Rrëshen, një javë me Festën e Korpit të Krishtit.

Fjala e kryetarit te Bashkise z. Gjon Dedaj..

  Ka vazhduar mrekullisht festimi i Korpit të Krishtit në Rrëshen si një festë përbashkuese në mes dioqezës dhe bashkisë Rrëshen. Një larmi veprimtarish tërhoqën jo vetëm në kureshtjen e tyre mijëra qytetarë në këtë festë e cila tashmë po kthehet në tradicionale, me aktivitete që nisin me  meshat përgjatë javës dhe adhurimin eukaristik, me koncertet me këngë eukaristike të korit të kishës dhe shtegtimit në besim e fe të familjeve të shumta të dioqezës, dhe për të vazhduar me aktivitetet civile.

Kështu katedralja, por dhe shtëpitë e të sëmurëve deri tek spitali e me rradhë, po ashtu salla të shkollave, apo salla e kinemasë dhe ajo e pallatit të kulturës, mbajtën qindra aktorë të ndryshëm të këtij festimi, nxënës shkollash, mësues e prindër, e deri tek fushat e sportit në të cilat u luajtën takime në kompeticione të ndryshme e ku përfshinë qindra e qindra pjesëmarrës, gjithnjë nën moton e kësaj feste të Korpit të Krishtit: “të festosh ka vend për të gjithë”!

Një nga ditët e kësaj feste u është kushtuar të sëmurëve të spitalit, për të cilët Qendra kulturore e fëmijëve dhe artistë të ansamblit “Mirdita” kanë dhënë një koncert të larmishëm me këngë e valle para oborrit të këtij spitali me praninë jo vetëm  të sëmurëve por dhe personeli i spitalit dhe banorë të tjerë. Interpretimet virtuoze të këngëtarëve të vegjël dhe valltarëve kanë sjellë një atmosferë festive duke ndikuar në lehtësimin e sëmundjeve për dhjetra syresh që i kanë ndjekur veprimtaritë nga dritaret e dhomave të reparteve spitalore. Një përshëndetje të ngrohtë solli dhe monsinjor Palmieri dhe kryebashkiaku Gjon Dedaj, ndërsa koncerti është përmbyllur me vallen “O sa mirë me qenë shqiptar”.

Dita e dielë ishte epilogu i tërë veprimtarive duke kulmuar me meshën e shenjtë si dhe procesionin e Korpit të Krishtit nëpër rrugët e qytetit për t’u kthyer përreth sheshit “Abat Doçi” të mbushur me qytetarë e për t’u rrjeshtuar para pallatit të kulturës “Mirdita”, ku ishte improvizuar sfondi i kësaj feste ku do të bëhej dhe bekimi i popullit. Pos qytetarëve të shumtë, krahas ipeshkvit Palmieri, ishte dhe kryebashkiaku i Rrëshenit Gjon Dedaj, me simbolikën zyrtare, por dhe veshje popullore si nje ftesë e qytetarit nr 1 të Rrëshenit dhe për banorë të tjerë për ta festuar këtë ditë në mënyrë tradicionale ashtu si dhe të parët tanë, por dhe bota e qyteteruar që din t’i ruajë e kultivojë vlerat e veta të mocme, ndërsa i tërë vargu i proçesionit ka sjellë solemnitet në mes të qytetit me këngët e kënduara nga tërë pjesëmarrësit dhe kori, si dhe lutjet përgjatë këtij proçesioni.

Ipeshkvi ka vlerësuar festën, e cila këtë vit ka marrë madhështinë e duhur, ndërsa e ka bekuar popullin e shumtë në shesh. Edhe kryebashkiaku i Rrëshenit, e ka quajtur si një festë që na bashkon të gjithëve, dhe se ne na duhet të mendojmë për t’a përjetuar këtë festë të lumnueshme, festë që na kujton më së miri sesi mund të bashkëjetojmë në komunitet.

Koncerti i fundit pati protagonist këngëtarin e njohur Frederik Ndoci me trupën e tij, e cili ka performuar live për disa orë rrjesht duke sjellë një atmosferë të jashtëzakonshme në shesh për të shkrirë me një këngën dhe ritmin vallëzues të të rinjëve përmes një repertori të zgjedhur.

Koncerti është shoqëruar me një spektakël fishekzjarresh, për të përmbyllur një nga festat më të bukura të Mirditës, edhe pse e inicuar vitet e fundit në mes dioqezës dhe bashkisë Rrëshen.

Në fund të koncertit këngëtari i mirnjohur Frederik Ndoci ka bërë një vizitë në muzeun etnografik të sapo inaguruar. Gjatë vizitave të stendave ai ka vlerësuar shumë lart aktivitetin e madh të grupit të burrave të Mirditës dhe të gjithë ansamblit. Z. ndoci tha se kur kam dëguar për herë të parë këngën “buzë Valmorit kush ka dalë” jam përlotur, madje e ka vlerësuar si një ndër këngët më të bukura shqiptare. Më tej ai ka folur gjatë për këngën mirditase duke evidentuar faktin se kompozitori i njohur Dorian Nini ka dhënë një ndihmesë të madhe në modernizimin e kësaj kënge. Gjatë gjithë qëndrimit në pavionin e muzeut etnologjik, në sfond janë transmetuar këngë të vjetara mirditae, ndërkohë në që shënjë mikpritje, vëndasit kanë ofruar verën tadicionale të Mirditës, produkt i kantinës “Arbri”, me lëndë të parë nga vreshtat e mirnjohura të fshatit Bukmirë.