Festa  e  Pavarësisë  së  Shqiptarëve,  artistë mirditas në ditën e kulturës në Prizren.

Një  bashkëpunim i frytshëm mes Lidhjes së Shkrimtarëve dhe Artistëve  të Mirditës dhe Komunës së Prizrenit, ka bërë që festa e Pavarësisë së Shqiptarëve të njohë një dimension  ndryshe në këtë qytet.  Ora 11. ⁰⁰ kur ishte paralajmëruar deputimi i artistëve dhe shkrimtarëve mirditas  bëri që holli Qëndrës Kulturore të  Prizrenit  të  tejmbushej me vizitorë të shumtë, qytetarë dhe intelektualë të këtij qyteti. Madje edhe përshëndetja e kryetarit të Komunës së Prizrenit z. Ramadan Muja e cila ishte parashikuar në këtë orë, u bë e pa mundur për shkak të fluksit të qytetarëve që ju afroheshin stendave me rreth 67 piktura, ndonëse vetë kryetari ishte pjesmarrësi VIP në të gjithë aktivitetin.

Një aktivitet i tillë u bë i mundur falë mbështetjes se Drejtorit të Kulturës në Komunë dhe z. Kujtim Gashi  dhe Televizionit të Prizrenit i cili ditë më parë kishte paralajmëruar një aktivitet të tillë në ditën e festës më të rëndësishme të Shqiptarëve. Në njoftimet deri edhe me ftesa me anë fletpalosjesh të shpërndara në institucione dhe banesa, njoftohej edhe për promovim nga krijimtaria e autorëve mirditash si Preng C. Lleshi, Bardhok Pulaj, Gjon Marku, dom Ben Zymi etj. Në mënyrë krejt vullnetare drejtori i kulturës Kujtim Gashi kishte dërguar në shtyp dhe prodhuar një katalog të cilësisë së lartë ku në të pasqyroheshin rreth 67 piktura të piktorit mirditas z. Pjetër Marku.

Ceremonia.

Rreth 5 minuta para orës së parlajmëruar edhe nga titrat e tv-Prizrenit, qindra qytetarë janë tubuar në sheshin para qëndrës kulturore të qytetit. Ishin këta që thyen klishetë e vazhdueshme me fjalime dhe program të detajuar në cdo hap.  Me tu hapur porta qindra qytetarë kanë vërshuar në holl, në qëndër të cilit shpalosej ekspozita në pikturë e z. Pjetër Marku. Piktori i mirnjohur në Kosovë z. Demush R. Avdimetaj tha se “shpirti e magjia krijuese, e bukura, kreativiteti shprehës tek artisti Pjetër Marku shfaqen pamje të shënura të cilat e rrethojnë gjitnjë në ambientet e tij jetësore me tone dhe gradacione të ngrohta nëpër kohë ditë dhe vite. Cdo vepër e tij duhet vlerësuar dhe cilësuar me efektet artistike dhe të shpërfaqura me ngjyra të forta, masive, lëvizje të brushës, me të cilën evokon gjuhën identiteti shprehës në botën e tij pikturale”. Ndërkohë që drejtori i televizionit kombëtar z. Mefail Bytyqi  tha se është i impresionuar nga interesimi i artdashësve prizrenas për kulturën e Mirditës, dhe autorëve prezantues të saj. Artistë, piktorë vëndas por edhe intelektualë të ndryshëm u shprehën me superlativa për atë që realizohej në hollin e kulturës, ndërkohë që disa televizione të Kosovës ndiqnin këtë veprimtari e cila u konsiderua e suksesshme.

Më pas aktiviteti u spostua në ambientet e ku u mblodh Lidhja Shqiptare e Prizrenit, ku autorë mirditas si Bardhok Pulaj, Ndue Oroshi, Preng C. Lleshi, Gjon Marku paraqitën pjesë nga krijimtaria letrare e tyre. Nga artistë prizrenas dhe mirditas u ra dakort që aktivitete të tilla të ishin sa më të shpeshta pasi vetëm në këtë mënyrë thyhen barrierat e dhunshme që e patën fillesën e tyre rreth 99 vite më parë.

Në fund të aktivitetit, TV i Prizrenit hapi studion e tij në një emsion kulturor ku protagonist ishin artitët mirditas.

Një ditë më parë…

Në Gjakovë ku gjëndet varri i njërit prej kontribuesve më të fortë për pavarësinë e Shqipërisë, Pjetër Çeli i Lukes, nga Fani i Mirditës ishte organizuar një ceremoni përkujtimore nga shoqata “Trojet e Arbrit” dhe komuna e këtij qyteti. Në ora 12 në sallën e qendrës kulturore të Gjakovës, Akademia përkujtimore për këtë rast ka nisur me Hymnin e Flamurit Kombëtar të kënduar me mjaft finesë nga kori i nxënësve të shkollës së Gjakovës. Më pas e ka marrë fjalën Kryetari i Komunës së Gjakovës z. Pal Lekaj, i cili ka evidentuar luftën heroike të çetës së Fanit të Mirditës, përkrah vëllezërve gjakovarë, dhe në veqanti të Pjetër Çelit si komandat, prijës dhe luftëtar.

Më tej  z. Ndue Oroshi autor i një libri monografi për Pjetër Çelin, në një referat me këtë rast bëri një historik më të gjatë për jetën dhe veprën e komandantit të Fanit.

Edhe prof. dr.   Muhamet Shatri në fjalën e tij është shprehur me notat shumë të larta vlerësuese për aktivitetin e luftëtarëve të Fanit dhe bashkëpunimin me gjakovarët në luftë kundër pushtuesve dhe orekseve të shovinistëve.

Në fund ka përshëndetur edhe z. Pjetër Marku si pasardhës i komandantit Pjetër Çeli, i cili i ka dhuruar kryetarit të Gjakovës z. Pal Leka një prej punimeve të tij, portretin e luftëtarit komandat të cetës së Fanit.

A. Ndoja

28 nëntor 2011