Një javë me Festën e Korpit të Krishtit

 Po! Rrësheni ka nevojë për një festë të veçantë, një festë që t’i bashkojë të gjithë papërjashtim. Përpjekja e parë për ta përbashkuar komunitetin e Rrëshenit në një event të tillë, u bë vitin e kaluar dhe festa kaloi në përmasa modeste, por të paktën duke lënë një shenjë për mirë të një bashkëpunimi në mes dioqezës dhe bashkisë. E ndërkaq përpjekja e sivjetme rezultoj pozitive, banorët papërjashtim janë të etur për një festë të përbashkët, me shumë elementë për t’u ndjerë të barabartë në mes të barabartëve, banori i thjeshtë dhe drejtuesi, bariu dhe grigja, si në festat e hershme. Dhe këtë e ka treguar dhe festimi i sivjetëm i Korpit të Krishtit, festë që nuk u shtri në vetëm një ditë. Por plot një javë deri në përmbylljen e saj këtë të dielë të 1 qershorit.

 Që me ditën e parë që përkoi dhe me kthimin nga vizita në Vatikan e 45 familjeve dioqezane, veprimtaritë nuk kanë reshtur dhe kryebekimi ka qenë dhe mesazhi i Papës, i cili u bë i njohur dhe në një forum të familjes së Krishterë, organizuar në sallën e pallatit të kulturës Rrëshen.

 Po cilat kanë qenë disa prej aktiviteteve?

 Duke nisur që me ato fetare, me meshat dhe adhurimin eukaristik, me koncertet me këngë eukaristike të korit të kishës, dhe shtegtimit në besim e fe të familjeve të shumta të dioqezës, dhe për të vazhduar me aktivitetet civile. Kështu Katedralja, por dhe shtëpitë e të sëmurëve deri tek spitali e me rradhë, po ashtu salla të shkollave, apo salla e kinemasë dhe ajo e pallatit të kulturës, mbajtën qindra aktorë të ndryshëm të këtij festimi, nxënës shkollash, mësues e prindër, e deri tek fushat e sportit në të cilat u luajtën takime në kompeticione të ndryshme deri ato kombëtare, përfshinë qindra e qindra pjesëmarrës, gjithnjë nën moton e kësaj feste të Korpit të Krishtit: Të festosh ka vend për të gjithë!

 Ndryshe nga vite të tjera tërë këto takime, sportive apo artistike, spektakle apo show, konkurime apo gara të ndryshme në të tëra fushat kanë nxjerrë dhe fituesit e tyre, që janë bërë të njohur për publikun ditën e dielë të 1 qershorit, në aktivitetin përmbyllës.

 Ja dhe fituesit e këtyre konkurimeve, të cilëve iu shpërndanë medaljonet dedikuese me simbolin e kësaj feste.

Korpi i Krishtit

-vleresimet-

 Futbolli:

1. Olsi Picaku për U-17

Golëshënues dhe organizator në lojën sulmuese

2. Denis Dedaj për U-14

Qëndërmbrojtës i pathyeshëm i ekipit

3. Oligert Beleshi për U-12

 Organizator në mesfushë dhe golëshënues

 4. Ksristian Jaku për U-10

 Organizator dhe golëshënues

 (Gjatë kampionatit të futbollit amator kanë patur rezultate shumë pozitive dhe janë evidentuar si elementë sportive të suksesshëm me trajnerë Ded Dedaj dhe Bardhok Dedaj).

 Volejbolli:

5. Adelina Kacorri,

Lojtare organizatore në ekipin e volejbollit të të rriturave

6. Malvina Tuci

Lojtare e evidentuar në kombëtaren e të rejave.

Fusha e Muzikës dhe artit

7. Klotilda Biba

Këngëtare e talentuar

8. Rivis Simoni

Instrumentist i talentuar

9. Ardit Lleshi

Instrumentist i talentuar

10. Aurel Përkeçi

Instrumentist i talentuar

11. Ilia Jahja

vendi i tretë në audicionin pranveror 2008

12. Silvan Lala

Pikture, i talentuar ne artet pamore

  Nga olimpiadat

 Nxënësit fitues nga shkolla “Pashko Vaso”.

13. Erald Pjetri

fitues i vendit të parë në olimpiandën e matematikës në shkallë rrethi.

14. Jozef Prenga,

fitues i vendit të parë matematikë klasa e 7 të.

15. Ameda Pjetri,

talent në interpretim

16. Aleandro Nikolli,

fitues në olimpiadën e matematrikës klasa 6-të.

Nga shkolla 9 vjecare Nr 2

17. Eliona Kola,

talent në muzikë

18. Gjon Nikolli

në gjeografi

19. Oltiona Beci

Fituese e vendit dytë në matematikë klasa e 7-të në shkallë rrethi.

20. Hermes Kala

Fitues vendi i dytë olimpiada e matematikës klasa e 8-të në shkallë rrethi

21. Flavia Kola

Talent në interpretim dhe fituese në olimpiada.

Dita e dielë, epilogu spektakolar

 Dita e dielë ka qenë dhe epilogu spektakolar i kësaj feste, me veprimntaritë që filluan me meshën e shenjtë në katedrale, ku pos besimtarëve të shumtë pjesëmarrës qenë dhe kuadratet pjesëmarrës në manifestimin sportiv si dhe grupet konkuruese në fusha të ndryshme. Pas meshës së shenjtë nën drejtimin e ipeshkvit Monsinjor Cristoforo Palmieri ka nisur proçesioni me Korpin e Krishtiit që nga dalja e hyrjes kryesore të katedrales, rrugës kryesore për nga spitali dhe më pas për t’u kthyer përreth sheshit “Abat Doçi” të mbushur me qytetarë për t’u rrjeshtuar para pallatit të kulturës “Mirdita”, ku ishte improvizuar sfondi i kësaj feste ku do të bëhej dhe bekimi i popullit. Pos qytetarëve të shumtë, krahas ipeshkvit Palmieri, ishte dhe kryebashkiaku i Rrëshenit Gjon Dedaj, me simbolikën zyrtare, shiritin e kryebashkiakut, ndërsa i tërë vargu i proçesionit ka paraqitur shumë solemnitet në mes të qytetit me këngët e kënduara nga tërë pjesëmarrësit dhe kori, si dhe lutjet përgjatë këtij proçesioni.

 Ipeshkvi ka vlerësuar këtë festë, e cila këtë vit ka marrë madhështinë e duhur, ndërsa e ka bekuar popullin e shumtë në shesh. Edhe kryebashkiaku i Rrëshenit, e ka quajtur si një festë që na bashkon të gjithëve, dhe se ne na duhet të mendojmë për t’a përjetuar këtë festë të lumnueshme, festë që na kujton më së miri sesi mund të bashkëjetojmë në komunitet.

 Më pas janë shpallur fituesit e garave dhe dorëzimi i medaljoneve. Më pas ka nisur manifestimi sportiv, i organizuar nga shkollat 9 vjeçare Rrëshen, ku ranë në sy lëvizjet e sakta dhe sfondi i krijuar me veshjet dhe lulet shumëngjyrëshe në mes të sheshit. Manifestimi alternohej me lojëra të shumta popullore që dhanë mjaft alegri për të pranishmit që kishin qarkuar sheshin e qytetit. Më pas vrapime, gara humoristike, gara me biçikleta, aerobi, valle popullore dhe në fund mbyllja e bukur me ngritjen e kalasë dhe të flamurit kombëtar nën himnin e Flamurit, një moment prekës dhe shumë entusiast.

 Pas këtij manifestimi masiv, rradha i ka ardhur grupit folklorik të fëmijëve të qendrës kulturore të fëmijëve, të cilët për një orë kanë kënduar e interpretuar “live” për mijëra qytetarë në shesh deri në orët e vona të mbrëmjes. Nga ana e kryebashkiakut dhe Ipeshkvit u janë dhuruar tre çifteli Eprorëve të Lartë Vincensianë të ardhur nga Italia që morën pjesë në këtë manifestim të kësaj feste.

 Vallja e fundit është bërë masive dhe nga sheshi, ndërsa qielli është përflakur nga një spektakël disa minutash me fishekëzjarri duke i dhënë solemnitet të gëzueshëm për të gjithë banorët, që përjetuan orë të tëra nën emocionet e festës në këtë shesh duke lënë të kuptohet se festa të tilla janë shumë të mirëpritura.

 Ka qenë kjo ditë, ky organizim bashkëpunues efikas në mes institucioneve të ndryshme kulturore dhe ato të arsimit, që i ka nxitur, qoftë ipeshkvin Palmieri dhe kryebashkiakun Dedaj, që të definojnë se kjo festë do të shpallet tashmë në Kalendarin Vjetor të përbashkët për veprimtari masive dhe do të jetë e mirëorganizuar vitet e tjera si festë tashmë tradicionale për të depërtuar natyrshëm në çdo vatër të Rrëshenit e më gjerë. 2.06.08

 Gj.Marku