Kryetari i Bashkisë Rrëshen z. Ndue Gega pret Presidentin e Republikës z. Bamir Topi i cili akordon dekorata për dy meshtarë dhe një mësues.

-Gega: Lutemi të rrikthehet gjykata, prokuroria dhe institucionet e tjera-

9 vite më parë në qytetin e Rrëshenit në një ceremoni madhështore u përurua Katedralja e Dioqezës së Rrëshenit, një vepër madhështore e ndërtuar falë impenjimit dhe kujdesit të drejtpërdrejtë të Admistratorit Apostolik të Dioqesës së Rrëshenit, sot Ipeshkëv, imzot Kristoforo Palmieri. Ndersa me heret, po ne Rreshen u themelua Dioqeza e Rreshenit me nje shtrirje me te madhe se sa Mirdita e sotme administrative.  Sot në përvjetorin e 15-të saj, Presidenti i Republikës z. Bamir Topi, me propozimim të Bashkisë Rrëshen akordoi medaljen “Nënë Tereza” për Ipeshkëvin Palmieri, dhe Atë Lino Nikolai. Gjithashtu Presidenti i Republikës ka akorduar medaljen “Naim Frashëri” për mësuesin e mirnjohur Preng Pjetër Filopati, pas vdekjes, me propozim të Shoqatës së përndjekurve Politikë të Mirditës.

Pikërisht me rastin e këtyre eventeve të rëndësishme për qytetarët e Mirditës, sot Presidenti i Republikes se Shqiperise z. Bamir TOPI ishte ne nje vizitë në qytetin e Rrëshenit. Në cilësinë e postit që mban, z. TOPI dekoroi me urdhërin e lartë “Nënë TEREZA”  dy meshtarë të Kishës Katolike, Imzot Kristoforo Pamieri dhe Padër Lino Nikolai, per kontributin e tyre shumë vjecar në Mirditë. Po ashtu Presidenti TOPI ka dekoruar me urdhërin e lartë “Naim Frashëri” mësuesin rilindas të Mirditës, z. Preng Pjetër Filopati, pas vdekjes.

Z. Bamir Topi i cili prej tre vitesh është edhe Qytetar Nderi i Rrëshenit, është takuar me z. Ndue Gega në zyrën e tij, ku kanë shkëmbyer mendime mbi zhvillimet në Rrëshen dhe ë gjerë. Në këtë takim dhe gjatë gjithë ceremonive kanë qënë të pranishëm edhe Nunci Apostolik në Shqipëri, Imzot Ramiro Moliner Ingles, Ipeshkvi Imzot Kristoforo Palmieri, Konsulli i Italisë në Shkodër, Roberto Andreoti, etj.

Ajo c’far ra në sy është se nëse qyetarët e Rrësheni dolën masivisht për të pritur Njeriun e Parë të Shtetit, drejtuesit e pushtetit vendor qe dirigjohen nga partia ne pushtet, pa piken e turpit  nuk e pritën dhe as nuk e shoqëruan Kreun e Shtetit, kur protokolli shtetëror e kërkon këtë. Të gjithë u fshehën si struci duke u distancuar nga tradita mikpritëse e trevës tonë, por edhe nga detyrimet protokollare.  Përjashtim ka bërë deputeti i parlamentit z. Ndrec Dedaj i cili ka qënë i pranishem  gjatë gjithë ceremonisë.

Pas takimit me banorë të shumtë që kishin dalë për të pritur, z. Bamir Topi zhvilloi një takim në zyrën e Kryetarit të Bashkisë së Rrëshenit, ku u prit nga Kryetari Ndue Geg Kolaj. Pas shkëmbimit të përshëndetjeve të ngrohta, z. Ndue Gega në një panoramë të shkurtër para Presidentit dhe autoriteteve më të larta kishtare në vend, theksoi se Bashkia Rrëshen ka 9 mijë banorë, ka 14 fshatra. Pra problematika është gjërë pasi është bashki dhe komunë. Kjo është specifike për bashkinë tonë. Ka një shkollë të mesme me 700 nxënës, ka dy shkolla 9 vjecare më 1500 nxënës. Ka një bisnez të vogël, ndërsa problematika është pothuajse e njëtë në të gjithë qeverisjen vendore. Megjithatë Rrësheni është afër Tiranës,  kështu që qytetarët nuk i kanë humbur shpresat për një jetë më të mirë, për një standard më të mirë jetese. Është një qytet përgjithësisht i qetë dhe bujqit kanë filluar ti kthehen punimet të tokës, të jenë më të kujdeshëm, të investojnë, sidmos në vershtari. Kemi një fshat këtu afër, Bukmira, që i është rikthyer traditës së vreshtarisë, por edhe tek preriferia e qytetit po vërehet një tendencë e tillë.

Avantazh i mirë për ne është padyshim autostrada Durrës-Kukës, por edhe një rrugë tjetër që së shpejti do të lidhë Mirditën me Matin, e cila do jëtë një ndihmesë e madhe për banorët e zonës tonë. Problematika është edhe më e gjerë, por ky është një përshkrim i shpejtë i situatës.

z. President ka ndërhyrë duke theksuar se unë ju falenderoj shumë, ju falenderoj z. Kryetar për pritjen e ngrohtë, falenderoj të gjitha autoritetet kishtare të pranishëm këtu. Z. Topi tha se të jeni të sigurtë se përveq të tjerash jam edhe Qytetar Nderi, unë marr gjithnjë informacion, bile ndjehem jashtëzakonisht mirë në kryeqendrën e Mirditës, në Rrëshen në një krahinë për të cilën mund të flasim me orë. Ju flisni këtu si drejtues i këtij qyteti, por për Mirditën flasin historianët, flasin shumë qytetarët që janë të apasionuar me historinë, me traditën e këtyre banorëve, natyrisht për të gjithë specifikat që ka kjo krahinë e cila fillon me një emër që është thellësisht autokton dhe tingëllon shumë bukur në shqip..MIRDITA.   Pra në cdo moment ka sinjifikatin e vet të jashtë zakonshëm.

Pra jemi sot këtu për të përkujtuar 15 vjetorin e Dioqezës. Pa dyshim që kjo zonë ka qënë e lidhur me katolicizmin dhe me të gjitha vlerat e mira që ky drejtim i fesë ka inspiruar tek banorët e kësaj zone, për ti bërë ata njerëz besimtarë, njerëz paqësorë. Këtë ju e dëshmuar vetë në periudhat më të vështira të tranzicionit, dhe në periudhën e 97-s. Ky qytet sikurse unë e kam informacionin shumë mirë ka mbetur i pa prekur nga asnjë lloj elementi si nga pikpamja e dhunës fizike apo psikologjike, pra duke demonstruar tek të gjithë qytetarët e Shqipërisë, virtyte që janë rrënjosur shumë tek popullsia e kësaj krahine. Ne do kemi rastin të përkujtojmë në mënyrë specifike përvjetorin e Dioqezës, ndërkohë ju falenderoj për këtë mikpritje të veqantë që më rezervuat.

Pas kësaj presidenti Republikës z. Bamir Topi i shoqëruar nga Kryetari i Bashkisë Rrëshen z. Ndue Gega vijuan ceremoninë në sallën e Qëndrës Kulturore e cila ishte tejmbushur me qyetarë të shumtë. Në fillim e ka marrë fjalën z. Ndue Gega i cili ka thënë:

I nderuar z. President i Republikës!

z. Ambasador i Vatikanit!

I nderuar z. Konsull!

Të nderuar misionarë

Të nderuar Priftër e Motra

I nderuar imzot. Kristoforo Palmieri

I Nderuar Imzot Lino Nikolai!

 Të gjithë ne jemi të gëzuar që midis nesh, në ditëlindjen e dioqezës së Rrëshenit merr pjesë Presidenti i Republikës por njëkohësisht edhe qytetar nderi i qytetit tonë, i Bashkisë Rrëshen. Mirdita e historisë, Mirdita e respektuar dhe e nderuar, Mirdita e Katedraleve, sic e përshkruan në librin e tij kolegu ynë, studiuesi Ndue Dedaj, është kthyer përsëri në Tokë të Katedraleve. Dhe në këtë mision kontributi i misionarëve ka qënë mjaft i madh.

Sot me të drejtë Presidenti i Republikës  ka ardhur këtu për të shpërblyer nga pikpamja morale dy misionarë, Kristoforo Palmieri dhe Lino Nikolai. Ne i jemi mirnjohës për ardhjen e Tij. Sot është festë, megjithatë edhe në emrin Tuaj unë do ti bëj një kërkesë Presidentit të Republikës….Që mirdita ta ruajë natyrën e vet autentike, natyrën e vet autoktone, edhe si president, edhe si Kryetar i KLD-së, që Mirdita të mos mbetet vetëm si një ndarje administrative, nënndarje e Qarkut, ju lutemi  të rrikthehet Gjykata, të rrikthehet Prokuroria dhe disa institucione të tjera ku qytetarët të marrin në kohë shërbimet. Edhe një herë ju uroj punë të mbarë misionarëve, ju uroj ditlindjen Dioqezës dhe meqë jemi në prag të festave tradicionale, Ju uroj të kaloni gëzuar Krishtlindjet dhe Vitin e Ri.

Mejëherë në podium është ngjitur presidenti Bamir Topi i cili në përshëndetjen e tij ka theksuar:

“I nderuar zoti Gega, Kryetar i Bashkisë së Rrëshenit,

I nderuar Shkëlqesia Juaj Ramiro Moliner Ingles, Nunci Apostolik.

Të nderuar autoritete vendore,

Të nderuar klerikë,

Imzot Kristoforo Palmieri,

Të nderuar bashkëqytetarë,

 Ndihem jashtëzakonisht i nderuar dhe i privilegjuar që marr pjesë sot në një ceremony jashtëzakonisht të bukur, shumë kuptimplote, pikërisht në kryeqendrën e Mirditës. Dhe besoj nuk ka gjë më të bukur se të përshëndesësh ‘Mirdita!’ pikërisht në Mirditë. Ndër vite, pavarësisht angazhimit profesional apo politik, por sidomos sot, si President i Republikës, jam ndjerë dhe ndihem në Mirditë, si në shtëpinë time. Natyrisht që këto nuk janë fjalë që vijnë thjesht për shkak të një komunikimi, të një fjalimi, por këto janë fjalë që vijnë nga një lidhje e hershme me këtë zonë nëpërmjet mjaft shokëve të mi dhe kolegëve, banorëve të kësaj zone, të cilët kanë kontribuar në mënyrë konstante në të gjitha sfidat, qofshin këto sfida të profesionit të tyre, por qofshin këto sfida për demokracinë.

Unë dëshiroj t’i përshëndes të gjithë, t’ju përshëndes juve që jeni të pranishëm këtu dhe nëpërmjet jush, të gjithë banorët e Mirditës! Për mua natyrisht që ka qenë një gëzim i veçantë, por i kthyer në detyrim, qysh nga momenti kur autoritete vendore të këtij qyteti, tre vite më parë, më propozuan dhe më miratuan si “Qytetar Nderi”. Kështu që jam njësoj si ju, ndihem njësoj si ju, me të gjitha gëzimet që keni ju, dhe natyrisht me të gjitha hallet. Pra, ju përshëndes bashkëqytetarët e mi!  Tani, unë dëshiroj të shpjegoj pse Mirdita është kaq e përzgjedhur. Mirdita me historinë dhe njerëzit e saj është një binom unik qëndrese e madhështie. Që në agimin e historisë, ajo u identifikua me emrin që ka sot, duke ruajtur lirinë, besimin, doket, dinjitetin dhe kanunin e saj legjendar.

Pas epopesë së ndritur të Gjergj Kastriotit, mirditorët luftuan pareshtur e si luftëtarë hijerëndë do t’i njihte gjithë Evropa, të gjitha kronikat e historianëve të saj! Ju i qëndruat çdo pushtuesi duke dhënë shembullin e madh të krenarisë dhe identitetit kombëtar të patjetërsueshëm. Mirditorët, princat e tyre, Gjomarkajt e deri tek Preng Bib Doda, kanë lënë gjurmët e tyre në Rilindjen Kombëtare dhe deri tek Pavarësia e Shqipërisë. Të tjerë mirditas, si Abati Preng Doçi apo At Ambroz Marlaskaj, ecën ngjitmas me fatin e Shqipërisë duke u shndërruar në ikona të qëndresës, të kulturës, të alfabetit shqip, të Kishës Shqiptare të mbarë kombit!

Në panteonin e Atdheut, aty ku përjetësia dhe mirënjohja e brezave bëhen një, burrat e sojit, Mirdita i pati me shumicë, priftërinj katolikë, intelektualë e malësorë të zakonshëm, të cilët, së bashku në epokën e modernitetit, organizuan njërën prej qëndresave më heroike ndaj komunizmit në krejt Lindjen evropiane, jo pak, por në gati 10 vjet, pothuajse çdo fis i Mirditës i dhuroi historisë sonë një martir. Me pushkën e qëndresës dhe me emblemën e identitetit shqiptar, me flamurin kuq e zi në dorë, bijtë e kësaj familje fisnike do të shndërrohen në udhëheqës e dëshmorë kundër dhunës dhe diktaturës komuniste! Nder për jetë të gjithë atyre që bënë kaq shumë për Shqipërinë!

Mirdita juaj, Mirdita jonë dhe Mirdita e gjithë Shqipërisë simbolizon traditën më të vyer shqiptare, ligjet autoktone që frymëzuan At Shtjefën Gjeçovin të mbledhë monumentin kulturor të Kanunit, qëndresën ndaj çdokujt që kërkonte ta dhunojë, besimin e fortë e të patjetërsueshëm, identitetin evropian, fuqinë e fjalës së shkruar, urtësinë e saj, fuqinë e fjalës që shpreh besë dhe burrni.

Me këtë respekt dhe frymëzim për historinë, jemi sot së bashku për të festuar 15-vjetorin e Dioqezës së Rrëshenit, njërës prej simboleve tona kulturore më të bukura. Është rasti për të theksuar se klerikët katolikë të Mirditës, gjithmonë, dje e sot, janë shfaqur si elitë e lidhur me banorët dhe gjeografinë e vendit! Gjatë persekutimit komunist, ashtu si edhe më përpara, u bënë martirë të besimit dhe fjalës së lirë, aq sa tashmë kanë ndërtuar kultin modern e pozitiv, kultin e pashkatërrueshëm të klerikut shqiptar!

Po ashtu, në periudhën e tranzicionit, gjithsecili prej jush ka patur rast ta ndiejë dorën e tyre, forcën e besimit, përmasën e humanizmit, jo vetëm me fjalë, por edhe me gjeste konkrete në përputhje me nevojat dhe kërkesat që keni patur! Unë dua t’i përgëzoj gjithashtu institucionet fetare në Rrëshen, si dhe klerikët e tyre, për kontributin e vazhdueshëm në konsolidimin e harmonisë fetare në vend, vlerë dhe pasuri e jashtëzakonshme e shoqërisë dhe e kombit tonë.

Me këtë vetëdije, kam kënaqësinë dhe nderin sonte të rri, të takoj, të komunikoj dhe të dekoroj të tjera personalitete të Mirditës, që me veprën dhe punën e tyre, i kanë bërë nder zonës së tyre, Kishës Katolike dhe besimtarëve të saj. Prandaj, në cilësinë e Presidentit të Republikës i falenderoj ata nga zemra për kontributin e tyre të vyer.

Zoti e bekoftë Mirditën dhe gjithë Shqipërinë!”

Aktiviteti vijoi me ceremoninë e dekorimit të tre personaliteteve të rëndësishme që kanë dhënë kontribut të çmuar për Rrëshenin, ku Presidenti Topi i dorëzoi përkatësisht: Imzot Kristoforo Palmierit, Urdhrin “Nënë Tereza”, me motivacionin: “Për kontributin e çmuar si misionar i fesë katolike në Dioqezën e Rrëshenit e më gjerë, veçanërisht me ndërtimin e një sërë kishave, si dhe me ndihmën e dhënë njerëzve në nevojë për strehim, arsimim dhe jetesë”; At Lino Nikolait, Urdhrin “Nënë Tereza”, me motivacionin: “Për kontributin e çmuar që ka dhënë si misionar i fesë katolike, në përhapjen e vlerave humane të paqes e dashurisë njerëzore dhe për ndihmën në ndërtimin e një sërë kishave në Dioqezën e Rrëshenit”, si dhe familjarëve të Preng Pjetër Filopatit (Pas vdekjes), Urdhrin “Naim Frashëri” i Artë, me motivacionin: “Mësuesit të nderuar që me përkushtim dhe sakrificë vuri gjithçka në shërbim të përhapjes dhe zhvillimit të arsimit në Mirditë e zonat përreth, duke e vlerësuar atë si një faktor themelor të vet progresit të vendit”.

Imzot Kristoforo Palmieri, duke i shprehur mirënjohjen e thellë Kryetarit të Shtetit për vlerësimin, theksoi se kjo vizitë, në këtë qendër rrethi, pikërisht në ditët që përkojnë me përvjetorin e themelimit të Dioqezës, konsiderohet si një dhuratë jashtë mëse e vlefshme. Gjithashtu janë shpehur mirnjohës për këtë akt të presidentit edhe atë Lino Nikolai dhe Bardhok Filopati, pasardhës i mësuesit Preng Filopati.

Aleksandër Ndoja

06. 12. 2011