KRRT-ja e Bashkisë Rrëshen i hap rrugën ndërtimit të Kompleksit Turistik “Mirdita TOWER” në afërsi të autostradës në një vlerë prej 15 milion eurosh.

  Mbledhje e parë e KRRT-së për këtë vit ka miratuar një sërë project- vendimesh të filtruara paraprakisht nga Sekretaria Teknike, dhe Departamenti i Politikave të Zhvillimit pranë Bashkisë. Ndonëse disa prej projekt vendimeve kanë qënë të thjeshta, si dy më kryesoret janë renditur “Ndërtimi i Kompleksit Turistik Mirdita TOWER” dhe “Ndërtimi i një pallati 9-katësh me tre kulla” me ivestitor z. Bardhok Jushi.

Në fillim të mbledhjes maratonë e cila nisi në ora 05.30 të pasdites, z. Gjon DEDAJ në cilësinë e Kryetarit të KRRT-së tha se mbledhja e parë për këtë vit është e monitoruar edhe nga kamera, dhe i gjithë procesi do të zbardhet për tju bërë e ditur të gjithë opinionit të interesuar. Z. Dedaj tha se kemi qënë të detyruar për të bërë një zgjidhje emergjente duke komanduar në rolin e Sekretarit Teknik z. Genc Vladi, pasi drejtuesja përkatëse mungon për arsyeje objektive.

Kryetari i Bashkisë ka ripërsëritur se kjo KRRT kërkon nga ofertuesit rritjen e standarteve elekronike me qëllim që paraqitja e projekteve të mos bëhet më me mënyrën klasike, atë të afishimit në mur të projekteve.

Më tej ai ka lexuar listën e projekteve të miratuara nga sekretaria teknike, dhe të paraqitur në këtë mbledhje për miratim.

 Më shumë kohë dhe vëmendja ka sjellë mbrojtja teknike që arkitekt Sami Çela, drejtues i studios “apolon-1 studio” i bëri projektit për ndërtimin e kompleksit turistik “Mirdita TOWER”. Në fillim të paraqitjes së këtij projekti, për rëndësinë e realizimit të këtij ivestimi gjigand që mund të shkojë deri në 15 milion Euro, ka folur z. Dashamir Uruçi, përfaqësues i autorizuar i kompanive investitore. Z. Uruçi bëri të ditur se një ide e tillë zë fill rreth dy vite më pare, që me përcaktimin e gjurmës së ndërtimit të rrugës Durrës-Kukës. Ndërtimi i kompleksit turistik është një projekt gjigand që do të ketë impakt të rëndësishëm në të gjithë zonën. Për këtë janë bërë shumë studime e konsultime. Ai tha se për këtë tashmë ka një vendim të Këshillit të Bashkisë, dhe Prefekturës. Ai bëri të ditur se kompleksi do të financohet nga një grup i përbashkët ivestitorësh shqiptarë dhe italianë, ndërsa peshën kryesore do e mbajë “System Group Italia” një shoqëri ivestitorësh italianë, mjaft të njohur në itali për prodhimin dhe tregëtimin e tubove.

 Ndërsa për procesin teknik ka folur arkitekt Sami Çela. Ai ka bërë të ditur se studioja e tij  “apolon-1 studio” ka mardhënie të ngushta me shumë studio analoge italiane. Pasi ka folur për rëndësinë e rrugës, dhe ndërtimin e kompleksit turistik “Mirdita Tower” ka evidentuar faktin se Mirdita është i vetmi pishtar i katolicizmit në Ballkan, ka virtyte të çmuara në mbrojtje të qytetërimit roaman. Pikërisht ky fakt i rëndësishëm është paraparë në kompozimin e projektit në fjalë.

“Mirdita TOWER” do të përbëhet nga një seri objektesh mjaft të rëndësishme turistike e kulturore. Pas nënshkrimit të memorandumit mes “System Group Italia” dhe Bashkisë Rrëshen janë bërë hapa para në këtë drejtim. Kjo e fundit do të ketë interesa të forta pasi i gjithë kompleksi dhe zona për rreth tij, do të jetë në shërbim të qytetrëve të Rrëshenit.

Sipas arkitektit Sami Çela, pjesë e kompleksit turistik Mirdita TOWER, do të jetë një shkollë 3-5 katëshe, një zonë spitaliere, me një spital me të gjithë teknologinë e fundit, për të gjitha moshat dhe sëmundjet.

Në këtë kompleks do të ketë edhe një hotel me katë yje, të nivelit ndërkombëtar.

Ndërsa vetë kulla nga ku ka marrë emrin vetë kompleksi turistik do të jetë disa katëshe. Në katin e parë do të ketë një holl të madh dhe një bar pritje. Në katin vijues do të vendoset një muze etnologjik nga Mirdita, dhe salla pritje kryesisht për të huaj. Ndërsa më lart do të ketë një bar-restorant i klasit të parë me një kupolë me xham selektiv ku klientët mund të shikojnë zona të largëta falë vetive të vetë xhamit të kupolës. Në përbërje të kompleksit do të ketë mjaft ambiente sportive e kulturore c’ka e bëjnë të gjithë zonën mjaft të vizitueshme për kalimtarët e shumtë që pritet të fluksojën rrugën Durës-Kukës.

z. Sami Çela, tha se në mbledhjen e ardhshme do të vendoset se kush nga objektet do të jenë më prioritarë në rradhën e ndërtimit.

Në lidhje me paraqitjen që bëri arkitekt Sami Çela, ka kërkuar spjegime të mëtejshme ing Maks Kola, spjegime të cilat janë dhënë edhe nga Dashamir Uruçi. Ndërsa antëtari tjetër i KRRT-së z. Zef Beleshi, ka falenderuar për paraqitjen duke evidentuar faktin se fati i këtij kompleksi do të jetë i lidhur me fatin e këtij qyteti.

 Ndërsa projekti për ndërtimin e një pallati 9 katësh të ndarë në tre kulla me ivestitor z. Bardhok Jushi, është mbrojtuar nga ing. Merita Libohova.

Ajo ka sqaruar se ndërtimi do të bëhet në hyrje të qytetit tek ish fusha e volejbollit. Znj. Libohova ka treguar të gjitha detajet për ndërtimin e këtij pallati, duke vlerësuar faktin se pas ndërtimit të tij do të marrë një pamje mjaft komode edhe hyrja e qytetit. Ajo deklaroi se të gjitha pamjet do të jenë në pozicon të preferuar. Dy katet e para do të kenë një rrjet dyqanesh dhe bar kafe për të afruar klientët. Të gjitha hyrjet do të jenë 2 plus një, me dy banjo dhe ballkone, me një sipërfaqe prej 100 m2. Ndërsa rreth 70 % e banesave do të kenë në dispozicion nga një garazh makine.

Një oponencë është bërë nga z. Maks Kola i cili ka debatuar në disa pika, kryesisht për distancat me objektet e tjera. Znj. Merita Libohova ka kundërshtuar duke sjellë argumentat e saj.

Më tej është vijuar me paraqitjen një sërë objekteve të tjera, si një ndërtim tjetër në hyrje të qytetit, me ivestitor z. Paulin Pali, shtesë lokali me ivestitor z. Zef Paçuku, etj.

Për të gjitha këto anëtarët e KRRT-së janë shprehur me votë duke kaluar shumë prej tyre, por edhe duke rrëzuar disa me kondicione të dyshimta.

Në fund të mbedhjes kanë mbërritur një përfaqësi e “System Group Italia”, të cilët janë përshëndetur nga kryetari bashkisë z. Gjon Dedaj. Edhe miqtë italianë kanë falenderuar kryetarin e Bashkisë dhe të gjithë anëtarët e KRRT-së për miratimin e këtij kompleksi mjat të rëndësishëm për zhvillimin e zonës.

A. Ndoja