Nderim dhe Mirnjohje per policët e rënë në krye të detyrës.

 Nikolin Tusha (Melyshi)

 Vrasja në krye të detyrës e policit Nikolin Melyshi ndodhi më 31 tetor të vitit 1998. Kishte kaluar viti i mbrapshtë 97 dhe në komisariatin e Rrëshenit nuk u vra asnjë polic, e kjo më së shumti për faktin se komuniteti edhe në kulmin e të ashtuquajturës “çmenduri kolektive” e pa policin si njeriun që e kishte veshur këtë rrobë vetëm për nevoja ekonomike dhe aspak politike. Fatkeqësisht sipari i këtyre ngjarjeve të rënda edhe në Mirditë, do të hapej me vrasjen e policit në atë kohë 30 vjeçar, Nikolin Melyshi, nga fshati Kodër Rrëshen. Në të gjithë historinë e policisë së Mirditës kjo ishte viktima e dytë pas vrasjes së policit Ndue Kaza në qëndrën e qytetit të Rrëshenit, në vitin 94. Ngjarja e rëndë e cila tronditi rëndë të gjithë opinionin në Mirditë, ndodhi mbrëmjën e 31 tetorit të vitit 1998. Nikolin Melyshi kishte vetëm dy vjetë në rradhët e policisë së shtetit, ndërsa për vite me rradhë ai kishte punuar i veshur me uniformën e policisë ushtarake në Mirditë. Vrasja e tij ndodhi në një mbrëmje të qetë, kur teksa ishte në krye të detyrës një plumb i dalë aksidentalisht nga pistoleta e kolegut të tij të shërbimit të asaj nate, i merr jetën vetëm pak orë pas ngjarjes. Ishte momenti kur Nikolini sapo kishte përfunduar ngritjen e një shtëpie të re në fshatin e tij në Kodër Rrëshen, ndërsa djali i tij i vetëm, Eri sapo kiste mbushur 6 vjeç.

Gjon Paçuku

 Vritet në krye të detyrës më 27 qershor 2000

 Ka qënë paraditja e datës 28 qershor e vitit 2000 kur nga dritaret e vogla të dhomave të izolimit të komisariatit të Rrëshenit kanë buçitur nga një “urra” e fortë. Për mbi 15 banditë të cilët kishin tentuar të grabisnin me maska, sidomos shtetasit kosovarë që udhëtonin në drejtim të Prishtinës, nuk kishte lajm më të mirë. Gjon Paçuku, një ndër policët më aktivë në eleminimin e këtyre bandave që zanafillën e trimërimit të tyre e patën gjatë vitit 97, kishte ndërruar jetë në një atentat sa mizor aq edhe misterioz. Grupi gatshëm i policisë së Mirditës ishte sulmuar barbarisht më kallashnikovë edhe granata, por që të gjitha këto kishin prekur vetëm policin Gjon Paçuku i cili ndërroi jetë në vënd.

 Rreth orës 02 të natës njëri prej rojeve private të një parkingu në ambientet e ish SMT-së lajmëron zyrën e oficerit të rojes së policisë, se kishte mundur që të shquante disa silueta të rinjsh që po tentonin që të vidhnin pjesë nga automjet e parkuara brenda murit rrethues. I menjëhershëm ishte reagimi grupit të gatshëm në përbërje të cilit ishte edhe polici Gjon Paçuku. Duke menduar se kishin të bënin me vjedhës ordinerë ata parkojnë furgonin përballë portës së parkingut. Por nuk e kishin menduar aspak se ata kishin rënë në grackë, kur ndaj tyre  u derdh një arsenal i shumtë armësh ndaj tyre. Pas kësaj, furgoni i policisë rrikthehet në drejtim të spitalit me goma të shpuara nga plumbat, dhe më jetën e fikur të një polici ndër më aktivët e komisariatit.

Fran B. Lleshi

Medaljen e Mirënjohjes,

 Ka qenë 9 qershori i vitit 2004, kur një grup prej tre vetash i zënë pritë inspektorit të Rendit për komunën e Kaçinarit në Mirditë, Fran Lleshaj, duke e lënë të vdekur në vend së bashku me djalin e tij 15-vjeçar, Ervinin. Të gjithë ata që kanë punuar me Franin por edhe tjerë, që e kanë njohur Franin ndajne  të njëjtin mendim,  se ai ishte një qytetar i nderuar dhe  një punonjës policie  me kulture e   nivel të lartë profesional. Frani gëzonte cilesi të rralla morale. Ai ishte trim, i ndershëm dhe bujar, cilesi këto ,që ai i shfaqte  përditë me shokët dhe eproret duke u bërë shumë shpejt i dashur dhe i respektuar për të gjithë. Këto cilesi ai i shfaqi më së miri edhe në datën 9 qershor,  ku së bashku me djalin e tij ranë në një prite kriminelësh të cilët në një kohe  rekord u arrestuan nga forcat e policisë së shtetit.

  Lufta kunder krimit, sigurimi i rendit dhe qetësise publike ka qënë dhe është një sfidë e vazhdueshme e Policise së Shtetit me krimin në të gjitha format, që ai shfaqet. Në këtë luftë të ashpër e të papajtueshme me kriminelët, kanë dhënë jetën mbi 200  punonjës  të Policisë së shtetit, shumë prej të cilëve janë shpallur “Dëshmor të Atdheut”, duke shkruar kështu një faqe te ndritur në historine 91 -  vjeçare të Policisë

Fran Kaçorri.

“Dëshmor i Atdheut”

 Ka qënë  data 8 shkurt e vitit 2006 kur në vëndin e quajtur “karburant Toma”, 3 km larg nga qyteti i Rrëshenit, dy vëllezër nga Kukësi të cilët gjëndeshin në autobuzin e linjës Kukës- Tiranë, hapin zjarr mbi policinë e Mirditës, dhe për pasojë mbetet e i vrarë polici Fran Kaçorri, baba i tre fëmijëve, ndërsa plagoset rëndë një tjetër polic i quajtur Nikoll Gjikola. Breshërive të armëve të vëllezërve e Onuzi nuk u shpëtojnë edhe pasagjerë të autobuzit, shumica e të cilëve marrin plagë, ndërsa vdes njëri prej tyre. Vetëm dy orë më vonë, forca të shumta policie të vëna në alarm, arrijnë të ndalojnë në afërsi të Rubikut, dy vëllezërit Onuzi të cilët sipas hetimve të mëvonshme ishin nisur nga Kukësi për në Tiranë për të bërë terror në shënjë hakmarrje për zënie të pa drejtë të tokës së tyre nga punimet për ndërtimin e aerodromit të Kukësit. Ndërsa dy vëllezërit që bënë masakrën e Rrëshenit janë dënuar përkatësisht njëri me burgim të përjetshëm dhe tjetri  me 25 vite burg. Vetëm pak ditë më vonë nga ngjarja e rëndë, Policit Fran Kaçorri i jepet medalja e artë e shqiponjës, ndërsa në përvjetorin e parë të renies së tij në krye të detyrës, tre fëmijëve të tij dhe bashkëshortes i dorëzohet titulli më i lartë Deshmor i Atdheut.

Përgatiti: A. Ndoja