Rrësheni, një javë me Korpin e Krishtit

Fjala pershendetese Ipeshkevit Palmieri

Fjala pershendetese e Gjon Dedajt

RRËSHEN. Prej tri vitesh komuniteti i Rrëshenit feston Korpin e Krishtit pas një bashkëpunimi në mes bashkisë dhe Dioqezës Rrëshen. Këtë vit moto e kësaj feste lidhej me faktin se përtej pengesave që ndeshen ndaj çdo “ecje-bashkimi”, i krishteri nuk shkurajohet dhe vazhdon të propozojë shenja miqësie, vëllazërie, uniteti, dashurie reciproke, besuese në Zotin e pranishëm në Eukaristi: shenjë e dashurisë dhe shteg bashkimi.

Qytetarë të shumtë të gjitha moshave iu bashkuan kësaj feste që tashmë po kthehet në traditë në Rrëshen e më gjerë, që nga aktivitetet e shumta civile si konkurse,olimpiada,spektakle të të rinjëve, ekspozita me piktura dhe etnografi, si dhe meshat fetare në  katedrale të udhëhequra nga udhëheqësi shpirtëror i dioqezës ipeshkvi monsinjor Cristoforo Palmieri.

Jashtë vëmendjes së kësaj jave nuk mbeten dhe ditë të caktuara për shërbimin ndaj të sëmurëve tek spitali dhe njerëzve në nevojë të qytetit dhe fshatrave, adhurimi eukaristik, dhe lutjet e të rinjëve vincensianë.

Dita e fundit e fetës si epilog i saj ngërtheu një gamë të gjerë veprimtarish të larmishme që nga procesioni përgjatë rrugëve kryesore të qytetit dhe më pas spektakli teatror i  trupës “Ilirikum” të Shkodrës, titulluar “Vincenci, Luiza dhe ne”. Qytetarët e shumtë iu gëzuan dhe performancave interesante të grupeve të të rinjëve vincencianë të Durrësit,Shkodrës,Lezhës, Mollasit, Durrësit dhe shume famullive të Kosovës.

Ndërsa pas meshës së shenjtë të pasdites të udhëhequr nga imzot Palmieri, procesioni ka kaluar në sheshin e qytetit ku janë bërë përshëndetjet e rastit nga drejtuesi i dioqezës dhe kryetari i bashkisë Rrëshen Gjon Dedaj, si dhe bekimi i kësaj feste mbarëpopullore.

Ndërkaq në pallatin e kulturës grupi Eagle Dance,te drejtuar nga koreografi i talentuar lezhjan Gazmend Goelmi dhe këngëtare të rinj nga Lezha dhe Mirdita, përmbylën këtë javë veprimtarish me një show emocionues për qytetarët e shumtë.

A.Ndoja