Kryetari i Bashkisë z. Gjon Dedaj priti një delegacion me zyrtarë të Ministrisë së Kosovës.

 Një delegacion i Ministrisë së Bujqësisë së Kosovës ka zhvilluar një vizitë disa orëshe në qytetin e Rrëshenit. Delegacioni kryesohej nga z. Muzafer Luma Drejtor i Përgjithshëm i Pyjeve të Kosovës, dhe në përbërje të cilit ishin edhe zyrtarë të tjerë të lartë të Ministrisë së Bujqësisë së Kosovës, si Mediha Halimi, zyrtare për statistika në këtë ministri, Penka Todorova, zyrtare për zhvillim rural, Bajram Imeri, drejtor departamenti, Tahir Halitaj zyrtar i departamentit zhvillimor, Lulëzim Shamolli, Shef i Divizionit për Politika Bujqësore, si dhe Avdi Llolluni, zyrtar rajonal për Zhvillimin në Ministrinë e Bujqësisë së Kosovës.  Një vizitë e tillë është zhvilluar në kudadër të bashkëpunimit të ngushtë me MADA-n, ndërkohë që ky delegacion shoqërohej nga z. Roland Bardhi, menaxher praën MADA-s.Pritja e parë e delegacionit të Ministrisë së Bujqësisë së Kosovës u organizua në zyrën e Kryetarit të Bashkisë së Rrëshenit z. Gjon Dedaj, përgjegjësi i zyrës së shërbimeve në komunitet z. Gaspër Topollaj dhe zyrtarë të tjerë të kësaj bashkie.

Në fillim z. Dedaj i ka uruar mirseardhjen vëllezërve kosovarë në qytetin mikpritës të Rrëshenit. z. Gjon Dedaj vuri në dukje se në këtë zyrë janë pritur dhe respektuar kryemistra apo dhe presidentë, por kjo vizitë e kolegëve nga Kosova do të jetë më e veçanta, pasi ngjall emocione të shumta. Kjo sepse gabimisht për një kohë të gjatë politikat e mbrapshta bënë që të shpallnim vëllezër kinezët, ndërsa kosovarët miq. Por tashmë kjo kohë ka marrë fund, gjërat shkuan në vëndin e tyre dhe kosovarët tashmë janë siç i ka krijuar historia, vëllezërit tanë. z. Dedaj foli gjatë për situatën në Mirditë dhe veçanërisht u ndal tek vlerat e mëdha për bashkim, që do të realizohen pas përfundimit të rrugës Durrës-Kukës.

z. Dedaj bëri një panoramë të gjatë të ecurisë së punimeve në këtë aks dhe vuri në dukje se pas përfundimit të rrugës, distance mes Kosovës dhe Mirditës, ka për të qënë shumë më e shkurtër, dhe vizitat e ndërsjellta kanë më qënë edhe më të shpeshta.

z. Dedaj foli edhe për vlerat historike të mirditasve dhe lidhjes e hershme të kësaj treve me atë të Kosovës dhe viseve të tjera shqiptare, duke vënë në dukje faktin se pas vendosjes së kufinjëve në vëndin e tyre në Mitrovicë, Mirdita kthehet në epiqëndër të viseve shqiptare, dhe një urë komunikimi mes kryeqytetve shqiptare të ndarë padrejtësisht nga historia.

Ndërsa kryetari i delegacionit të Ministrisësë së Kosovës z. Muzafer Luma u shpreh mjaft i kënaqur me vizitën  në Bashkinë Rrëshen dhe me pritjen që ju rezervuar delegacionit të zyrtarëve të Ministrisë së Bujqësisë së Kosovës. Më tej z. Luma, bëri èrezantimin e delegacionit të kryesur prej tij dhe qëllimin e vizitës në Rrëshen. Kjo vizitë ishte inicuar edhe me mbështjen dhe sygjerimin e drejtuesve të Mada-s pasi kjo organizatë ka një bashkëpunim të ngushtë me Bashkinë e Rrëshenit por edhe me institucione të Kosovës.

z. Luma, tha se ishte hera e parë që vizitonte Mirditën, por që ishte një njohës i mirë i historisë së saj, pasi në Kosovë është shkruar shumë për këtë krahinë me tradita të spikatura në histori. Ai evidentoi disa virtytete të larta të mirditasve, dhe për këtë siç u shpreh ai, ndjehemi të lumtur që na u dha rasti për të vizituar këtë zonë.

z. Luma vlerësoi lart punën e bërë në rrugën Durrës-Kukës, dhe tha se një ndër arsyet e vizitës në Rrëshen është edhe ajo për të bërë një vizitë në trasenë e autostradës.

Edhe anaëtarë të tjerë të këtij delegacioni janë shprehur të kënaqur dhe kanë falendëruar Kryetarin e Bashkisë z. Dedaj, për pritjen në zyrat e institucionit. Delegacioni Kosovar i ka bërë një ftesë kryetarit Dedaj për të vizituar Kosovën në muajt e ardhshëm.

Më tej delegacioni i Ministrisë së Kosovës ka zhvilluar një vizitë në Kantinën e verës “Arbri” me pronar z. Fran Kaçorri. Në fillim z. Roland Bardhi tha se kjo ishte një sipërmarrje totalisht private por që kishte pasur mbështjen e MADA-s. Pas kësaj delegacioni i Kosovës ka vizituar ambientet e brëndshme të kësaj kantine e cila prej disa vitesh është marrë me përpunimin e rrushit të njohur të fshatit Bukmirë. Të pranishmit kanë mësuar se e gjithë teknologjia ishte italiane dhe mjaft cilësore. z. Kaçorri tha se në këtë kantinë përpunohen dhe prodhohen rreth 1500 kv verë në vit. Më tej të gjithë të pranishmit kanë shijur cilësinë e verës “Arbri” të cilën e kanë vlerësuar për shijen dhe për cilësinë e saj.

Vizita e fundit në Rrëshen e delgacionit të Kosovës është zhvilluar në zyrat e drejtorisë së Bujqësisë, ku janë prituar nga drejtori i kësaj drejtorie z. Preng Kaçorri. Kolegët kosovarë kanë kërkuar të njihen me disa praktika pune në sistemin bujqësor të Mirditës. Në përgjigje të këtij interesimi. z. Preng Kaçorri dhe z. Zef Gjopali, kanë bërë një panoramë të zgjeruar të aktivitetit bujqësor të Mirditës. Delegacioni i Ministrisë së Bujqësisë së Kosovës e ka mbyllur vizitën e tij në Rrëshen, me një vizitë në aksin e rrugës Durrës-Kukës.

A. Ndoja