Pallati i kultures Rreshen veprimtari ne Prizren.

 Dy nga produksionet më të mira të pallatit të Kulturës Rrëshen gjatë këtyre viteve, dokumentari “Nëpër visaret turistike të Mirditës” dhe koncerti i madh i ansamblit MIRDITA në TOB në dhjetor 2010, kanë shtegtuar këto ditë për në Prizren, si nisja e parë e një bashkëpunimi kulturor në mes Mirditës dhe kësaj qendre të rëndësishmë të kulturës sonë kombëtare. Gjithcka është përcjellë në sheshin e këtij qyteti si një model i aplikuar me sukses dhe me kosto jo te larte, dhe në qytetet Rrëshen dhe Rubik, me ekran të hapur, duke dhënë efekt pozitiv për vlerat në fjalë të përcjella edhe për prizrenasit në mënyrë të thjeshtë por me impakt pozitiv.

Drejtuesi i Pallatit të Kulturës Gjergj Marku, me stafin e këtij pallati patën takime të zgjeruara me faktorët kulturorë në Prizren,si me specialistë e drejtues të sektorit të kulturës në këtë komunë multikulturale, po ashtu u hodhën ide për bashkëpunimin e mëtejshëm me qendren kulturore të Prizrenit si dhe me kompleksin monumental të Lidhjes Shqiptare të Prizrenit etj.

Aktiviteti u zhvillua në sheshin Shatërvani ku morën pjesë qindra qytetarë prizrenas në orët e vona të natës. Veprimtaria u cel në mënyrë ceremoniale nga dy drejtuesit e qendrave kulturore të Rrëshenit dhe Prizrenit, ku drejtori i kësaj të fundit Arben Rrashkaj, theksoj se ky hap pozitiv do të vazhdojë me marrëveshje konkrete bashkëpunimi për t’i lëvizur trupat tona artistike nga njëra zonë në tjetrën.

Pos qytetarëve nga kombësi të ndryshme të këtij qyteti multikultural, morën pjesë shumë mirditorë të cilët janë me origjinë nga treva jonë, që përbëjnë një lobing të fuqishëm në kuvendin komunal por dhe jetën politike dhe kulturore të këtij qyteti, të cilët qenë dhe ndihmësit kryesorë për organizimin e këtij aktiviteti mbresëlënës. Materialet që u dhanë në shesh të hapur u përcollën dhe nga kanalet televizive të Prizrenit si dhe ato kombëtare të Kosovës. Ato u cilësuan si materiale me vlera kombëtare për të cilat Prizreni kishte nevojë më shumë se asnjë vis tjetër në Kosovë dhe se ishin në momentin e duhur.

 F. Preci

10 shtator 2011