Koncert homazh për legjendën e folkut mirditor Fran Vorfi.

“Është legjendë e rrallë e të kënduarit të këngës burimore të Veriut. i paarritshëm…Nuk mund t’i këndonim kurrë si ai këngët e atyre viseve!”. Këto janë fjalët e Hysni Zelës në një bisedë të para katër viteve në një koncert të Ansamblit të Shtetit në Mirditë

RRESHEN. Departamenti i kulturës në bashkinë Rrëshen dhe Qendra kulturore organizuan një koncert mirënjohjeje kushtuar legjendës së këngës burimore mirditore, Fran Vorfi, i cili prej një viti nuk është midis nesh.

 I njohur si prijësi i grupit të burrave të Mirditës, këngëtari, krijuesi dhe bartësi i vlerave burimore të kësaj krahine nga më autentiket, Fran Vorfi ka lënë gjurmë në tërë artin burimor shqiptar, dhe kjo u kujtua më së miri pasditen e shtunë.

“Është legjendë e rrallë e të kënduarit të këngës burimore të Veriut. i paarritshëm…Nuk mund t’i këndonim kurrë si ai këngët e atyre viseve!”. Këto janë fjalët e Hysni Zelës në një bisedë të para katër viteve në një koncert të Ansamblit të Shtetit në Mirditë. Për një vokal të rrallë e kanë vlerësuar mjeshtra të muzikës shqiptare dhe studiues të folkut.

 Ai qe dhe “primoja” i formacionit të njohur “Grupi i Burrave të Mirditës”, i cili u kthye në një emblemë të festivaleve folkorike përmbi 40 vite me rradhë.

 Këngëtari u shua në moshën 65 vjeçare duke lënë pas një pasuri. të vyer të folkut burimor, këngëve epike dhe lirike, por dhe në interpretimet e tij në teatër, estradë, bandën muzikore, koreografi si dhe krijues i tërë zhanreve thuajse.

 Më e keqja, se nga krijimtaria e tij muzikore dhe interpretative është “arkivuar” në arshivat e mykura të RTSH-së, por pa bërë të mundur nxjerrjen e tyre prej aparaturave të vjetra inçizuese.

 Janë të shënuar që nga këngët e para “S’ka pas gzim ma t’madh Mirdita”, “Dje Mirdita…”, apo kënga e grupit të burrave “Shqipninë tonë me e ba kala”, një këngë që tundi bedenat e kalësë së Gjirokastrës në vitin 1973. Por këngëtari epik zbriste natyrshëm tek lirikat e mrekullueshme, ndër të cilat shënohet “Oj mollë e kuqe!”, me këngëtaren e talentuar Gjyste Ceka, e cila në duetin me Anton Gjokën ne kete koncert solli emocionet e para shumë viteve të duetit Vorfi-Ceka. Ishte për tu shënuar intepretimi virtuoz i orkestrantëve Llesh Lleshi, Mark Deda, Ilir Simoni, Mark Gjoni, Ndue Përlala e të tjerë. Ashtu si dhe këngët e kënduara nga Tone Gjoka “Zambakë Kosove”, Arinda Gjoni apo Gjela Duka.

 Në 1978 ka një shpërthim të grupit këngëtar të Mirditës nën drejtimin e kantautorit të njohur të viteve ’70 Dorian Nini, fati i të cilit ishte përcaktuar të punonte në Rrëshen prej “shkarjes” në festivalin e 11-të të këngës në RTSH.

 Ansambli vokal “Mirdita” përcaktohet si një nga grupet më unikalë në tërë festivalet kombëtare në Gjirokastër, një grup tejet i unifikuar që mbajti peshë për 30 minuta tërë publikun artdashës. “Kënga e Mic Sokolit” ishte bërë lajtmotiv i këtij festivali dhe grupi i Mirditës do të kërkohej gjithandej shesheve të Gjirokastrës. Kjo këngë u risoll në skenë nga Mrikë Trumshi dhe grupi i burrave nën një interpretim të shkëlqyer.

 Padyshim, në mes artistëve të mrekullueshëm mirditorë Fran Vorfi mbetet legjendë e këngës burimore të Mirditës dhe më tej, thanë shokët e tij këngëtarë që nga Kol Zefi, Nikollë Preci, Fran Preci, Gjin Dona, Prena Beleshi, Kastriot Kola e të tjerë, por asnjëherë i vlerësuar për shkak të biografisë, dhe i harruar këto vite, deri sa u shuajt në moshën 65 vjeçare, dhe sot e asaj dite i pavlerësuar ende si duhet në Mirditë. Ata i interpretuan magjishem kujtimet e tyre kur kendonin ne nje skene me te.

 Në shown artistik të organizuar në sallën e pallatit të kulturës, gjithçka është perceptuar si një retrospektivë e kujdesëshme që nga këngët e para të kënduara nga këngëtari Vorfi, zëra origjinalë të para 30 viteve në festfolket kombëtare dhe këngë të kënduara nga më të rinjtë që nga fëmijët, që ishin dhe ndër amanetet e këtij këngëtari si dhe formacioni vokal i ringritur, që ka interpretuar disa nga motivet më të bukura të prurjeve të anbsamblit “Mirdita” ndër vite.

 Ka patur këngë për Kosovën të kënduara këtu e 30 vite nga këngëtari Vorfi, që duket se kanë qenë si një lloj ndjeshmërie artistike e asaj që do të ngjiste pas kaq vitesh me shpalljen e Pavarësisë së Kosovës martire.

 I ftuar në këtë koncert të prezantuar nga drejtori i qendrës kulturore Gjergj Marku, ka qenë dhe një pjesë e Ansamblit të Shtetit, ku janë kënduar këngë arbëreshe, këngë për Çamërinë, ndërsa Hysni Zela në këngën me vargje të Azem Shkrelit ka çuar peshë sallën e tejmbushur me dashamirës të artit burimor, mes të cilëve shumë mosha të reja.

 Në program janë shënuar dhe disa valle me motive mirditore si dhe vallja: “O sa mirë me qenë shqiptar”, nën koreografinë e Fran Gjergjit, interpretuar nga valltarët e Rubikut, duhet shënuar këtu dhe skenografia e piktorit Gjok Pepa dhe teknika fonike e transmetuese nga Lin Kiku dhe Saimir Gjoka.

 Kanë sjellë emocione dhe interpretimet e virtuozëve të vegjël nën drejtimin e muzikantit pasionant Kol Picaku, njëri nga ish-bashkëkohësit në gjurmët e artit me këngëtarin legjendë.

 Dhe finishi i programit ka sjellë një moment inkandeshent në sallë nga jonet magjike të këngës së kantautorit Mark Gjoka, i cili ishte dhe udhëheqësi artistik i koncertit, titulluar: “S’të harron Mirdita kurrë”, kushtuar këngëtarit legjendë Fran Vorfi.

 Pos veprimtarisë artistike, këngës kryesisht dhe një albumi fotografik nga ansambli ndër vite të projektuar në monitor të mëdhenj, kanë përshëndetur kryebashkiaku Gjon Dedaj dhe poeti i njohur Viktor Gjikolaj si dhe intervista me Bardhe Pjetri një nga më të moshuarat pjesëmarrëse në festivale, ndërkaq epilogu ka qenë në një kualitet të lartë nën interpretimin e Ismet Zusit, drejtor i qendrës kulturore Lezhë, të një poezie për Fran Vorfin, shkruar enkas për këtë ditë nga poeti i shquar mirditor Gjok Beci, mik dhe bashkëpunëtor në krijimtarinë artistike për gati një gjysëm shekulli me artistin e famshëm dhe ansamblin emblematik Mirdita.

   Po këtë ditë është bërë promovimi i librit të Bardhok Sulejmani, ish drejtues i këtij institucioni nën titullin: “Fran Vorfi, bilbili i këngës mirditore”. Ky promovim në një nga ambientet e qendrës kulturore Rrëshen është drejtuart nga kritiku letrar Bardhok Pulaj. E ndërkaq në hyrje te hollit te pallatit te kultures nën këto motiv eshte vendosur një punim artistik derdhur në bronz me portretin e këngëtarit, realizuar me mjeshtëri nga studenti i Akademisë së Artit, Leonard Lekgega.

  Para se të fillonte ky show artistik mirënjohës për këngëtarin Fran Vorfi, janë bërë homazhe familjare ku përfaqësues të ansamblit “Mirdita” pranë qendrës kulturore Rrëshen kanë lënë një tufë me lule pranë varrit të tij në emër të gjithë ansamblit dhe njerëzve të artit e kulturës.

Ndërsa në finish të koncertit supriza e ka patur emrin Mark Gjoka, që ka sjellë këngën: “S’të harron Mirdita kurrë”, kushtuar Fran Vorfit, me vargje të poetit Viktor Gjikolaj, një nga krijimet më të bukura dhe shumë emocionuese e përcjellë për minuta të tëra  në këmbë nga publiku. Ka qenë vajza e këngëtarit që në emër të familjes, i ka dhuruar një tufë me lule në skenë këngëtarëve dhe artistëve të ansamblit, që i realizuan një nga koncertet më të bukura në mirënjohje të prindit të tyre.

 Pas koncertit familja ka shtruar dhe një darkë me artistët, ku ishin dhe mysafirët e ansamblit të shtetit, ku u fol gjatë dhe u kënduan këngë të Franit nga artistët mirditorë dhe krenaria e artit burimor shqiptar të përpunuar, Hysni Zela me shokë.

A. Ndoja