NENA IME…!

Nuk e di akoma se ç̕ është jeta, jam shume e vogël përballë një fjale kaq të madhe, por njerëzit që më rrethojnë dhe familja ime më mësojnë çdo ditë diçka të re. Mundohem t̕ i kuptoj të gjitha, por pa praninë e një personi është e pamundur…Nënës time…!

Eshtë njeriu më i shtrenjtë i jetës time,  dhe i lutem zotit që ta kem deri në fund të jetës. Nëna është personi që më ka ushqyer me gjoksin e saj, që më ka sjellë në jetë.

Ajo më ka dhënë sy te shikoj bukurinë e saj ,veshë të dëgjoj këshillat e saj, zemrën e një njeriu të mirë dhe gojën që të më ushqejë dhe të artikuloj vetëm fjalë të bukur,  që t̕ i shpreh dashurinë e madhe që ndjej për të.

Kanë shkruar e folur shumë për nënat,  por asgjë nuk mund të krahasohet me fjalët që dalin nga zemra e pastër e një fëmije. Sa bukur është të zgjohesh në mëngjes nga zëri i ëmbël i nënës që vjen e të lajmëron ardhjen e një dite të re, dhe të tregojë që edhe sot si çdo ditë tjetër do të jetë përkrah teje. Vjen si ajo drita që ndan ditën nga nata dhe të bën të shpresosh e të guxosh.

Dëgjoj bashkëmoshatarët e mi kur flasin për nënat e tyre dhe më kujtohet nëna ime.Dëgjoj përsëri dhe arrij të kuptoj që askush nuk është si ajo.Askush nuk e ka atë ëmbëlsinë,mirëkuptimin,përkushtimin dhe dashurinë e saj.

Mendoj për veten time dhe them që jam njeriu më me fat në botë që kam një nënë të tillë dhe që e kam pranë. Nuk e di se si do të ishte jeta ime pa të. Sa shumë dëshpërohem e mërzitem kur dëgjoj të flasin ata fëmijë që nuk i kanë nënat e tyre pranë. Në zemrat e tyre ka një boshllëk, në sytë e tyre nuk rrezaton ajo drita e shpresës që e bën njeriun më të bukur e më të lumtur.

Mendoj...sa të lumtur do të ishin ata fëmijë po të kishin pranë nënën e tyre, por kjo shpresë zhduket kur kthehem në realitet dhe kuptoj që ka dhe fëmijë të tillë që në kopshtin e tyre të ëndrrave mungon trëndafili më i bukur i kopshtit, NENA.

Unë e kam nënën time pranë, por, dhe në ëndrrat e mia flas me të dhe kështu mendoj që duhet të bëjnë edhe ata që nuk i kanë nënat. Kurdo që kanë nevojë për një fjalë të ëmbël, për një këshillë apo një përkëdhelje të mbyllin sytë e me gjithë fuqinë e zemrës të shprehin dëshirën që të kenë nënën e tyre pranë dhe papritur...nëna është aty. Kudo qoftë,në çdo cep të tokës apo të qiellit ajo do  i përgjigjet thirrjes së fëmijës së saj.

Sa shumë kam për të thënë për nënën time saqë nuk i gjej dot fjalët, dhe në të vërtet nuk e di a ka të tilla që mund të përshkruajnë mrekullinë e jetës time dhe mrekullinë e jetës se çdo njeriu.

Falenderoj çdo ditë zotin  për dhuratën më të çmuar të jetës time!!!

ELDA NDOJA

Klasa VII-b

Shkolla nr 2, Rrwshen.

e-mail: eldandoja@rocketmail.com