Corpi i Krishtit…

I nderuar Ipeshkvi ynë Cristoforo PALMIERI!

Fortë të nderuara motra misionare në Mirditë!

Të nderuar qytetare e qytetarë të Bashkisë Rrëshen!

Të nderuar të pranishëm vellezër e motra të bashkuar në KRISHT !

     Ne përmbyllim sëbashku sot, një javë festive për atë që, në fillimet e këtij mandati Dioqeza Rrëshen dhe Bashkia Rrëshen, bashkërisht të bindur se Krishtërimi është ngritur gjithnjë mbi një bazë apostolike, nisëm të festojmë publikisht Corpin e Krishtit me një përpjekje modeste ne 2007-n  ndersa te dielën e 1-Qershorit-2008 shpallëm moton civilo-fetare “ Te festosh ka vend për të gjithë”.

       Të bashkuar për rreth lashtësisë së besimit katolik, në brendësi të MIRDITES ,  kësaj krahine ku jemi, kjo festë është shprehje ose dëshmi, se të bashkuar në Krisht ne do të vazhdojmë të banojmë këtë qytet dhe këtë trevë panvarësisht ndryshimeve politiko-sociale, duke përmirësuar nga dita në ditë cilësinë jetës, duke rritur kapacitetet urbane ndaj kjo ditë e sotme është edhe një përpjekje për të vrarë turpin se kësaj Bashkie i mungon perfeksioni...

Edhe se përballjet politike a formimet e ndryshme ideologjike kane mbajtur ende jashtë kësaj feste mjaft prej aktorëve civil, deri dhe grupe këshilltarësh në këtë Bashki, ish-pronar tokash, që harrojnë se çmimin e tokës së mbetur e rrit prania jonë këtu, nuk kanë mbërritur ende individë të vetëquajtur intelektual jo ateistë, disa prej të cilëve, jo cuditërisht, këto ditë kanë harxhuar shumë kohë të ndalin lojën e fëmijëve në këtë shesh dhe të dalin në mbrojtje të kësaj feste, a thua se “tituj të tillë pronësie” ndahen përreth këtij sheshi, i cili rezulton jo vetëm produkt diktature dhe duartrokitjesh vetëvrasëse,  por dhe sheshi përreth të cilit janë realizuar vendimet e ndalimit dhe dënimeve, e persekucioneve më drastike të klerit dhe të kundërshtarëve politike , duke deformuar jetën e prindërve të fëmijëve që po luajnë këto ditë... në  këtë javë joabsurde ,  të mbrojtur tërësisht nga mundesia e sekuestros se ligjshme ne rast penalitesh a anonimati të ofertuesit te lodrave.

Gjej rastin të shpreh publikisht se: vec të qenit një premtim elektoral, për t`i bërë fëmijët tanë të barabartë në shanse me moshatarët e qyteteve të mëdha, zënia e përkohshme e  sheshit është një kapërcim i vullnetshëm për të mbërritur tek fëmijët pikërisht më 1 Qershor, Ditën Ndërkombëtare të tyre, dhe për të treguar se ata që ndalen apo që nuk e ndihmuan Kryetarin e sotëm të Bashkisë të vendosë statujën e të madhes Nënë Tereza në RRËSHEN, mund të fitojnë për nje çast, por ngecin kur i përballim haptazi, pasi e ardhmja jonë ka fytyrën e fëmijëve tanë dhe të Jezusit, ndaj favoret në lodrat për fëmijët e festa për Corpin e Krishtit, na thonë se më shumë se për hapësira fizike kemi nevojë për bashkim shpirtëror sikurse deshi e  na mësoi Nena Tereze.

Kësisoj, kur informacioni mbi ekzistencën e bashkësive të krishtera në Shqipëri gjatë periudhës pasapostolike, për fat të keq, duket se është ende i errët, ne shpallim sot se duhet që në ditët që vijnë, të organizojmë Forume e Konferenca trajtesash shkencore, ndërsa të gjithë e pranojmë se Jezusin e paditën me akuza të rreme, e kryqëzuan sëbashku me hajdutë të rëndomtë dhe e varrosën, por nuk mundën t’ia ndalnin Ringjalljen, ndërsa ata që nuk bëjnë asgjë, vec vjedhjes se ideve mbeten në dhe’ ose  po struken pa mundur të jenë pjesë e këtij procesioni...

Në këtë shesh, me emrin e Abatit DOÇI, klerikut që nderoi Mirditën dhe Shqipërinë, ne lutemi dhe kundrojmë me Jezusin dhe, kjo javë feste  na jep më shumë mundësi të bashkojmë forcat tona shpirtërore, dhe kjo   e dielë  Qershori 2010 , është një përpjekje më shumë që jeta jonë të bëhet shëmbëllesë e jetës së Hyjit, dhe të shprehë se mirditorët janë gjithnjë të gatshëm të takohen si të gjallët, në heshtje dhe me nderim për fenë e tyre, nga ku ne gjejmë energji të reja qytetarie dhe bashkimin e vërtetë, solidaritet i cili na ndihmon të bëjmë punë më të mbara, të përafrojmë mendimet, inisiativat dhe lutjet tona.

Në përpjekjen tonë për të eksploruar mbetjet e vjetra dhe të reja të ndërgjegjes, Bashkia dhe Dioqeza shpallin nevojën për Komunikim, për   Dashuri, për Vullnetarizëm dhe, se askurrë, më shumë, se në Corpin e Krishtit, në një festë të tillë, sëbashku me Ipeshkvin tonë Cristoforo, motrat  murgesha misionare, vullnetarët e Korpusit të Paqes, ne bashkojmë sot këto vlera që Mirdita arkeologjike, historike , etnografike dhe e sotme ia ofron secilit që e banon dhe viziton atë.

Mirdita kulturore na thotë se mbeti e bashkuar në Krisht pavarsisht se e coptuan territorialisht, Mirdita na thotë se  mirditorët e ruajtën besimin katolik pamvarësisht diktaturave të cdo lloji, dhe jo rastësisht mbetet komuniteti më i ngjashëm me Jezusin, që ishte i mënjanuar, krejt vetëm, duke i kaluar netët në heshtje dhe me uratë në lavdërim të Atit, lavdërimi më i vjetër dhe më autentik…

Ja pse, ne, duhet të ruajmë e zbukurojmë mjedisin territorial-politik-social, të lëmë për një çast karriket e lokaleve a lojrave të fatit dhe të prirë nga Ipeshkvi ynë të mësojmë e të praktikojmë sëbashku të nderojmë origjinën tonë, duke zbritur me fjalët e Zotit në zemrat tona si e vetmja mënyrë për t`u rinuar dhe shndërruar me besimin, duke fituar një perceptim bashkëkohor për jetën ku Feja – Lutja - Dashuria – Heshtja, përballin e sfidojnë ç`do krizë ekonomike, ç`do lëkundje politike dhe pengojnë të pasqyrohet kjo në organet kishtare dhe tek prijësit tanë fetar.

Teksa jetojmë një kohë dixhitale, ku dhe shtrembërimet dhe të pavërtetat, kanë mundësi për më shumë terren, kjo është ditë lutje  e jona për të gjithë vëllezërit dhe motrat tona emigrante, këtij kontigjenti të aftë të përballet dhe të integrohet kryesisht në zonën ku qytetërimi perëndimor dhe besimi i krishterë bashkjetuan dhe dolën fitues duke u bërë të kërkuar për ne shqiptarët. Kjo është një ditë për të kujtuar se sot, në këtë Bashki ka familje në çadra, për shkak të rrëshqitjeve të tokës dhe fatkeqësive te djegies, kemi lumenj e përrenj që na turpërojnë pavarësisht ndërhyrjes së Bashkisë dhe partneritetit për pallate të larta vetëm në anë të tyre, shtretërit e tyre të ndotur na dëmtojnë shëndetin tonë urban. Të gjitha këto shqetësime komunitare janë shumë herë më të mëdha se manovrat për ndalimin i lojrave të fëmijëve apo ndalimin e hyrje-daljeve të tjera të qytetit në Autostradë , Bulevardin e ri të shqiptarëve Rreshen -Kalimash...

Në këto kushte, kur kërkohen zgjidhje përtej kapaciteteve buxhetore bashkiake, përtej aftësive të tashme të administratës dhe të Kryetarit të Bashkisë, formuloj sot një falenderim të vecantë për të gjithë ata që krijuan dhe do ruajnë lidhjet me Bashkinë, përmes takimeve publike, përmes kësaj feste, dhe vecanërisht, përmes faqes së internetit www.bashkiarreshen.com dhe i ftoj grupet e interesit, të diplomuarit, nënpunës ose jo, gjithë bizneset, që përmes vërejtjeve, dhe ofertave të pakërkuara të ndihmojnë mirorientimin e administratës bashkiake duke kontribuar për zgjidhje sa më të shpejta, për përmirësimin e shërbimeve  dhe investimeve në minimizim të varfërisë.

Kjo faqe interneti konsideruar si “Kuvendi ynë elektronik“, në një kohë kur kordinimi i kontakteve fizike është jo i lehtë, mbetet komunikim me efikas që do evidentojë zgjidhje dhe qytetari e do sjellë fitim kohe, por, dhe do të kontribuojë të mbushim Katedralen dhe sheshin (këtë të fundit jo vetëm për të dëgjuar partiakë diktatorë ose jo) dhe do rrisë numrin e lexuesve të c`do lloji të historisë së Mirditës, të katolicizmit, të bashkëjetesës fetare dhe mundësive të zhvillimit të të gjithë Dioqezes.

Festa jonë e sotme është një matës i mbulesës demokratike, për mundësitë e zgjidhjes paqësore të problemeve të perspektivës tonë europiane, është një mision verifikues i politikave publike dhe shkallës së besimit katolik, është një paraqitje imazhi jo vetëm në nivel lokal por dhe dioqezan, është një kornizë sociale mbrojtëse ndaj krizave  të sotme dhe të mundshme në të ardhmen,  është një mundësi stabiliteti dhe pjekje e mendimit mirditor për normalizimin e marrëdhënieve të përgjithshme në bashkim përgjegjësish qytetare për ndërtimin e një sistemi ekonomik të tregut të lirë dhe të hapur, është një shpallje kompromisesh ku të vegjlit thonë fjalën e tyre për shtëpinë e përbashkët të lirisë, të paqes, të demokracisë dhe zhvillimit lokal, rajonal, global.

Të nderuar vëllezër e motra të bashkuar në KRISHT !

 Më lejoni që, në emrin Tuaj, të falenderoj Shërbimet e Policisë së Shtetit për rritjen e kujdesit dhe shkallës së sigurisë publike për këtë ditë dhe për nderhyrjet efikase në këtë periudhë dhe në vazhdim...

Më lejoni të shpreh se standarti i kësaj feste do t`i shtohet standarteve të tjera të bashkimit dhe të të jetuarit tonë në harmoni dhe paqe sociale...

Më lejoni të shpreh besimin se kjo ditë do vijoj të festohet dhe në mandatin tjetër bashkiak, ndërsa emocionet pozitive të kësaj ditë feste më shtyjnë t`ju siguroj se edhe periudhës së mbetur të këtij mandati që Ju më besuat, do t`i mungojnë konflikti, pazaret dhe servilizmi im personal.

Ja perse ju ftoj të vazhdojmë sëbashku, në bindjen se Festa e Corpit të Krishtit,  teksa bashkon dukshëm lirinë e veprimit politik dhe atij fetar, është një zgjedhje që jo vetëm nuk ju mbivendoset ditë-festave të njësive vendore  përreth, por krijon kushtet që Mirdita kulturore, më shumë se shtatë njësitë e sotme vendore, të arrijë progresin tërësor, zhvillimin infrastrukturor edhe drejt , Ungrejt , Burrelit dhe Lurës si dhe të vijojë bashkëjetesën në diversitet politik, ndaj ftoj autoritetet qytetare të marrin barrën e vazhdimit të luftës politike dhe rivalitetit për karrike, ndërkohë që kjo ditë e Krishtit të kudondodhur do të na hapë mendjen e ne duhet të kuptojmë më mirë momentin dhe mundësitë e zhvillimit.

Për shumë mot festën e Corpit të Krishtit!

Krishti ju shpërbleftë Ju dhe familjet tuaja!

                  Ju faleminderit!

                                                                              / Gjon DEDAJ /

                                                                      Kryetari Bashkisë, RRËSHEN