Rrëshen. Policia në një ditë feste.

Përkujtohet 96 vjetori i krijimit të policisë së shtetit.

Homazh policeve te vrare. 

96 vite më parë, vetëm pak më shumë se një muaj nga shpallja e Pavarësisë së Shqipërisë, qeveria e Ismail Qemalit në ditët e para të qeverisjes së tij, hodhi bazat për ngritjen e një strukture policore për të vënë nën kontroll situatën në territoret e mëvetësuara. Dokumentat historikë provojnë se në dhjetëditëshin e parë të janarit 1913 nisi të hedhë hapat kjo strukturë policore, ndërsa si ditë e krijimit të saj, është data 13 janar 1913. Pikërisht kjo datë ka vite që është shpallur si festë e policisë së shtetit shqiptar. Kjo është një ditë ndryshe për të gjitha komisariatet e vëndit, pasi ato hapin dyert për vizitorë të shumtë, kryesisht qytetarë të zakonshëm. Edhe komisariati i policisë së Mirditës, që në orët e para të ditës ka hapur dyert e saj për të gjithë qytetarët dhe vizitorë të ndryshëm

Rreth orës 10 para dite, në komisariat për të uruar fesëtën, kanë mbërritur drejtuesit e pushtetit vendor, n/prefekti i Mirditës z. Gjon Pjetri, kryetari i Bashkisë z. Gjon Dedaj dhe përfaqësuesi i Qarkut Lezhë në cilësin e Kryetarit të Komisionit të Rendit z. Preng Gjergji. Ata janë pritur nga shefi i komisariatit të policisë së Mirditës, z. Dedan Gjetaj dhe drejtues të tjerë të këtij komisariati.

Z. Gjon Pjetri dhe z. Gjon Dedaj, fillimisht kanë uruar policinë për festën e tyre, njëkohësisht nga mikpritësit janë njohur me punën që bëhet në këtë komisariat, me shërbimet dhe me arritjet gjatë një viti. Drejtuesit e pushtetit lokal Pjetri e Dedaj e kanë inkurajuar policinë lokale në punën e tyre, duke i siguruar se nga ana e pushtetit vendor do të ofrohet i gjithë bashkëpunimi për një rend sa më të sigurtë dhe në shërbim të qytetarëve.

Më tej pasi janë vizituar ambiente të ndryshme të godinës së komisariatit, festa është zhvendosur në ambientet e njërit prej lokaleve të qytetit. Këtu ishin prezentë të gjithë efektivat e policisë së Mirditës, veteranë të policisë, familjet e policëve të rënë në krye të detyrës si edhe miq e të ftuar të tjerë.

Sipari i festës është hapur me HYMNIN E POLICISË, ku të gjithë kanë qëndruar në këmbë në shenjë nderimi për punën, mundin, sakrificat dhe gjakun e policëve gjatë 96 viteve.

Më tej shefi i këtij komisariati z. Dedan Gjetaj ka falenderuar të pranishmit dhe në fjalën e tij përshëndetëse ka theksuar:

Të nderuar të ftuar!

Të nderuar veteranë të policisë!

Të nderuar familjarë të rënëve në krye të detyrës!

Të nderuar pjesmarrës!

Jemi mbledhur këtu sot për të festuar 96 vjetorin e Policisë së Shtetit Shqiptar.

Si çdo strukturë tjetër e shtetit shqiptar, edhe Policia e shtetit ka historikun e saj.

Krijimi i Policisë së shtetit zë fill më 13 janar të vitit 1913. Me çlirimin e Shqipërisë u krijuar forcat e disiplinës dhe të ndjekjes. Miratimi i ligjit të ri “Për Policinë e shtetit” i dha një shtytje përpara përkushtimit dhe rritjes së cilësisë së punës së Policisë së Shtetit, shpalli bazën ligjore për mbrojtjen e saj, përmirësoi në mënyrë të dukshme kuadrin ligjor. Në vitet e fundit, u ndërtuan lidhje të ngushta pune dhe bashkëpunimi me policitë e vendeve fqinje dhe vendeve perëndimore si: ICITAP, MAPE, INTER- FORZE, etj.

Me ndihmën e këtyre misioneve janë trainuar pothuajse 100% e efektivave të policisë shqiptare, si brënda dhe jashtë Shqipërisë.

Historia e Policisë shqiptare është shkruar jo vetëm e sakrificat e brezave të tërë që kanë milituar në të, por edhe me gjakun e 213 punonjësve të policisë të vrarë në krye të detyrës, 105 prej të cilëve të shpallur dëshmorë, si dhe 228 të plagusurve në krye të detyrës. Pjesë e këtij historiku është edhe efektivi i Komisariatit të Policisë së Mirditës, i cili vazhdimisht ka punuar për të mbrojtur të drejtat dhe liritë e qytetarëve, ka luftuar në vazhdimësi e dhëmb për dhëmb me krimin dhe kriminelët.

Ne sot kujtojmë me respekt të thellë kolegët tanë që dhanë jetën në luftë kundër krimit, si oficeri i policisë Ndue Kaza, punonjësi i policisë Gjon Paçuku, punonjësi i policisë Nikolin Tusha (Melyshi), inspektori i policisë së rendit Fran Bardhok Lleshi, si dhe punonjësin e polocisë së grupit të gatshëm Fran Kaçorri, të cilët ranë në krye të detyrës.

I përjetshëm qoftë kujtimi i tyre.

Edhe një hetë mirëse keni ardhur të gëzuar Festën e Policisë.

Festa ka vijuar me trokitjen e gotave në një kokteil fesiv, ndërkohë që n/prefekti z. Gjon Pjetri pasi ka falenderuar për ftesën i ka uruar gjithë efektivat për ditën Policisë. Ai ka evidentuar faktin se bashkëpunimi me pushtetin vendor është mjaft i rëndësishëm për një efikasitet të policisë. Z. Gjon Pjetri ka falenderuar familjet e policëve të vrarë në krye të detyrës duke i siguruar ata se shteti gjithnjë ka qënë dhe do të jetë në mbështetje të tyre.

Kryetari i bashkisë z. Gjon Dedaj në përshëndetjen e tij tha se policia si institucion ngrihet mbi sakrificën njerëzore, pa përjashtuar edhe humbjen e jetëve. Ne si qytetarë kërkojmë shumë nga një polic, por japim shumë pak për ta. Duke evidentuar faktin se Mirdita në përgjithësi është një zonë e qetë dhe pa shumë konflikte, z. Dedaj tha se mirditorët janë pjesë e mençurisë së këtij vëndi.

Në këtë festë kanë përshëndetur edhe veterani i policisë z. Preng Gjergji si edhe drejtori i rrugëve z. Preng Toma. Festa ka vijuar më gjatë, ndërkohë që urimi për ditën e festës së policisë ka qënë kryefjala e kësaj dite.

A. Ndoja