Bashkisë z. Gjon Dedaj ka pritur drejtuesit e policisë. Në fillim z. Dedaj ka shprehur gatishmërinë e plotë të institucionit që ai drejton për të bashkëpunuar dhe bashkërenduar veprimet  për përmirësimin e situatës së rendit publik, dhe përmirësimin e trafikut në rrugët e qytetit. Z. Gjon  Dedaj tha se procesi i monitorimit të qytetit ka nisur këto ditë me vendosjen e disa kamerave, dhe sëshpëjti do të vendosen edhe shumë të tjera, që do të kenë në monitorim oborret e shkollave dhe shumë akse të tjera. z. Dedaj kërkoi bashkëpunim edhe nga ana e policisë, duke premtuar se cdo shkelje apo ngjarje edhe të rënda do të vihen në dispozicion të policies, si prova ndihmëse për zbardhje ngjarjesh qofshin ato edhe të rënda.

Ndërsa shefi i rendit z. Avni Doçi ka falenderuar Kryetarin e Bashkisë për bashkëpunimin me komisariatin e policisë. Ai ka theksuar se policia e qarkullimit rrugor në të vërtetë nuk ka ndonjë vartësi nga Drejtoria e Policisë së Qarkut, por nga Drejtoria e Policisë së shtetit. Z. Doçi informoi se për Rrëshenin është i ngarkuar një inspektor, por kjo nuk do të thotë që patrullat e policisë të mos të angazhohen në këtë drejtim. Shefi  i rendit tha se nga ana e komisariatit nuk do të ketë asnjë hezitim për mbajtjen nën kontroll të rendit, sigurisë dhe qarkullimit të mjeteve.

A.     A. Ndoja