LIDHJA KULTURORE AUSTRI-MIRDITË (KÖM)

         Prej shtatë vjetësh funksionon Lidhja Kulturore Austri – Mirditë (KÖM), me qendër në Rrëshen, e krijuar me ndihmesën e drejtpërdrejtë të humanistit austriak pader Franz Vinsauer në vitin 2000.

Qëllimi i saj ishte që krahas kontributit austriak në Arsim, atij për përmirësimin e jetës Sociale të komunitetit mirditor, shoqata të luante rol që ky kontribut të shtrihej dhe në sferën Kulturore, përmes nxitjes së mini-projekteve të ndryshme dhe rolit të vetë intelektualëve te Rrëshenit, mësues, studiues etj.

Nisma dhe projekte të Lidhjes Kulturore Austri- Mirditë

Lidhja Kulturore ka nxitur dhe përmbushur nisma dhe projekte në rrafshin e kulturës, botimeve, arsimit, mediave lokale etj. Një mori kursesh (nga dy mujor deri në një vit) janë financuar nga Caritas “Mirdita” në bashkëpunim me atë austriak:

- kursi i gjuhës gjermane,

- kursi i gjuhës angleze,

- kursi i reportereve të rinj,

- “shkolla verore” një-javore për fëmijet e varfër të zonave të thella të Mirditës,

- financimi gjatë vitit 2007 i 4 kabineteve mësimore në shkollën e mesme të përgjithshme Rrëshen:

i fizikës (Gjon Kola)

i biologjisë (Flora Biba)

i matematikës (Anton Filej, Drane Nikolli, Liliana Marku)

i gjeografisë (Valbona Reçi)

Shënim: në kllapa janë shënuar emrat e mësuesve realizues të projekteve.

Domethënës ka qenë kontributi i miqve tanë të Caritsit Austriak dhe për botimin e disa librave të rëndësishëm:

- “Lule” dhe “Ditari Shqiptar” të At Fabian Barkatës,

- “Populli i Shqipeve të malit” të Valter Peinsipp,

-  „Hyjnesha e Pyllit“ (libër për fëmijë i ilustruar) etj.

Ditë austriake e dyerve të hapura në Mirditë

         Dita e 20 majit 2007 për banorët e Rrëshenit ishte njëkohësisht “ditë austriake e dyrve të hapura”, që u shoqërua nga një varg veprimtarish kushtuar kontributit humanitar austriak prej 15 vitesh në këtë rreth.

Gjithçka nisi në fillim të viteve ’90 me ardhjen në Shqipëri të pader Franz Vinsauerit nga landi i Foralbergut, i cili bashkë me mbështetësit e tij siguroi ndihma dhe fonde për shkollat, konviktet, kopshtet, çerdhet dhe banorët e zonave të thella.

U rikonstruktuan apo u ndërtuan të reja pesëmbëdhjetë shkolla kryesisht në zonën e Fanit,  por dhe në komunat Selitë, Kaçinar, si dhe mjaft institucione mësimore të tjera u paisen me bazë materiale, u shpërndanë ndihma për familjet në nevojë, jetimët etj.

Në veprimtarinë e organizuar nga Ambasada Austriake në Tiranë folën mbi këto kontribute humanitare dhe bamirësie:

kryetari i Bashkisë Rrëshen z. Gjon Dedaj,

drejtori i Zyrës Arsimore z. Bardhok Filopati,

kryetari i Lidhjes Kulturore Austri-Mirditë Ndue Dedaj,

të cilët vlerësuan ndihmën dhe bashkëpunimin me Caritasin Austriak, si dhe u shprehen për projekte të tjera të përbashkëta në të ardhmen.

Përshëndetën me ketë rast dhe konsulli austriak në Tiranë, Rainer Sulsberger dhe zoti Franz Vinsauer.

Ishte i pranishëm dhe konsulli austriak i nderit në Shkodër Gjergj Liqejza.

Në fund u dha një koncert i Trios së Harqeve Shkodër, si dhe u vizitua një ekspozitë fotografike  kushtuar marrëdhënieve shqiptare –austriake në të kaluarën, përgatitur nga studiuesi Gjergj Danelli.

Veprimtaria u shtri dhe në të nesërmen në një takim me të rinj të komunave dhe me te moshuari, për një integrim më të mirë të të tyre, ashtu si dhe në komunën e Selitës me nxënësit e shkollave dhe të rinjtë e komunitetit, ku u inagurua dhe qendra e rinisë, ngritur me ndihmën e austriakëve, të cilët kanë kohë që ndihmojnë në këtë zonë të thellë malore. Kjo qendër e re vjen pas disa qendrave të tilla, si Qendra e Gruas në Rrëshen që prej tre vjetësh zhvillon kurse rrobaqepësie, kuzhine, kompjuteri për gratë e bashkisë së Rrëshenit e më gjerë, po ashtu dhe qendra e aftësimit të sëmurëve paraplegjikë etj.

Përfituesit nga këto projekte të larmishme kanë qenë të shumtë, pasi janë kryer veprimtari cilësore apo janë ngritur mjedise funksionale për sot e për të ardhmen.

Ralizimi i projekteve është bërë dhe me kontributin lokal, si të bashkive e komunave, drejtorisë arsimore, shtëpisë botuese, shkollës së mesme etj.

Kontributi austriak në Mirditë ka gjetur pasqyrim të vazhdueshëm në mediat lokale dhe kombëtare, gazetën Mirdita, Koha jonë, Shekulli, Tirana Observer, Ballkan, Sot  etj.

(Teksti: Zyra e Lidhjes Kulturore Austri-Mirditë)