Fesfolk 2009, ansambli “Mirdita” gati për konkurim.

  Ansambli “Mirdita”, falë kontributit financiar të bashkisë Rrëshen, ka mundur të organizohet në kohë rekord për t’u paraqitur para jurisë së Ministrisë së Kulturës, Rinisë, Turizmit dhe Sporteve, më 28 korrik në Lezhë. Kështu prej 15 ditësh, nën drejtimin e drejtorit artistik Gjergj Marku dhe udhëheqësit artistik, muzikantit Mark Gjoka, artistët e këtij ansambli arritën të kompaktësoheshin për të krijuar një program interesant pas mbledhjes së nektarit në burim nga bartësit popullorë të folkut, duke sjellë risi në shumë elementë.

Përzgjedhja konsiston në disa elementë që nga muzika, sidomos kënga akapelo karakteristike, balada, trio, grupi i vajzave, grupi emblematik i burrave etj, po ashtu për instrumentët ku kryesori mbetet ciftelia, sharkia, por dhe fyelli, fanciku, bilbili, lahuta, guralecët, linget dhe kranet e natyrës.

Improvizimi i disa ritualeve vjen si risi, që nga ajo që sjell ritin e buzmit, shtrunga e cobanit etj, duke sjellë momente interesante të improvizuara përmes një dasme po tradicionale. Veshjet janë një pikë tjetër e fortë e grupit kësaj rradhe, dhe për këtë janë stilizuar rroba të hershme, duke bërë kujdes në ruajtjen e autencitetit. Sa i përket interpretimit është bërë kujdes të përzgjidhet dhe elementi i ri krahas atij me eksperiencë, për të përshtatur zërin dhe natyrën tipologjike, ndërsa vjen e thjeshtëzuar vallja pa patur ndonjë pretendim të vecantë.

Sonte grupi artistik folklorik “Mirdita” performoi dhe proven gjenerale para një publiku të Rrëshenit për të vazhduar konkurimin ditën e nesërme në Lezhë.

PROGRAMI

I GRUPIT FOLKLORIK “MIRDITA”

28 korrik 2009

1. Kengë Majëkrahu. „Mirse te gjejme i zoti i shpisë“. –Këndon Nikollë Preci.

 2. „Moj nusja e Mirdites“. Këndon Paulin Luli.

3. „Valle humoristike e plakut dhe e plakës“. Nikollë Preci, Drane Ndrelala.

4. „Shtrunga e Stanit“, një motiv interesant baritor, i mbledhur në zonën e Kurbneshit, kënduar nga Elsa Mrruku dhe Rezarta Kola.

Në shtrungë Besim Lekgega, shoqëron me fancik Mark Gjoni, në këmborë Aurel Përkeqi.

5. „Mos harro gjuhën e nanës“,-motiv i mbledhur në Kacinar.

Si një amanet për gjuhën e nënës vijnë për ta paraqitur me shumë emocion këtë këngë nënë e bijë që tashmë jetojnë si emigrante në Angli, Mirdita Dedgjonaj dhe vajza e saj Eliza Deddgjonaj.

6. „Rituali i Buzmit“,- këngë me motiv burimor pagan i mbledhur në Fan, një festë simbol që na sjellë ritin e shtimit të bereqetit. Këtë na e tregon dhe inskenimi i tanishëm, duke përfytyruar një arë ku shtrohej sofra dhe paralel me të ndizej një zjarr ku digjej buzmi, i përbërë nga një degë arre. Rrotull zjarrit këndoheshin fjalët e këngës shoqëruar me goditjet e shkopinjëve të arrës.

Këndon Tone Gjoka, Arbër Kola dhe grupi i vajzave.

  7. „Guri i Kshetës“- Një këngë me burim mitologjik, legjendë që i shtrin gjurmët deri në ditët e sotme, ku gjendet një gur në lumin Fan të zonës së Fanit e ku mendohet të ketë qëndruar Ksheta.

Këndon Prena Beleshi, shoqëron në lahute Pjetër Matusha.

8. Grupi emblematik i Mirditës, nuk kishte si të harronte kësaj radhe edhe Rrugën e Kombit, këtë arterie që po bën realitet lidhjen e pjesëve të ndarë padrejtësisht të një kombi, një rrugë që po lidh amanetin e gjeneratave shekuj pas shekuj.

70 km të kësaj rrugë simfoni nëpër Mirditën e qëndresës, të trimërisë, bujarisë, e kulturës kanë nxitur bartësit tanë për të sjellë një krijim autentik, për ta shpalosur me shumë origjinalitet nëpër motivet e këngës mirditore “RRUGA E KOMBIT”.

Këndon Kol Zefi, dhe grupi karakteristik i burrave.

  9. „Balada e Nuses“, -motiv i mbledhur në Orosh. Këndon Enida Përlala, Elsa Mrruku dhe Rezarta Kola.

  10. „Një tufë pëllumbash të Bardhë“, -motiv lirik i mbledhur në Katundin e Vjetër Rubik, vjen nën interpretimin e trios, solist Anton Gjoka.

  11. “Larg tri ditë e larg tri netë“. -Motiv i mbledhur në Kacinar. Këndon Arinda Gjoni, në fyell Mark Gjoni.

  12. “Vajze mirdite”,  Bardhok Deda.

  13. “Këngë humoristike”. -Motiv i mbledhur në Kodër Rrëshen. Këndon Nikolle Preci.

  14. “Me t’marr nuse me duvak”, -motiv i mbledhur në Malaj. Këndon Kastriot Kola dhe treshja e vajzave.

  Përgatiti: A.Ndoja