Përfundon faza e tretë e “sistemim-asfaltim” të rrugës Rrëshen-Kodër-Rrëshen.

  Ka përfunduar faza e tretë e “Sistemim Asfaltim” për rrugën që lidh qytetin Rrëshen me fshatin Kodër Rrëshen. Është hera e parë në historinë e funksionit të kësaj rruge, që  gjerësia e saj ka prekur asfaltin, si një mundësi për levizjen sa më komode të banorëve të këti fshati, për tu lidhur me zonat urbane. Në një vështrim të përgjithshëm kjo rrugë që në shumicën e tërësisë së saj është malore dhe me kthesa të shumta, jep një pamje mjaft cilësore. Tashmë asfalti gjarpëron në kodrën përballë qytetit për të përfunduar në hyrje të fshatit Kodër Rrëshen. Është faza vijuese e cila do ta shtyjë më tej deri në qëndër të fshatit, por që pritet të rinisë pas akordimit të fondeve përkatëse. Megjithatë banorët e këtij fshati shprehen mjaft të kënaqur për përfundimin e fazës së tretë pasi rrugë në përqindjen më të madhe të saj ofron konfort, cilësi, e cila ndikon drejtpërdrejt në uljen e kostos së udhëtimit për në qytet. Në këtë rrugë kalojnë qindra banorë të këtij fshati i cili ruan një numër të konsiderueshëm familjesh, pasi janë shumë të pakta ato familje që kanë lëvizur për të migruar. Kjo edhe për faktin se toka në këtë fshat është shumë pjellore, ndërsa rezervuari Malaj – 2, siguron ujin për vaditje për stinën e ngrohtë të verës. Po ashtu shumë banorë të këtij fshati, duke pasur qytetin shumë afër, e madje janë pronarë tokash në qytet, kanë ngritur bisneze të shumta. Rruga e cila ka përfunduar pak ditë më parë, ka siguruar një udhëtim mjaft të mirë dhe të shpejtë edhe për nxënësit të cilët vijojnë mësimin në shkollat e qytetit.

Rruga!

 Të dy fazat që kanë realizuar asfaltimin e rrugës nga qyteti për në hyrje të fshatit janë realizuar nga firma “Kthella-Shpk” me president z. Pjetër Nikolli. Sipas drejtuesit ligjor të kësaj firme, për realizimin e fazës së tretë që nis tek degëzimi i ish-repartit kundër ajror dhe përfundonte në të hyrë të fshatit, Bashkia Rrëshen ka vënë në dispozicion një shumë prej 6462503 lekë. Sipërfaqja e sistemuar dhe e shtruar më asfalt është në masën 3128 m2, ndërsa është realizuar mbushje në një sipërfaqe prej 255 m2. Për ndërtimin e plotë të saj është përdorur rreth 156 m3 beton të markës 200. për të siguruar një cilësi të konsiderueshme të rrugës është ndërtuar edhe bankina në nëj sipërfaqe prej 1125 m2. z. Nikolli shprehet se është bërë kujdes i madh në ndërtimin e pritave në të ashtuquajturave zona të rrezikshme, pasi një pjesë e ekstremit të rrugës kufizohet më një greminë majft të madhe dhe me rrezikshmëri të lartë.

A. Ndoja