“Planetare” libri më i ri me poezi i Ndue Dedës, në Ditën Ndërkombëtare të Librit.

 Libri më i fundit i z. Ndue Dedaj i titulluar “PLANETARE” gjithnjë e më shumë ka nxitur vëmendjn e lexuesit si mirditas ashtu edhe më gjerë. Jo rastësisht një grup intelektualësh dhe krijuesit nga më të njohurit nga qarku i Lezhës e kanë zgjedhur këtë libër me poezi, për ta promovuar atë në Ditën Ndërkombëtare të Librit. Pjesmarrja ka qënë mjaft e gjerë në  këtë takim letrar kushtuar librit më të fundit “Planetare”, i cili nga të pranishmit u vlerësua si kulmi i krijimtarisë së të poetit Ndue Dedaj. Veprimtaria me të cilën Biblioteka Publike e Qytetit të Lezhës ka evokuar Ditën Ndërkombëtare te Librit, që tashmë ka nisur të kthehet në traditë është zhvilluar pikërisht më 23 prill në festën e librit e shpallur nga UNESCO, në ditën që përkon me vdekjen e Servantesit dhe Shekspirit. Drejtori i Bibliotekës Gjergj Shyti foli mbi profilin krijues të Ndue Dedës, veçanërisht si poet dhe studiues, por dhe si publicist, duke u ndalur tek libri më i fundit poetik. Kurse drejtoresha e Gjimnazit të Lezhës Nikoleta Prendi, tha se autori Dedaj ishte i ftuar i përbashkët i Bibliotekës dhe Gjimnazit në këtë ditë të shënuar të librit, pasi poezia e tij kishte tërhequr dhe letrarët gjimnazistë, që në takimin letrar promovues recituan disa nga poezitë e zgjedhura të autorit. Ata kishin punuar me përkushtim nën drejtimin e mësueses së letërsisë Alketa Reçi. Pastaj e mori fjalën poeti i njohur Ndoc Gjetja, i cili e vlerësoi lart krijimtarinë poetike të poetit Ndue Dedaj sidomos në këtë libër, duke e qasur atë me emrat më të shquar të poezisë shqiptare.

 Poeti i mirnjohur lezhjan tha, se ndjehem i privilegjuar që marr pjesë në këtë promovim, pasi unë kam marrë shumë herë pjesë në promovime, por në këtë rast ndjem më i nderuar, aty ku shpirti im është më i lidhur me një koleg. E kam ndjekur krijimtarinë e z. Ndue Dedaj rrjesh për rrjesht e jo libër për libër. Nuk ka çoftë edhe një rrjesht që të mos ja kem lexuar, jo vetëm librat por edhe deri artikujt në gazeta të ndryshme. Kaq shumë jam i lidhur me krijimtarinë e tij, për arsye se që te libri i parë unë kam lidh rrënjët shpirtërore me këtë autor. Kam redaktuar librin e parë ashtu edhe librin e dytë, e ky është i treti.  Kam idenë se Ndueja ka arritur pikun me këtë libër. Te ky libër unë u befasova për arsye se vërej një pjekuri që nuk e kisha të parashikuar. Kur pash këtë libër u befasova pasi këtu është autori me plot kuptimin e fjalës. Besoj se do të dijë ta ruajë vetëveten pasi dihet se ku ka maja ka edhe zbritje. Por unë që ja di kapacitetin e them me bindje se teposhte nuk do të ketë. Këtu kemi të bëjme me një genomë të vërtetë poetike, është një genomë e pastër, është poezi esull, tepër esull. Në të nuk ka asnjë fije barishte poetike përfundoi fjalën e tij poeti Ndoc Gjetja. Më tej njëra nga punonjëset e bibliotekës bëri një përmbledhje të dy reçensave të shkruara nga poetët në emigracion Pjetër Jaku (Detroit), dhe Zef Zefi (Firence) që u priten me mjaft interes. Mësuesi i Popullit Mark Vuji ishte një tjetër folës, që u ndal sidomos në poezinë “Të shohim bukur” që i biri, Besiani (i cili gjithashtu shkruan poezi) ia kushton të atit dhe që botohet si një dedikim në hyrje të librit “Planetare”. Folën gjithashtu studiuesi dhe publicisti Gjovalin Gjeloshi, botuesi Frano Kulli, mësuesja Arleta Vuka, prifti poet Dom Beni, dhe shumë të tjerë. Pastaj pjesëmarrësit u përshëndetën nga kryetari i Bashkisë së Lezhës, Viktor Tusha dhe ai i Rrëshenit Gjon Dedaj.

Në fund, poeti autor i “Planetare” z. Ndue Dedaj duke falenderuar për pjesmarrjen e gjerë të kapacitetve intelektuale të qarkut Lezhë, tha se nuk është aspak e lehtë ta kalosh “provën e Lezhës”.  Ai ka vlerësur komunikimin shumë elitar por edhe përkushtimin e jashtëzakonshëm që kanë kryetarët e Lezhës në vijimsi. z. Dedaj ka përshëndetur në mënyrë të posaçme Bibliotekën e Lezhës, drejtorin Gjergj Shyti, gjimnazin e Lezhës për përkushtimin e tyre në Ditën Ndërkombëtare të Librit.  

Përgatiti: A. Ndoja