“N’tel të çiftelisë”…

-Promovohet libri i autorit Nikoll Dedaj- 

Pallati i kulturës MIRDITA rezervoi një show impresionues në promovimin e librit me poezi kryesisht këngë popullore të një prej këngëtarëve më të hershëm të ansamblit folklorik “Mirdita”.

Promovimi i konceptuar me një organizim të lirshëm dhe tejet komunikues, i përngjau një spektakli të mirëfilltë duke krijuar kënaqësi të dyfishtë për autorin dhe spektatorin. Miq të shumtë të këngës që nga Tirana,Lezha e rajone të tjera erdhën në këtë ditë të shënuar për autorin,si dhe të ftuar dhe qytetarë të shumtë, për tu bërë pjesë e një dite kulturore entusiaste.

Me fjalë të kursyera për krijimtarinë e Nikoll Dedaj u shpreh radaktori Bardhok Pulaj si dhe Ismet Zusi (qe recitoj dhe nje pjesë), Alma Dedaj,. Bardhok Sulejmani ish drejtor i kulturës që solli mbresa interesante nga ansambli ndër vite, Mark Dedaj këngëtar, Lek Shtinja, Ndue Dedaj, i cili i cilësoj si festa për qytetin evenimente të tilla, kryebashkiaku Gjon Dedaj, që pos falenderimit ka përcjellë mesazhin për të patur një ditë të shënuar të këngëtarëve ndër vite për vitin 2010 për ta shënuar si event të llojit të vecantë. Emocione solli dhe recitimi i Martin Dedaj, një nga poezitë për nënën, ndërsa ështe pritur me ovacione përshëndetja e Sherif Merdanit, duke sjelle emocione te medha per spektatorin dhe emocioni me i forte është përcjellë përmes vargjeve të “NËNËS”, kënduar me aq ngrohtësi nga këngëtari i madh.

Përgjatë këtij show, përshëndetën me interpretimet e tyre këngëtarët Fran Preçi, Prena Beleshi, trio e Lezhës: Petrit Dushi, Kol Murrani, Agron Bardhi, si dhe këngëtarët Nikoll Preci, Kastriot  Kola etj.

Fundi i spektaklit ka ardhur me një përmbyllje të bukur nën ritmet e këngës “Si vendlindja jonë nuk ka”.

A. NDOJA

NJË  ZË  NGA GRUPI  KËNGËTAR  I  MIRDITËS

Ansambli artistik “MIRDITA” mblodhi rreth tij krijuesit dhe këngëtarët më të talentuar, të cilët këngës dhe vargut poetik i dhanë më shumë forcë dhe harmoni, duke sjellë në “podiumet” popullore qëndresën, dashurinë për vendlindjen, freskinë dhe bukurinë e maleve dhe të burimeve natyrore.

Në këtë grup këngëtarësh të burrave të Mirditës bënte pjesë edhe Nikoll  Dedaj, që me pasion dhe pastërti këndoi krahas Fran Vorfit që është quajtur me të drejtë “Kapedan i këngës” në Mirditë. Duke kënduar me këtë grup dhe duke qenë pjesëmarrës në festivalet folklorike lokale e kombëtare, veçanërisht në ato të viteve 1978, 1983, 1988 dhe 2009 në Gjirokastër e në koncerte të tjera, u frymëzua për të kënduar edhe më mirë, si dhe për të shkruar vargje dhe këngë të reja.

Nikoll  Dedaj ka lindur në Malaj, Mirditë, në vitin 1956, në një familje me tradita të mira pune, trimërie dhe kënge. Me këngën dhe çiftelinë u rrit, e po me këtë vegël tradicionale e me këngën vazhdoi shkollën, ku krahas librave, pranë mbante dhe çiftelinë, me të cilën shpesh herë argëtonte shokët e miqtë e tij me ato këngët e bukura të trimërisë dhe të dashurisë.

Këngës dhe çiftelisë nuk iu shkëput edhe në vitet që punoi në organet e Policisë së Rendit në Mirditë si dhe në emigracion në Itali.

Krijimtarinë e tij në vargje e përmblodhi në këtë vëllim: “N’tel  t`çiftelisë.”

                                                               BARDHOK   SULEJMANI