“Antologji e mendimit të sotëm në Mirditë”

-Promovim i librit të autorit Gjon Marku në Lezhë-

    Në bibliotekën publike të Lezhës është promovuar libri “Antologji e mendimit të sotëm për Mirditën”, i autorit Gjon Marku, një përmbledhje librash të stilit të intervistave që autori nxjerr prej vitesh ku përfshihen 61 intervista me personalitete të kulturës,shkencëtarë,historianë,artistë,politikanë,pedagogë, profesorë të degëve të ndryshme të dijes e ekonomisë,ushtarakë,punonjës të mediave shqiptare dhe autorë të shquar të huaj. Një pjesë e madhe e të intervistuarve, personalitete të spikatura të kulturës dhe fushës së studimit në zonat e Veriut ishin pjesëmarrës në këtë promovim, ashtu si dhe shkrimtarë,poetë,gazetarë,punonjës të artit e kulturës nga qarku i Lezhë  si dhe autoritete vendore. Takimi është moderuar nga kritiku letrar Bardhok Pulaj.

Në fjalën e hapjes Gjergj Shyti, drejtor i bibliotekës Lezhë , i cili theksoj se autori na ka dhënë një vepër dinjitoze për Mirditën të llojit të vecantë, ai nuk është kursyer,lodhur e as ndalur rrugëtimesh apo duke shfletuar ndër shkrime e bibliografitë e të ftuarve për të na i kthyer më pas në personazhe të librit të vet.

Ahmet Osja, Mjeshtër i Madh, personazh i këtij libri, e ka quajtur këtë libër një instititucion,duke theksuar se gjinia e intervistës është bashkëkohore dhe këtu është realizuar mjeshtërisht. Mirdita e meriton këtë libër,dhe aq më tepër nga një autor si Gjon Marku që vjen me librin e 14-të të tij,duke sjellë një material në nivel të lartë profesional. Shumë prej të intervistuarve nuk jetojnë më, por kjo vepër do të jetë si pasaportë me vlerë për pasardhësit.

Akademik Mark Tirta, theksoj se përmes prurjeve të këtij libri vijnë një sërë figurash të njohura duke dhënë një kontribut të cmuar për Mirditën, historinë, dhe kulturën e saj. Në mes këtyre të intervistuarve janë figura të Kombit, elita supreme e kulturës sonë si Kadare,Agolli,Shuteriqi, Jup Kastrati, Mark Krasniqi, Rrok Mirdita etj, dhe kjo është meritë e autorit që ka mundur të realizojë intervista të bukura me ta,ashtu si dhe studiues të huaj si Peter Batërl e albanologë të tjerë. Përmes gojës së këtyre intelektualëve të shquar Mirdita vjen si një minierë e madhe e dëshmive historike.

Poeti dhe shkrimtari Ndoc Gjetja, duke analizuar veprën në fjalë, ka pëmendur punën e shkëlqyer që prej vitesh bëjnë poetët, shkrimtarët dhe studiuesit e Mirditës,duke i quajtur ata si ngjallës të shpirtit të Prend Docit. Këta bij të denjë të Mirditës po ringjallin shkrimin në këtë krahinë me emër në historinë dhe kulturën kombëtare ndaj meritojnë përgëzimet më të mira të të gjithëve.

Studiuesi Shefqet Hoxha, theksoj se autori Marku është një punëtor i vnjeshëm i letrave, këmbëngulës dhe sqimatar dhe vepra e fundit e tij është një gjete origjinale, ai ka mundur të grishë njerëz të mendjes e të dijes, të shkencës dhe të artit që të shprehen për vlerat historike të kësaj treve, për traditat dhe mendësinë e mirditasve të djeshëm dhe të sotëm. Me këtë vepër ai ka vijuar punën e nisur nga autorë të tjerë vendas dhe të huaj.

Willy Kamsi,studiuesi i njohur shkodran theksoi se kur përmendet emri Mirditë nuk ka shqiptar që të mos ndiej dicka që i dridhet në zemër e të mos i përsëritet në mendje. Pyetjes se cili ishte mendimi i djeshëm dhe i sotshëm për Mirditën është përpjeke t’i japë përgjigje autori përmes gojës së dijetarëve të fushave të ndryshme. Po të merreshin me rradhë do delshin faqe bukur të shumta me njoftime dore së parë, të gjitha landë për nji histori të Mirditës, ndër doke e zakone të saja, pasqyruese të karakterit e pse jo të inteligjencies së mirditorit që kurdoherë ka spikatë dhe kurdoherë e kanë dallue gjithë ata që i janë afrue dhe që kanë pasë të bajnë me ta.

Studiuesi i njohur shkodran Mentor Cuku tha se tri janë castet që të bien në sy në këtë vepër:

Së pari Mirdita përbën një emër të madh,një krahinë zëmadhe që bëri historinë e saj,që nxori njerz të shquar,të dalluar për temperamentin,karakterin dhe personalitetin e tyre.

Së dyti, për nga metodika,është përdor një metodikë novatore duke nxjerrë në pah historinë dhe realitetin e kësaj krahine.

Së treti, autori që na vjen në një pozicion krejt të vecantë, një zë premtues në radhët e zërave të rinj të letrave shqipe,duke ndërtuar një enciklopedi për Mirditën.

Kryebashkiaku i Rrëshenit Gjon Dedaj, duke përshëndetur theksoj se Mirdita është një vend ku ia vlen të jetohet, të hulumtohet duke përbërë një lëndë-kumt për studiues vendas dhe të huaj për nga historitë e saj të arkivuara, por që i bëjnë nder Shqipërisë. Rasti i një vepre të tillë,është fat për të thënë se aktorët e këtij procesi ecin bashkë në Mirditë,dhe kanë cfarë të shpalosin edhe në të ardhmen për Mirditën dhe Kombin.

Takimin e përshëndeti dhe studiuesi Ndue Dedaj,duke dhënë një pasqyrë të botimeve që vijojnë në Mirditë,një traditë tashmë e përvijuar nga autorë serizoë si autori në fjalë. Por Mirdita në vetvete paraqet një thesar për tu gjurmuar ndaj na del detyrë të thellohemi dhe ta pasurojmë bibliotekën e  saj në shërbim të historisë dhe kulturës së vendit.

Përshëndetën dhe pjesëmarrës të tjerë si Mark Mesuli, Viktor Gjikolaj, Lek Shtinja e të tjerë.

Ndërsa këtë takim të bukur dhe impresionues e përshëndeti me një këngë kanautori Mark Gjoka për të kaluar më pastaj një një kokteil dhe biseda të lirshme e shkembime librash në mes të pranishmëve në këtë event kultural.

Përgatiti: Gjergj Marku