Minatori “rrëzon” vëndin e parë në renditjen për Kupë. Ekipi i volejbollit tashmë më e sigurtë drejt fitores.

 Emocion, tension, por me ne fund fitore. Kështu mund të perifrazohet ndeshja ne pallatin e sportit "Ariana Arapi" mes Minatorit dhe ekipit te Tiranës, ndeshje e cila filloi në ora 16.00 të ditës së shtune. Ekipi i Minatorit i cili drejtohet A. Mërtiri dhe M. Kola dhe prej disa muajsh ka mbështetjen e pa kufishme të klinikës “Troplini” përbëhej nga volejbollistet Kola, Hixha, Prenga, Xhyliu, Kaçorri, Tuci, A dhe G. Qose, Përgjetani, dhe Gega. Ndërkohë që për ta fuqizuar më tej këtë ekip, z. Met Troplini në cilësinë e presidentit të Minatorit ka mërkatuar dhe dy volejbolliste bullgare, Minova dhe Todorova.

Ndërsa ekipi i Tiranës me trainer Hasan Gurabardhin kishte në përbërje të tij volejbollistet Shkurti, Huqi, Sallaku, Xhixho, Akcani, Gjonaj, Braha, Meta, Hysa, Matraku, Rama, dhe Sejfullahu.

Nga një komunikim i shkurtër me trainerin e Minatorit Mërtiri, u mësua se ekipi i Tiranës ndodhej në vëndin e parë të Kupës, në vëndin e dytë ekipi i Tartarit UMB-Voley, ndërsa pas disa fitoreve të një pasnjëshme, Minatori mban vëndin e tretë, duke lënë pas disa skuadra. Ndërsa ndeshja e ditës së shtunë për Minatorin ishte një ndeshje prestigji, pasi për të nuk ndryshonte gjë në renditje, ndërsa një humbje e Tiranës do ta zbriste atë nga vëndi i parë në të dytin. Pikërisht për këtë arsye, ndeshja por edhe mbështetja e publikut ishte shumë e fortë.

Në ora 16. 00 rënia e bilbilit të gjyqtarit ndërkombëtar Altin Telo, i mbështetur nga gjyqtari i kategorisë së parë Nuri Hysa, ka bërë që vajzat e të dyja anëve të lëshohen furishëm në tapet. Fillimi i setit të parë ka vijuar gjatë me një lojë të ekuilibruar. 7: 7 në set, ku spikasin nr. 11 Prenga për Minatorin dhe nr. 7 Shkurti për Tiranën. Nuk vonon që loja të zgjasë si lojë nervash. Minatori megjithëse tregon epërsi në lojë, ndëshkohet nga disa gabime të lojtareve të veta. Eshtë Prenga e cila arrin të korigjojë ekipin e saj me gjuajtje të forta, por edhe profesionale nga pozicione të vështira. Megjithatë edhe Prenga nuk është shumë e saktë në goditjet nga shërbimi. Gjatësia e saj trupore dhe stili i saj në gjuajtje e bëjnë fushën shumë të vogël, që topi të godasë brënda kontureve të saj. Mjeshtërisht vajzat e Tiranës arrijnë në shumë raste të studiojnë trajektoren e topit, duke e lënë atë të godasë jashtë.

Në pikën e 14-të Minatori ka lëshuar ritmin e lojës. Disa gabime në mbrojtje kanë bërë që Tirana të kapë pikën e 18-të. Minatori bën një kthesë të pa pritur. Spikat loja e Dalina Kolës me disa gjuajtje rradhazi nga shërbimi të konvertuara në pikë. Kola shënon pikën e 22 që barazon me pikë Tiranën. Pas kësaj ora e Tiranës stopon këtu, Minatori shënon tre pikë rradhazi, duke e mbyllur setin e parë me fitore të vulosur nga një gjuajtje e saktë e Xhyliut.

Seti i dytë ka nisur me të njëtin ritëm. Sërish ekuilibër loje, ku spikasin kërcimet në ajër dhe gjuajtje të sakta të Gentiana Qoses. Kur Tirana kishte 3 pikë, Minatori shënon pikën e 6. Në këtë moment traineri i Tiranës proteston ashpër ndaj gjyqtarit Altin Telo duke u sulur në tapet. Kjo lëvizje ka shkatuar irritim të tifozëve të Minatorit. Është dashur ndërhyrja energjike e Policisë Bashkiake, stafit të pallatit të sportit, dhe drejtuesve të bashkisë, që situata të normalizohej dhe ndeshja të rifillonte në normalitet. Deri në pikën e 14 -të loja ka qënë e ekujlibruar. Pas kësaj kemi një rritje të shpejtë të Minatorit. Loja kombinohet kryesisht nga Kola, Prenga, Xhyliu, Hoxha etj, ndërkohë që seti mbyllet me rezultatin 25: 21 në favor të Minatorit.

Por kur pritej që edhe seti i tretë të vijonte me të njëjtën panoramë dhe ndeshja të përfundonte, Tirana ka zhgënjyer sportdashësit e Rrëshenit. Sidomos në pjesën e dytë të setit Tirana prezanton një rezistencë fizike të admirueshme. Loja e Tiranës mbështetet në cilësin e lojtareve Xhixha dhe Akcani, ndërkohë që seti mbyllet me rezultatin 25 me 23 në favor të Tiranës.

Seti i katërt ka pasur të njëjtën panoramë, ndërkohë që rezultati gjatë gjithë lojës ka qënë në favor të Tiranës. Përfundimi i setit prezanton një tabelë me rezultat të thellë në favor të Tiranës. 25 me 17.

Seti final ka nisur nën një entuziasëm të madh të spektatorëve. Jo në pak raste individë të pa përgjegjshëm, ndonëse në numër të kufizuar kanë prezantuar sjellje të pa hishme duke fyer gjyqtarin apo edhe duke hedhur ujë në fushë. Kjo ka bërë që fillimi i setit të vonohet për disa minuta.

Loja ka vijuar me ekuilibruar në pikë, por me mjaft tension në fushë. Në pikën e 8-të Tirana në avantazh. Ndërkohë që Prenga merr rolin e shpëtimtarit. Disa gjuajtje të forta të saj përkthen në pikë. Minatori shënon një humbje pike shumë të vlefshme, por sërish fati është me të. Në pikën 15 barazon Prenga. Topi nuk kuptohet nga shkon, por vërshëllima e bilbilit njofton pikën e fitores për Minatorit. Qindra tifozë fillojën festën nën një gëzim të ligjshëm, ndërkohë Minatori ka fituar ndaj ekipit të vëndit të parë dhe pretendent për kupën.

A. Ndoja.