Nisin aktivitetet e festes se Korpit te Krishtit.

Kjo javë po i kushtohet ditë pas dite Festës së Korpit të Krishtit në Rrëshen. Është një program i zgjeruar në vazhdim të traditës së krijuar si bashkëpunim në mes Dioqezës Rrëshen dhe Bashkisë Rrëshen,me veprimtari të shumta kishtare dhe civile.

Janë zhvilluar disa konkurse e olimpiada si në matematikë e lëndë të tjera në mes nxënësve të shkollave Rrëshen dhe Rubik,etj.

Ndërkaq 1 qershori, që përkonte me këtë javë veprimtarish, u festua bukur tek fëmijët e cerdhes Rrëshen,në grupin që drejton Mrikë Përgega, një veprimtari tejet e këndshme ku edhe pse aq të vegjël, 3 vjecarët recituan dhe kënduan këngë të moshës së tyre.

Qendra Kulturore e fëmijëve,shfaqi koncertin e dhënë në Festivalin Mbarëkombëtar të Fushë Arrëzit ku mori cmim të parë,duke sjellë kënaqësi për qytetarët e shumtë që kishin mbushur sallën e pallatit të kulturës. Në këtë koncert të larmishëm, nën drejtimin e Kol Picakut dhe koreografit Fran Gjergji, u performuan live këngë dhe intetpretime në instrumente të ndryshme.

Po këtë ditë që u hap në mënyrë ceremoniale festa e Korpit të Krishtit në pjesën civile të veprimtarive, Dod Pepkolaj, shef i departamenti të kulturës në bashki ka prezantuar dhe programacionin e gjithë kësaj jave.

Kryetari i bashkisë Gjon Dedaj, përshëndeti grupin e fëmijëve dhe gjithë aktorët që po realizojnë një javë të bukur të kësaj feste të shënuar tashmë për bashkinë që ai drejton, duke theksuar se ka rëndësi komunikimi përmes artit si konvencioni më përbashkues i të gjithë ne qytetarëve të këtij vendi që përpiqemi ta bëjmë krahihën tonë sa më të jetueshme.

Në koncertin e fëmijëve të kopshtit,nën drejtimin e drejtoreshës Elida Marku, përshëndeti dhe drejtori i zyrës arsimore Gjon Kola,duke përgëzuar stafin që ka punuar dhe gjithë prindërit e fëmijëve.

 Ekspozita e piktorëve dhe duarve të shkathëta

Në sallën e galerisë së arteve në pallatin e kulturës Rrëshen është hapur dhe ekspozita me piktura e nxnënësve të shkollës 9 vjecare të Rrëshenit,ku ranë në sy punët plot kolorit të piktorëve të vegjel nën drejtimin e mësuesit Viktor Cupi,dhe ku në vecanti shquhen pikturat e Senajda Marku.

Fëmijët e fillores „duart e shkathta“ nën drejtimin e mësueses Tefta Lleshi ekspozuan punimet e tyre interesante,punuar me gjëra të përdorimit të përditshëm, duke sjellë objekte shumë të pëlqyera për vizitorët e shumtë.

Veprimtaritë vazhdojnë.

Pergatiti: A.Ndoja