Niset grupi i dytë i nxënësve të Rrëshenit për në SHBA

-Përcillet në mënyrë ceremoniale vullnetari i Korpusit të Paqes Patrick O’Brien.

Është përcjellur për në Shtetet e Bashkuara të Amerikës grupi i dytë i nxënësve të shkollës së mesme të Rrëshenit, të cilët për të dytin vit radhazi, do të përjetojnë një nga vizitat e shënuara në “Tokën e Ëndërrave”, përmes një kampi veror që do të zgjasë plot 1 muaj.

Iniciues i këtij shtegtimi interesant është sërish vullnetari i Korpusit të Paqes Patrick O’Brien, i cili prej dy vitesh jep lëndën e gjuhës angleze në shkollën e mesme të Rrëshenit por që është njohur dhe si një person energjik, i cili tej lëndës mësimore, ka angazhuar dhjetëra nxënës në veprimtari të shumta, kurse jashtëshkollore dhe deri tek teatrot në anglisht apo variete të ndryshme me skeçe në këtë gjuhë, shoë që u dha për qytetarët para pak muajsh në pallatin e kulturës si dhe në Korçë e zona të tjera.

Vullnetari i Korpusit të Paqes, ndër më aktivët që kanë ardhur deri më tash në Mirditë, ka ditur të sjellë dhe aktivizojë energji pozitive tek nxënësit anglishtfolës të këtij qyteti të vogël verilindor duke modeluar një profil mësuesi për t’iu referuar dhe nga mësuesit vendas për ekspresivitetin dhe saktësinë e manifestuar qoftë në njohuritë e dhëna, por dhe organizimin e veprimtarive të shumta për të formuar tipin e nxënësit praktik e aktiv.

E vecanta e këtij grupi kësaj rradhe, do të jetë dhe vetë e ardhmja e vullnetarit të Korpusit të Paqes Patrick O’Brien, i cili tashmë largohet nga Mirdita dhe Shqipëria për një specializim të mëtejshëm në Bolonja, ndaj ky moment është përcjellë përmes një ceremoniali të organizuar që një natë më parë pikërisht në:

Zyrën e Kryebashkiakut të Rrëshenit

Përmes një gjesti protokollar, vullnetari i Korpusit të Paqes dhe mësues i anglishtes në shkollën e mesme Rrëshen, është pritur në zyrën e kryebashkiakut të Rrëshenit Gjon Dedaj, i cili e ka përgëzuar O’Brien për gjithë punën e bërë, pasionin e ushtruar jo vetëm në dhënien e lëndës së anglishtes, por mbi të gjitha për gjurmën e lënë në këtë komunitet, gjurmë të cilën e ndjejmë tashmë të gjithë, në cdo derë të qytetit dhe të Mirditës. Misioni juaj, na ngjan me misionin e një shëruesi, është shprehur zoti Dedaj, një mjek që fundja na ka shëruar disa plagë tonat, duke e cilësuar si pjesë e kontributit që kombi amerikan ka dhënë për Shqipërin e shqiptarët, një përpjekje e fortë për rizgjimin tone; ju do të mbeteni pjesë e historisë dhe kulturës në Mirditë, dhe se vlerat tona tashmë e kanë një avokat të fortë. Por dhe pas jush shohim se kemi të tjerë kolegë tuaj që do të na ndihmojnë në gjurmët e lëna nga ju dhe paraardhësit tuaj. Në këtë sens kryebashkiaku Dedaj i ka thënë vullnetarit amerikan se në njëfarë mënyre ne po ua kthejmë nderën përmes një gjesti simbolik kujtese duke i dhënë medaljen e mirënjohjes dhe një pamje të Katedrales së Rrëshenit si simbol që lidh dy qytetërimet e kombeve tona, kombit të madh të qytetërimit të krishterë si Amerika dhe atij shqiptarë me rrënjë të hershme në krishterim.

Patrick O’Brien duke marrë dhuratat simbolike dhe mirënjohjen e adresuar në emër të bashkisë, është shprehur se janë dhurata të cilat do t’i mbaj përgjithmonë, “duke e patur në kujtesën time këtë periudhë nga më të bukurat e jetës sime të kaluar këtu në Rrëshen në mes këtij komuniteti të mrekullueshëm. Suksesi që kam patur më jep shumë kënaqësi dhe e ndaj me të gjithë ata njerëz të mrekullueshëm që kam punuar me ta. E di që do të më marrë malli shumë për Shqipërinë dhe Rrëshenin, ka thënë ai”.

Ndërkaq ka ardhur ditën e dytë:

Takimi i përcjelljes

Pikërisht ditën tjetër në një mjedis privat, është organizuar një kokteil ku merrnin pjesë 13 nxënësit që do të jenë në grupin e kampit veror për në Teksas, si dhe vullnetarë të tjerë të Korpusit të Paqes dhe përfaqësues nga ambasada amerikane.

Më së pari ka përshëndetur drejtori i shkollës së mesme Rrëshen Nik Nikolli, i cili vlerësoj në meër të shkollës punën e bërë prej dy vitesh të vullnetarit të Korpusit të Paqes Patrick O’Brien në këtë shkollë duke dhënë kësisoj modelin e një mësuesi dhe organizatori. Po ashtu dhe gjithë aktorët që ndihmuan në këtë shtegtim të mrekullueshëm të këtij grupi nxënësish që nga ambasada Amerikane që ka dhënë plot 10 mijë dollarë, bashkinë Rrëshen, kompaninë Bechtel, bisnesin mirditor e të tjerë.

Këtyre donatorëve përshëndetje u ka adresuar dhe vetë vullnetari i Korpusit të Paqes O’Brien e të tjerë. Në emër të këshillit të bashkisë përshëndeti kryetari i këshillit Nikolin Kacorri, si dhe mësues e të tjerë të pranishëm.

Ndërkohë që nga ana e nxënësve që do të shkojnë në Amerikë, janë performuar disa skece në anglisht. Të gjithë të pranishmët e përshëndetën grupin pjesëmarrës dhe shtegtues për në Amerikë si dhe uruan për punën e kryer si dhe sukseset që do ia dëshironin vullnetarit të Korpusit të Paqes Patric O’Brien, të cilit shkolla e mesme i ka dhuruar në shenjë nderimi e respekti për kontributin e dhënë portretin e Shenjtores shqiptare Nënë Tereza. 0.6. 07. 08

Gj. M