Bashkia nis nga puna për reabilitimin dhe asfaltimin e disa rrugëve në qytet.

Rrëshen. Pas miratimit të lejeve të ndërtimit nga ana e KRRT së bashkisë Rrëshen,  për disa rikonstruksione rrugësh në territorin e bashkisë, ka filluar puna intensive për reabilitim e tyre. E para që ka filluar punimet ka qënë firma “Krepi-SHPK” fituese e tenderit për sistemim-reabilitim- asfaltim në Bllokun nr. 4, pranë përrojit të jakajve. Prej dy ditësh kjo firmë ka akomoduar makineritë e saj në këto ambiente, të cilët kanë qënë mjaft problematike për banorët e shumtë të këtyre pallateve. Drejtuesi ligjor i firmës “Krepi-SHPK” z. Pashk Krepi, thotë se janë marrë të gjitha masat për të kryer një punë me cilësi, përfundimi i të cilës do të nxjerrë një herë e mirë nga balta dhe uji i shumtë një ambient të konsiderueshëm midis disa pallateve që janë në këtë zonë. Fondi i akorduar për këtë qëllim nga bashkia e Rrëshenit është në masën 1.620. 000 lekë të reja. Sipas drejtuesit ligjor të kësaj firme, afati i përfundimit të punimeve është 60 ditë nga lidhja e kontratës por po punohet që pa prekur cilësinë e punimeve, ivestimi të mbarojë në një kohë më të afërt me qëllim që afrimi i dimrit ta gjeje këtë rrugë të reabilituar totalisht. Në këtë ivestim janë parashikuar që të bëhet kanalizimi i ujrave të bardha, ndërtimi i trotuareve, mbushja dhe nivelimi i sheshit dhe rrugëve mes pallateve, si edhe asfaltimi i saj. Gjithashtu po kjo firmë me fondet e akorduara nga bashkia e Rrëshenit, sapo ka përfunduar ndërtimin e një rruge lidhëse nga BKT deri tek Farmacia. Kjo rrugë i ka dhënë frymarrje kësaj zone dhe ka siguruar një komunikim më të lehtë mes qëndrës së qytetit dhe pallateve pranë ish-furrës së bukës. Fondi i akorduar nga bashkia ka qënë 1.060.000 lekë. Ndërkohë që këto ditë pritet të fillojnë punimet për ndërtimin e një rruge plotësisht të re, nga ish-Shtëpia e Ushtarakëve e deri tek ura kryesore që lidh tregun me qytetin e Rrëshenit. Me një ivestim të tillë, Bashkia synon që të sigurojë një komunikim më të mirë mes pjesëve të qytetit dhe lidhjen e tregut të ri ushqimor me tregun industrial. Gjithashtu në bashkinë e Rrëshenit këto ditë do të nisin punimet për sistemimin dhe asfaltimin e rrugës nga ura e Sotirit tek godina e ish-SHIK-ut, me perfundim tek godina e bashkisë. Ndonëse kjo rrugë është efektive prej vitesh, është hera e parë që në gjurmën e saj do të ndërtohen trotuaret dhe do të shtrohet me asfalt. Në ditët ne vijim do të fillojnë punimet për ndërtimin e një ure në fshatin Jezull si edhe ndërtimin e  një lulishteje të re në afërsi të pallatit 8/2.

5/10/07.

A. Ndoja