Një përurim dhe një promovim:

Biblioteka dhe Profili i Bashkisë.

  Të përmbledhura në një ditë, por që sollën një risi në mënyrën e konceptimit të një veprimtarie të pasur kulturore promocionale, kanë qenë përurimi i rikonstruksionit tërësor të bibliotekës Rrëshen, hyrja e së cilës vendoset nga ana e shkollës së mesme Rrëshen po në mjediset e pallatit të kulturës, si dhe promovimi i Profilit të ri dhe Planit Strategjik të Bashkisë Rrëshen.

  Përurimi i bibliotekës

  Në prag të festës së Vitit të Ri bashkia ka bërë dhe përurimin e rikonstruksionit total të bibliotekës Rrëshen, e cila vendoset në një pozicion të ri duke përftuar dy salla ekspozimi të librit me fond të hapur, kryesisht atë të fëmijëve, si dhe një sallë tejet komode për lexim dhe ekspozim. Kanë qenë dy mjedise tërësisht të abandonuara prej 10 vitesh që janë kthyer në funksion të qytetarëve, po ashtu duke përftuar një sallë të re nga ana e portalit anësor të skenës, gjë që ka sjellë dhe modelimin e tërë kësaj hapësire me dy mjedise të tjera po funksionale për anekset e skenës së madhe të pallatit. Gjithashtu ndërhyrje janë bërë në fasadën e jashtme dhe tarracë si dhe dy lulishte të reja para bibliotekës, e cila që nga këto ditë do të mbajë të shënuar në hyrje të saj emrin “Gjon Gazulli”, vendosur nga këshilli i bashkisë pas propozimit të bërë nga ana e një grupi studiuesish, shkrimtarë dhe gazetarë mirditorë.

Fjala pershendetese e pergjegjeses Bardhe Marku.

Investimi rikonstruktues u bë i mundur në sajë të financimit që dha Ministria e Kulturës në një shumë prej 2 milion lekësh të reja. Por me ndihmën edhe të donatorëve privatë, u bë e mundur që projekti të mos lihej në mes, madje u përftua dhe një sallë tjetër në pallatin e kulturës, galeria e arteve figurative që do të shërbejë edhe si sallë mbledhjesh minimalisht me 40 karrike.

Në një ambient festiv, u bë dhe preja e shiritit të përurimit nga n/prefekti Gjon Pjetri dhe drejtuese e CANGO-s Anduena Shkurti. Më pas ceremonia u krye në mjediset e bibliotekës. Fjalën përshëndetëse e mbajti shefi i departamentit të kulturës në bashki Alfred Shtinja, i cili në mes të tjerash theksoj: “Çdo përurim që bëhet është një kënaqësi për impaktet dhe shërbimet më cilësore që sjell për qytetarët, por kur bëhet për një bibliotekë kënaqësia vjen e shumfishuar dhe që sot është më e domosdoshme se kurrë. Ne kemi nevojë që njerëzit t’i afrojmë tek libri, dhe për këtë t’u krijojmë kushte sa më të mira, duke nisur nga vetë libri për të mos e lënë në mëshirën e fatit. Ajo që është akoma më e rëndësishme sot lidhet dhe me faktin, qoftë dhe simbolikisht kjo bibliotekë u afrohet përballë nxënësve, të rinjëve që me domosdo librin duhet ta kenë mikun e tyre më të ngushtë. Ndërsa vetë emri i vënë kësaj biblioteke me miratimin e këshillit bashkiak, që lidhet me një nga simbolet unikale të dijes njerëzore prej qindra vitesh me rrënjë mirditore, do të thotë akoma më shumë për këtë rikonstruksion total të bibliotekës që po përurojmë sot.

Dukeparë numërin gjithnjë në rritje të lexuesve, dhe prirjes natyrale të mirditorit për të qenë pranë librit e dijes, jemi të bindur se me këtë investim, qoftë dhe simbolik, kemi bërë më të mirën e mundshme në drejtimin e duhur. Ashtu si mendojmë se me nxitjen e këtij projekti do të vazhdojmë për të përftuar një qendër libri në standarte moderne.

Për punën cilësore të bërë në këtë objekt të rëndësishëm kulturor, falenderojmë Ministrinë e Kulturës që mundësoj financimin e këtij rikonstruksioni, por dhe disa donatorë që dhanë kontribute për të bërë të mundur avancimin e projektit të nisur. Ndër ta falenderojmë projektuesin ing.Pjetër Pjetri,specialistët e urbanistikës në bashki Fran Jushi dhe Tonin Picaku, drejtuesin e AVA Shpk Ardian Gjoka, bisnesmenët Ndue  Shkurti e Rexhep Ruçi si dhe Gjovalin Jakun për dy lulishtet e bëra jashtë projektit. Gjithashtu vlen të përgëzohet për punën e mirë firma “Gojani”, e përfaqësuar nga specialisti Sandër Gjoni si dhe të gjithë punëtorët e specialistët që pos punës rikonstruktuese kryen dhe punime artistike.

Dhe së fundi falenderojmë gjithë ata kontributorë që mundësojnë pasurimin me libra të kësaj biblioteka publike si dhe lexuesit e shumtë e sidomos masën e fëmijëve dhe të rinjëve. Le ta gëzojmë këtë bibliotekë, duke uruar se numri i lexuesve do të vijë gjithnjë në rritje.”

Më pas ka bërë një historik të shkurtër të bibliotekës në vite përgjegjësja Bardhe Marku, duke sjellë shifra, data dhe fakte dhe kryesisht faktin e rëndësishëm se nga nisja me disa kopje librash sot fondi e kalon shumën e 70 mijë ekzemplarëve, duke e rradhitur në bibliotekat e pasura të vendit.

Kryetari i bashkisë Gjon Dedaj duke përgëzuar tërë faktorët për punën e bërë theksoj se si drejtues i bashkisë gjithnjë e ka patur në fokus të punës së tij integrimin e faktorëve kulturorë në jetën e komunitetit për të sjellë një ansambël të pasur e dinjitoz objektesh dhe ekipesh që shërbejnë kulturalisht në lartësinë e duhur për komunitetin ku drejton.

Përshëndetje bëri dhe nëprefekti Gjon Pjetri duke e uruar bashkinë për punën e bërë ashtu si dhe gjithë aktorët që drejtojnë institucionet e kulturës, të cilët kanë sjellë ndryshime të dukshme jo vetëm në drejtim të përmirësimit të shumë institucioneve e ambjenteve thuajse të abandonuara prej vitesh, por dhe mënyrën e perceptimit për t’u shërbyer banorëve të kësaj bashkie e më gjerë.

Gjithashtu kanë përshëndetur dhe pjesëmarrës të ndryshëm në këtë ditë përurimi, Ndue Dedaj, Preng C.Lleshi, Gjon Nikoll Dedaj e të tjerë duke falenderuar për këtë mjedis thuajse të ri dhe me një koncept modern sa i përket shërbimit ndaj lexuesve.

Promovimi i profilit të Bashkisë

  Po këtë ditë në mjediset e bibliotekës së re, është bërë dhe promovimi i profilit të bashkisë Rrëshen dhe plani strategjik i hartuar në bashkëpunim me Programin e Ngritjes së kapaciteteve të Qeverisjes Vendore, CANGO. Është një botim serioz në gjuhën shqipe dhe anglisht, duke përmbledhur një ekstrat të dhënash që do të shërbejnë për njohjen më nga afër të bashkisë nga kushdo i interesuar. Janë të dhëna të rrjeshtuara në rubrika të shumta që nga hyrja, pozita gjeografike, demografia, resurset, historiku, bimët dhe bujqësia, klima, bisneset, buxheti, investimet dhe informacione të shumta deri tek një “miniçelës” informativ i bashkisë ku merren informacione të detajuara. Libri-profil është dizajnuar larmishën dhe profesionalisht nga një studio serioze në Tiranë dhe vetë stilizimi i saj bëhet joshë përmes dhjetëra fotove tipikë nga zona e rrëshenit si në qytet dhe fshatra.

Falenderimi:

Falenderojmë grupin e punës të ngritur nga Bashkia Rreshen si dhe ekspertët dhe stafin e Programit të Ngritjes së Kapaciteteve të CANGO-s, të cilët ndihmuan në procesin e zhvillimit të Profilit të Bashkisë Rrëshen dhe mbështeten teknikisht përgatitjen e tij.

Falenderojmë gjithashtu për ndihmesën teknike të dhënë agjensine MGS (Urban International Associates – Ortakët Nderkombëtarë qytetas) në Bullgari.Përmbajtja dhe printimi i ketij Profili nuk do të ishin mundësuar pa mbështetjen financiare të CAFOD UK (Fondi Katolik i Anglisë dhe Uellsit për Zhvillim përtej Detit),të cilin gjejmë rastin ta falenderojmë

Përshëndetja e kryetarit te Bashkise z. Gjon Dedaj

Shumë të dashur qytetarë!

Bashkia Rrëshen vazhdon të punojë për detyrën e saj parësore dhe ka rastin t’ju paraqesë risitë e ndryshimit e zhvillimit dhe të kontribuojë që të jetë e banueshme për të gjithë.

Në misionin dhe kujdesin e vet të shërbimit dhe shërbesës, në respekt të punës së gjithë paraardhësve dhe në situatat e ndryshme konkrete që po kalojmë sëbashku, Bashkia Rrëshen ju ofron Planin e Ri Strategjik të Zhvillimit dhe Profilin e saj, si produkte të një pune efektive njëvjeçare të gjithë departamenteve, këshillit bashkiak, specialistëve të fushave të ndryshme, grupeve të interesit dhe komunitetit, gjithnjë me mbështetjen e këshilltarëve të CANGO-s.

Ky dokument është një mjet i dobishëm për të na ndihmuar të orientohemi sëbashku drejt më të mirës në këtë realitet social dhe per të përballuar me forcën dhe dritën e moralit e të ligjit, udhët e përshkrueshme të drejtësisë, paqes dhe zhvillimit të qëndrueshëm.

Jam i bindur se në këtë dokument çdo i interesuar do të mund të gjejë elementët bazë të domosdoshëm (shkencorë, ekonomik, teknik, socilogjik e psikologjik) për të kërkuar zgjidhje për problemet që lidhen me jetën dhe zhvillimin tonë, për të ruajtur vlerat më të mira të së shkuarës e të së tashmes dhe për të qenë më afër botës së qytetëruar, me përgjegjësi për të ardhmen dhe fëmijet tanë.

Ky dokument është bërë i mundur falë bashkëpunimit dhe ndihmës së shumë njerëzve dhe falenderimi im iu drejtohet të gjithëve, me shpresën dhe urimin që mbas leximit të këtij materiali, akoma më shumë do të frymëzohen për t’u angazhuar më aktivisht, për të patur një bashki më efektive dhe më efiçente, në produktet e së cilës të jetë gjithnjë e mira e përbashkët, duke respektuar dinjitetin e gjithësecilit.

Një falenderim i detyrueshëm për donatorin mbështetës CANGO, puna e të cilëve nuk ka qenë gjithmonë e lehtë, pasi jo rrallë na ka munguar gjuha e informacionit apo termave të kërkuar, por besoj se sëbashku kemi hyrë tashmë thellësisht në misionin e ngarkuar që kjo bashki të jetë në të njëjtën kohë më shërbyese dhe më njerëzore përmes dijes dhe respektit.

Ky dokument nuk është thjesht një dëshirë apo vetëm një ëndërr, por një bashkim mundësish dhe një sfidë që do të bëhet realitet përmes angazhimit tonë të përbashkët, mbështetjes së çdo niveli qeverisje dhe donatorëve pa dallime politike a pozite gjeografike, për shkak feje a paragjykimi, për një aleancë të qëndrueshme qytetarë –qeverisje! Ju faleminderit!...”

Botimin e këtyre dokumentave e kanë përshëndetur dhe drejtues të CANGO-s, si dhe pjesëmarrë në këtë takim, ku është theksuar se e rëndësihme mbetet faza e angazhimeve dhe realizmit.  Më pas nga ana e kryetarit të bashkisë në mënyrë simbolike janë dhuruar libra profil për pjesëmarrësit ashtu si dhe dokumenti i planit strategjik, të cilët tashmë e pasurojnë ”bibliotekën” e dokumentave promocionalë të bashkisë Rrëshen duke hedhur një hap  të sigurtë në forcimin e institucionit.

Shënim: Të dy dokumentet, si profilinm dhe planin strategjik së shpejti do të vendosen në faqen zyrftare të bashkisë në gjuhën shqipe dhe në anglisht.

Përgatiti: Gj.Marku