Organizohet “Dita e shtegtarëve” në Rrëshen

Bashkia Rrëshen nën kujdesin e drejpërdrejtë të kryetarit të bashkisë Gjon Dedaj, ka organizuar këto ditë gushti një ditë festive enkas për emigrantët të quajtur “Dita e Shtegtarëve”. Një pasdite ku bashkia ka hapur dyert e saj në pritje të emigrantëve për të bashkëbiseduar me ta për punët dhe projektet komunitare si dhe angazhimin e tyre në këto projekte, ndërsa në sheshin e qytetit në orët e darkës u dha një koncert festiv për rreth një orë, duke u krijuar kënaqësi e afeksion emigrantëve kryesisht, por dhe gjithë qytetarëve.

Koncerti është perceptuar në formën e një përshëndetje numër pas numëri, duke filluar me pjesën hyrëse një poezi kushtuar emigrantit, shkruar nga një nxënëse shkolle në Mirditë.

Ti ike udhës së detit të kaltër

Mbi qilimin valë-valë lodroje

Ike dhe le zjarrin në vatër

Nënën në prag të derës në pritje

Dhe sytë gjithë mall shikojnë pas

Loti i kripur në detin e përzier

Në rërën e lagur u përplas ai lot

Mbyti brenda vetes atë mall dashurie

Atje nën dritat e qytetit të huaj

Do të ndiesh të ftohtë, dimër, acar

Qielli i kaltër mbi kokën tënde

S’do të duket më si më parë

Rrësheni dhe Mirdita në përgjithësi këto ditë gushti kanë patur mijëra emigrantë me framiljet e tyre që shtegtuan për një jetë më të mirë në Itali, Greqi, Gjermani, Belgjikë, Angli, Kanada e deri Amerikën e largët. Ky lloj dyfishimi i popullatës së këtushme vjen natyrshëm çdo muaj gusht apo fundviti sepse ata gjithmonë e kanë patur dhe e kanë në ëndërrat e tyre vendlindjen ndaj dhe pushimet nuk mund të kklohen më mirë se aty ku kanë lindur e ku kanë të afërmit. Ndaj dhe kësaj rradhe, mijëra emigrantë kanë preferuar që ndonëse me mungesa kushtesh jetësore siç ndodh rëndom në vendin tonë, pa drita e ujë në kushte optimale, sërish vendlindja mbetet një magnet magjik që të tërheq e tërheq pafund për të mos i kthyer krahët.

Duket se ky organizim ka qenë si një lloj lubrifikimi i halleve me të cilat bashkëtejtuan këto ditë dhe shtegtarët tanë në vende të ndryshme të botës.

Pas koncertit në mjediset e bashkisë emigrantët janë pritur nga kryetari i bashkisë z. Dedaj si dhe zyratarë të tjerë që i kanë mbajtur zyrat e hapura deri në orët e vona të darkës. Në zyrën e kryebashkiakut pos disa emigrantëve, kanë qenë të ftuar dhe artistët e ansamblit “Mirdita” që si të thuash dhanë dhe sajdisjen më të mirë për motrat dhe vëllezërit tanë emigrantë me këngët dhe interpretimet e tyre. Gjithcka ka kaluar përmes një kokteili të thjeshtë dhe bisedës vëllazërore, ndërsa emigrantët janë ftuar të përcjellin impresionet dhe mendimet e tyre për zhvillimin e bashkisë, vizionin që ata kanë për të ardhmen e vendlinjdes, në një libër të hapur enkas për këtë rast.

Një pruitje e tillë e organizuar specifikisht në paraqitje të shërbimeve që u jep bashkia banorëve të vet si dhe projekteve ku mund të angazhohen dhe vetë emigrantët, do të organizohet me rastin e Krishtlindjeve, ndërsa ky i kësaj rradhe u quajt si nisje e parë që dha një impakt pozitiv në mardhëniet emigrantë-bashki.

Alvarita Preçi

Elsuida Duka