“Ardhsh i bardhë në Mirditë!”

-Publikohet libri doracak i shtegtimit turistik “Mirdita turistike 2008”-

versioni ne PDF..............Kliko ketu!

   Në përmbyllje të tërë veprimtarisë “Mirdita turistike 2008”, edicioni i parë, doli në qarkullim dhe libri guidistik në formën e një doracaku tregues dhe përshkrues nën emërtimin “Ardhsh i bardhë në Mirditë!”.

Ky është edicioni i parë i veprimtarisë së planifikuar në kalendarin katërvjeçar të Mirditës turistike, në përshtatje me politikat turistike të afishuara për këtë mandat katërvjeçar të drejtimit të bashkisë Rrëshen. Ky edicion është perceptuar në bazë të një përshkrimi të vendeve historike, kulturore dhe me pozicion të lakmueshëm gjeografik nëpër ashtin e mesëm të Mirditës, që nis me urën e Zogut, vazhdon me Kuvendin Françeskan të Rubikut, me Epiqendrën e Shtetit të parë të Arbërit në Ndërfanë, dhe më pas për të kaluar tek Kuvendet e Shpalit, përmes Udhës së Pajtoneve nëpër gjurmët e Autostradës së re Rrëshen-Kalimash dhe për t’u ngjitur nga Abacia e Oroshit, Sarajet e Kapidanatit, Kompleksi Kishtar i Nënshejtit dhe deri në relievin turistik i shpallur si park në mbrojtje në malet e larta të Oroshit.

Për gjithë këtë aks shtegtues, përmes ekstrateve është sjellë një historik i shkurtër që u bën me dije të interesuarve për ta njohur këtë krahinë dhe për të qenë turistë të ardhshëm në këtë vend gati mitik. Në përmbajtje të librit është dhe një reportazh përshkrues i shtegtimit të bërë sipas një projekti të përbashkët të Bashkisë Rrëshen dhe Axhensisë së Zhvillimit të Zonave Malore (MADA), i cili kurorëzohet me një larmi ritesh të hershme mirditore dhe degustime të prodhimeve-bio të zonës.

Libërthi guidistik, i stilizuar në formën e gudiave moderne, ka një faqosje të këndshme si dhe ndërthurje pamjesh përmes fotosh artistike dhe përthyerje shkrimesh të llojeve të ndryshme, që të josh për ta lexuar.

Kjo është dhe nisma e parë e departamentit të kulturës në Rrëshen, e pallatit të kulturës “Mirdita”,e cila në fakt e kalon cakun e kësaj bashkie me synimin për të promovuar dhe territore të tjera të komunave të Mirditës, ndërsa pritet që edicioni i rradhës të jetë nëpër pikat turistike dhe historike të bashkisë Rrëshen, i organizuar në një mënyrë të veçantë dhe me shumë kreativitet.

Lexo ne lidhje me kete aktivitet duke klikuar ne:  

Nenshejt, edicioni i Pare i Guides Mirdita Turistike2008

Gj.M.