Çertifikate mirenjohje per nxenesit e klases se katert

  Jo vetem janë treguar të ndjeshëm për të bërë prezent vizionin e tyre për mbajtjen pastër të qytetit të Rrëshenit, por dhe kanë ndërmarrë hapa konkretë për të dhënë shembulliun sesi komuniteti mund ta bëjë këtë gjë në të mirë të mjedisit dhe cilësisë së jetës. Kështu ka ngjarë me klasën e IV-C të shkollës 9 vjeçare ”Pashko Vaso” në Rrëshen, kur një ditë shtatori janë parë nëpër rrugët dhe lulishtet e qytetit për të hequr letrat dhe pastruar mjediset e ndryshme. Nismës së tyre u është bashkuar dhe vetë kryebashkiaku i Rrëshenit z.Gjon Dedaj, duke përftuar edhe kënaqësinë e punës me këta fëmijë të vegjël por aq sensibël ndaj mbajtjes pastër të mjedisit ku jetojmë sëbashku.

Po ata fëmijë kanë qenë sot miq të ftuar në zyrën e kryebashkiakut, miqtë më të veçantë të bashkisë, shembulli i pastërtorëve ”që duhet ndjekur nga ne më të mëdhenjtë”, ka perifrazuar zoti Dedaj.  ”Ju bëni ato punë të mira, që ende ne të mëdhenjtë i bëjmë keq, dhe ne duhet të mësojmë prej jush, u është drejtuar ai fëmijëve”, duke i përgëzuar emër për emër, ashtu si dhe mësuesen e tyre pasionante Vitore Pulaj.

Në një sondazh të atypëratyshëm, del se mbi 60 përqind e fëmijëve kanë kompjutera tek shtëpia dhe se janë lidhur dhe me interent, çka tregon për një qytet në zhvillim,dhe aq më tepër kur teknologjia mbërrin më së pari tek fëmijët. Duke shpalosur lajmin e posacëm dhënë për këtë klasë, nismën e tyre, në faqen e bashkisë, fëmijët kanë rrëfyer se me këtë nismë të tyre janë njohur njerëzit e tyre të afërt, si dajo apo vëllëzër të rritur që jetojnë jashtë shtetit si në Gjermani, Kanada, Norvegji a gjetkë. Duke marrë këtë informacion nga këta vogëlushë, natyrshëm lind pyetja: po këtu brenda për brenda sa të interesuar do të jenë më të rriturit jo vetëm për t’u njohur me këtë nismë, por për të qenë pjesë e gjithpërfshirjes në aksione të tilla komunitare për një mjedis gjithnjë e më të pastër, gjithnjë e më ekologjik.

Në fund të takimit të këndshëm, fëmijëve pjesëmarrës në këtë nismë për mbajtjen pastër të qytetit, nga ana e kryebashkiakut Dedaj u është dorëzuar çertifikata e mirënjohjes, dedikuar kësaj klase, të cilët fëmijët thanë se do ta mbajnë si kujtimin më të bukur në klasën e tyre dhe në vitet që do të pasojnë gjatë shkollimit dhe në jetë.

Gj. Marku