Shëmbet përfundimisht “muri” ndarës mes Tiranës dhe PriShtinës. Tuneli i Thirrës bëhet i kalueshëm në të dy anët E TIJ.

 Fan, Mirditë. Qindra automjete në të cilët spikasnin edhe autobuzët  kanë çarë rrugët e Mirditës për të qenë prezent në ngjarjen tashmë historike, atë të finalizimit të bashkimit të dy anëve të një tuneli i cili është vepra me e rëndësishme e autostradës Durrës – Kukës. Pikërisht më 27 maj, mekanizatorët dhe specialistët e Bechtel-Enka të cilët për rreth dy vite punuan pa pushim, arritën të takoheshin në thellësitë e malit të lartë në vëndin e quajtur “Qafa e Kumbullës”. Ndërsa për katër ditë me rradhë është punuar intensivisht për çimentimin e faqeve të tunelit deri në pikën e takimit të tyre, ndërkohë që është improvizuar një mur, shëmbja e të cilit do të shënonte edhe hapjen zyrtare të këtij tuneli. Njerëzit që udhëtojnë në drejtim të Kalimashit janë të shumtë dhe ndalojnë në shumë vënde për të parë mrekullinë e luginës së Fanit të vogël që buron në bjeshkët e thella të kësaj treve. Të gjithë janë të lumtur se do të jenë prezent në eveniment historik, por edhe ekonomik. Në zërat e zhurmshëm dallohet lehtë se vizitorët e kësaj dite në komunën e Fanit në Mirditë, janë nga të gjitha trevat shqiptare, nga Saranda po Shkodra, nga Shkupi e Prishtina, nga Ulqini e Dibra e madhe. Por ka edhe të tjerë nga emigracioni. Tuneli i shumë përfolur shënon edhe hapin më të rëndësishëm në finalizimin e ndërtimit të kësaj rruge. Një pjesë e madhe vizitorësh janë edhe nga zona e Mirditës ku rruga përshkon një gjatësi të konsiderueshme. Në krye të të tyre kanë qënë drejtuesit lokalë Gjon Deda, Aleksander Lala, Kastriot Ndoji, Gjergj Prenga, etj.

Ora 12 sheshi para hyrjes së tunelit në anën e Thirrës së Fanit është zbukuruar si në një ditë feste. Dhjetra flamuj të Shqipërisë, Kosovës, NATO-s BE-së etj valëviten nën tingujt e këngëve. Qindra të pranishëm kanë shpërthyer në duartrokitje teksa kryeministri Sali Berisha ka zbritur nga një helikpter për të mbërritur në sheshin pra hyrjes së tunelit. Me te njeten menyre ka mberritur edhe  kryetarja e Kuvendit Jozefina Topalli. Më pare, në rrugë tokësore në këtë shesh kanë mbërritur Ministri i Jashtëm  Lulzim Basha, Ministri i Punëve Publike, Transporteve dhe Telekomunikacionit, Sokol Olldashi, Ministrja e Integrimit Majlinda Bregu, si dhe anëtarë të tjerë të kabinetit qeveritar dhe drejtues vendorë. Ndërsa  sapo kryeministri Sali Berisha është përshëndetur shumë shkurt me të pranishmit, është futur në tunel për të përshkuar rreth 2. 7 km ku gjendej ndarja e përkohshme mes dy anëve të tunelit. Në anën tjetër gjendeshin kryemistri i Kosovës z. Hashim Thaqi i shoqëruar nga Zëvendëskryeministri Hajredin Kuqi, Ministri i Jashtëm Skënder Hyseni, Ministri i Transporteve Fatmir Limaj, anëtarë të qeverisë, e deputetë të parlamentit të Kosovës.

Në mesin e tunelit drejtuesit e Beachtel Enka nuk harrojnë të zbatojnë me përpikmeri të gjitha rregullat e sigurimit teknik. Edhe pse kjo pengon disi protokollin, e madje zgjat disi minutat e shumë pritura, të gjithë mirkuptojnë këmbënguljen e tyre, pasi falë këtyre rregullave standarte sigurie, gjatë ndërtimit të këtij tuneli nuk është shënuar asnjë viktimë.

Kryeminstri Berisha i shoqëruar nga një mekanizator i kompanisë Bechtel-Enka, në pak minuta arrin të shëmbë përfundimisht murin ndarës të tunelit, ndërsa në momentin kur dy grupet arrijnë të shquajnë njëri-tjetrin duartrokitjet dhe brohoritjet shënojnë kulmin e tyre. Autoritete e Kosovës kalojnë përmes portës për tu takuar me kryemistrin e Shqipërisë, ndërkohë që tuneli gjigand për pak minuta është shumë i vogël nga prania e njerzve dhe autoriteteve më të larta të dy shteteve shqiptare. Në pak minuta dy kryemistrat dalin në shëshin para hyrjes së tunelit nga ana e Thirrës, ku edhe improvizojnë një konferencë shtypi.

Sali Berisha pasi u është drejtuar autorieteve më të larta që gjëndeshin në këtë ceremoni, deklaroi  se “Përjetuam realizimin e një prej ëndrrave më të bukura të shqiptarëve. Përjetuam shembjen jo të një muri por të një mali, përjetuam shembjen e pamundësisë. Para së gjithash ky është tuneli i bashkimit të kombit. Nuk ka male, e pengesa, asgjë që mund të ndalë as fizikisht e as shpirtërisht këtë komb”- tha kryeministri Berisha në fjalën e tij,  nga një podium të organizuar posaqërisht në dalje të tunelit.

 Duke e vlerësuar tunelin e Kalimashit si një nga kryeveprat në fushën e ndërtimit në Europë e më gjerë Berisha tha se tuneli bashkon jo vetëm shqiptarët por dhe rajonin.

“Sot inauguruam tunelin që bashkoi jo vetëm shqiptarët, por me shërbimet që ofron në fushën e transportit e qarkullimit i bashkon më shumë me rajonin, maqedonasit, serbët bullgarët. Tuneli, do të bëjë që brigjet e Shqipërisë e portet e saj ti shërbejnë jo vetëm shqiptarëve në Shqipëri e Kosovë, por të gjithë kombeve të rajonit”.

Gjatë fjalës së tij kryeministri pranoi se hapja e tunelit ka qenë e vështirë dhe e kushtetueshme, por “çmimi i tij është qindra herë më i vogël se vlera morale, se bashkimi që sjell mes njerëzve, dhe shërbimi që i bën qytetarëve, por edhe dalja në det që i jep Kosovës, por dhe fqinjëve të saj.” Në fund kryeministri falënderoi inxhinierët e punonjësit e Bechtel Enka që realizuan këtë projekt. “Ju do të jeni pjesë e historisë dhe përpjekjeve tona për modernitet”- tha kryeministri duke i shprehur mirënjohjen edhe ish ministrit të Transporteve Lulzim Basha dhe ministrit aktual Sokol Olldashi për përkushtimin që treguan në realizimin e këtij projekti dhe në “zbatimin me përpikmërit të udhëzimeve të kryeministrit”.

Menjëherë pas kryeministrit Sali Berisha e ka marrë fjalën Kryeministri kosovar Hashim Thaci i cili tha se sot është një ditë e madhe për të gjithë shqiptarët kudo që jetojnë. “Në Kalimash sjell mesazhin e përgëzimit të qeverisë së Kosovës për këtë kryevepër. Ekziston një lidhje shumë e fuqishme mes këtij rrugëtimi e Kosovës. Janë të shumta e të pallogaritshme herët kur unë me luftëtarët e mi e bëmë në këmbë këtë rrugë për lirinë e vendit. Sot Kosova e Shqipëria janë si kurrë ndonjëherë më pranë njëra tjetrës e do të afrohen më tepër. Ato janë pranë njëra tjetrës e kështu do jemi përgjithmonë. Kemi qenë të ndarë me shekuj, por kurrë nuk kemi qenë larg. Na ka nda historia, pa drejtësia, na ndanin malet, bjeshkët, sot të gjitha këto pengesa janë zevenëdësuar me punë, ideal dhe dhjetëra ura e tunele komunikimi” përfundoi kryeministri i Kosovës Hashim Thaçi.

Pas ceremonisë në sheshin para tunelit dy delegacionet kanë organizuar një drekë punë në qytetin e Kukësit.

Aleksandër Ndoja 31. maj 09