Kryetari i Bashkisë Rrëshen z. Gjon Dedaj dhe një pjesë e stafit të kësaj bashkie, vendosin një buqetë me lule pranë varrit të Dom Nikoll Kaçorrit.

-Një  meshë kushtuar kësaj figure të shquar atdhetare-

 Varri i bashkthemeluesit të shtetit shqiptar, bashkëthemeluesit të alfabetit të gjuhës shqipe, patriotit dhe atdhetarit të shquar  Imzot dom Nikoll Kaçorri, duket se do të kthehet në një vënd nderimi dhe peligrinazhi për të gjithë shqiptarët. Tashmë eshtrat e këtij Prelati të shquar të Kishës Katolike pas afro 100 vitesh kanë mbërritur në Katedralen Shën Luçia të Durrësit, pikërisht aty ku për 23 vite me rradhë vetë Imzot Dom Nikoll Kaçorri ka qënë famullitar dhe shërbëtor i fjalës së Zotit.

 Dom Nikoll Kaçorri prehet pranë Prelatëve të tjerë dhe Martirë të Krishtërimit, si Imzot Pjetër Gjura dhe Imzot Vinçenc Prenushi. Ky i fundit viktimë e sistemit atesist, pritet të shenjterohet nga Vatikani, për të përfituar titullin e merituar “Martir i Kishës dhe Krishtërimit”. Siç tashmë është bërë e ditur për të gjithë shqiptarët, eshtrat e Imzot Kaçorrit janë zbuluar më 1 shkurt 2011, në Vjenë të Austrisë. Më 6 shkurt në Vjenë u mbajt mesha përkujtimore, ndërsa më 9 shkurt eshtrat e Imzot Kaçorrit mbërritën në Shqipëri,  për tu prehur përgjithnjë në atdheun të cilit ju përkushtua me forcë e besim.

Vizita

Kryetari i Bashkisë Rrëshen z. Gjon Dedaj i shoqëruar nga nënkryetari z. Nok Mrruku dhe pjestarë të tjerë të Bashkisë Rrëshen kanë udhëtuar në orët e para të ditës së dielë drejt qytetit bregdetar, për të marrë pjesë në meshën e dytë kushtuar figurës së ndritur të Dom Nikoll Kaçorrit. Ata janë shoqëruar nga z. Xhovalin Kaçorri i cili edhe më parë ka shoqëruar aktivitetet në nderim të Dom Nikoll Kaçorrit që nga mbërritja e Tij në Rinas, dhe deri më momentin e rivarrimit të eshtarve pranë Altarit të Katedrales së Shën Luçisë.  Në ora 9. 00 grupi nga Rrësheni me një buqetë të madhe me lule  ka  mbërritur pranë portës së Shën Luçisë, ku janë prituar nga famullitari Monsignor Damian Kurti. Imzot Kurti ka falenderuar përzemërsisht Kryetarin e Bashkisë z. Gjon Dedaj për pjesmarrjen e tij dhe të stafit të Bashkisë në Meshën e së dielës, kushtuar Dom Nikoll Kaçorrit.

Nga ana e tij z. Gjon Dedaj ka falenderuar përzemërsisht famullitarin Damian Kurti për pritjen e ngrohtë dhe përkushtimin e Tij. Z. Dedaj vuri në dukje se kishte ndjekur me mjaft vemendje gjetjen dhe riatdhesimin e eshtrave të Dom Nikoll Kaçorrit, ndonëse nuk kishte mundur që të merrte pjesë në ceremonin e rivarrimit për shkak të një angazhimi të rëndësishëm pune në Këshillin e Europës në Bruksel. Më tej grupi i bashkisë Rrëshen është ndalur pranë vend varrimimit të Dom Nikoll Kaçorrit, ku kanë vendosur një buqetë me lule të freskëta në emër të Bashkisë Rrëshen dhe të gjithë qyetarëve të kësaj Bashkie. Për disa minuta kanë qëndruar në heshtje pranë varrit në shenjë nderimi dhe respekti për njërin prej atdhetarëve më të shquar që ka nxjerrë kombi shqiptar.

Mesha

Monsignor Damian Kurti në fillim të Meshës u ka bërë të ditur besimtarëve të shumtë se drejtuesit e Bashkisë Rrëshen ishin mes tyre, për të nderuar figurën e Dom Nikoll Kaçorrit. Ai ka falenderuar përzemërsisht duke shprehur mirnjohjen për këtë vizitë. Më tej është vijuar me procedimin e Meshës, ndërkohë që Monsignor Damiano Kurti ka njoftuar se mesha e kësaj dite i kushtohej Dom Nikoll Kaçorrit, i cili pikërisht nëj javë më parë kishte pushur përjetësisht në këtë Katedrale, ku edhe kishte shërbyer plot 23 vite me rradhë.
Në predikimin e Tij dom Damiani bëri një përshkrim brilant të aktivitetit patriotik dhe meshtarak të klerikut të shquar Kaçorri. Ai vuri në dukje kontributin e tij të shquar në shpalljen e pavarësisë së Shqipërisë më 28 nëntor 1912, dhe njohjen e qeverisë së dalë me këtë rast nga fuqitë e mëdha dhe vendet e tjera të kontinetit. Ai theksoi se në këtë Kishë të vogël Dom Nikoll Kaçorri ka shërbyer për 23 vjet. Ka qënë i flaktë, ka qënë i zjarrtë, ka qënë një njeri që e ka ditë fort mirë se kush ishte populli shqiptar, dhe kush kanë qenë turqit. Shumë mirë e ka ditë se kemi qenë të skllavëruar për 500 vite nga turqit. Me të vërtetë Dom Nikoll Kaçorri ka punue shumë dhe në ngjarjen e madhe të ngritjes së flamurit të datës 28 nëntor 1912, bashkë me Ismail Qemalin, edhe  përkundër presionit të ushtrisë dhe xhandarmërisë turke, ngritën flamurin, e shpallën pavarësinë dhe sëbashku nënshkruan formularin e pavarësisë. Këto fjalë që povi  them për Dom Nikoll Kaçorrin janë fakte. Ai ka merituar ma shumë, ma tepër. Ne e kemi kërkuar varrin e Tij që 20 vjetë. Që prej 20 vjetëve nuk e kem ditë se ku pushon Dom Nikoll Kaçorri. Me ndihmën e Zotit doli një prift i zellshëm Dom Pren Kola prej Kosove, i cili kërkoi në Bashki e në rregjistrat e vjetra. Gjetën ditën e vdekjes, shkakun e vdekjes dhe vendin ku ishte varros në vitin 1917. Pas gërmimeve në thellësinë 3. 5 metra u gjet një varr, por si me identifikue se ishte pikërisht Dom Nikoll Kaçorri..? Aty gjëtën një copë flamuri kombëtar të Shqipërisë. Pikërisht kjo vërtetoi se ky ishte Dom Nikoll Kaçorri. Dhe pikërisht këtë Meshë të Shenjtë po ja kushtojmë këtij njeriu të madh dhe gjithëherë ju them të mos e harrojmë kurrë. Në nuk do ta  harrojmë kurrë, e kjo është detyra jonë më e madhe dhe e shenjtë.  

Më tej Mesha ka vijuar duke u ndjekur me mjaft vemendja nga qindra besimtarë katolikë që kishin mbuashur Kishën Shën Luçia të Durrësit. Shumë prej tyre ishim mirditas të mbërritur aty gjatë viteve të fundit në kuadër të lëvizjes së lirë.

Në fund të Meshës së shenjtë kushtuar Dom Nikoll Kaçorrit, Monsinjor Damian Kurti shoqëroi grupin nga Mirdita duke i njohur me të gjitha mbientet e Katedrales ku kishte shërbyer dom Nikolla. Rruga që kalonte përbri Katerdrales, mban emrin e patriotit dhe atdhetarit meshtarak Dom Nikoll Kaçorri.

Epilogu i kësaj vizite në Durës ishte një vizitë pranë bustit të Dom Nikoll Kaçorrit që ndodhet në afërsi të qëndrës së qyetatit bregdetar.

Aleksandër Ndoja

Durrës 20 shkurt 2011