Qendra Kulturore e fëmijëve të Rrëshenit, çmim të parë në festivalin mbarëkombëtar të Fush-Arrësit.

Qendra Kulturore e Fëmijëve Mirditë arrin suksesin e rradhës në festivalin e rradhës të kthyer tashmë në traditë prej shtatë vitesh në qytetin e Fush-Arrësit. Falë punës së palodhur të mjeshtrit të talentuar z. Kol Picaku, dhe koreografit të apasionuar Fran Gjergji, për të pestin  vit rradhazi  Qendra Kulturore e Fëmijëve Rrëshen kthehet me trofe nga ky eveniment. Për tu kthyer në retrospektivën e viteve, dy vite rradhazi është fituar çmimi i parë si grup, ndërsa vitin pasues Mirdita ka marrë cmimin trofe të evenimentit. Vitin e kaluar u fitua cmimi i parë individual, ndërsa në festivalin e këtij viti që u zhvillua në datat 21 – 23 maj, Mirdita u nderua me çmimin e parë, duke u cilësuar si grupi i madh Mirditës.

Festivali.

    Udhëheqësi artistik i këtij grupi z. Kol Picaku thotë se ishte parashikuar që grupi i Mirditës të konkuronte ditën e fundit të festivalit, pikërisht me datën 23 maj. Pikërisht në orët e para të kësja dite, grupi i Mirditës i përbërë nga instrumetistët, dhe grupi i valleve u nis me një autobus në drejtim të Fush-Arrësit. Me të mbërritur aty pamë që interesimi ishte shumë i madh. Qindra banorë të zonës por edhe të ftuar kishin mbushur sheshin kryesor përballë ish-Qendres Kulturore që prej vitesh është privatizuar dhe shërben si lokal. Konkurentë në këtë festival ishin rreth 15 grupe artistike nga Lushnja, Fieri, Tirana, Përmeti, Mirdita, Puka, Shkodra, Hasi, Dibra etj, ndërsa nga Kosova pjesmarrësit ishin nga Drenasi, Lipjani, Gjilani etj.

    I fundit nga konkuruesit është ngjitur grupi i Mirditës. Konkurimi ka nisur me pjesë të harmonizuara me motive këngësh “majë  krahu” të përpunuara nga Kol Picaku, kolazh melodishë të grupit të burrave të Mirditës, pjesë klasike në minuet nga Sebastian Bah. Ndërkohë që janë ngjitur në skenë valltarët virtuozë të Fran Gjergjit, të cilët kanë debutuar me mjaft sukses duke korrur duartrokitje të të pranishmëve. Madje shumë prej tyre e cilësuar debutimin nga “grupi i madh i Mirditës”. Pas këtyre Mirdita “dhuroi” një një kolazh këngësh përshendetëse nga Arben Kola, Ndue Kaçorri, Artiola Legisi, Romina Tuci e Daniela Kola. Një punë mjaft të mirë mbështetëse ka bërë edhe bateristi Ilir Simoni. Disa nga debutuesit ishin Ranier Biba në sharki, Everest Ndreca në daulle, Enri Doda dhe Ariel Koka në çifteli, Florian Kola në bilbil etj.

Juria dhe çmimet.

    Prej tre ditësh në Fush – Arrrës ka qënë efektive juria e këtij festivali e përbërë nga emra të mirnjohur të muzikës dhe artit shqiptar. Sabrie Nushi, kompozitore në RTSH, dikur mësuse në këtë qytet ka qënë kryetare e jurisë së këtij eventi. Po ashtu Francesk Radi këngëtar i mirnjohur, Kozma Dushi, Frrok Haxhia, dhe një muzikolog kosovar kanë qënë anëtarë të këtij komisioni. Ndërsa çmimi i parë për grupin e Mirditës është dorëzuar nga drejtuesi i QKF Fush-Arrës z. Mirash Mardodaj. Pas kësaj janë dëgjuar durtrokitje të shumta dhe grupi organizator ka adresuar përgëzime të shumta për grupin e Mirditës. Në fund udhëheqësi artistik z. Kol Picaku tha se një sukses i tillë vjen falë përkushtimit të stafit të QKF të Rrëshenit të cilët përgatiten gjatë gjithë vitit për këtë eveniment. Ai tha se menjëherë do të fillojmë të mendojmë dhe të punojmë për përfaqësimin tonë në aktivitete të tjera, ndërkohë që kërkohet përkushtim i madh në përcjelljen e stafetës në breza, pasi shumë prej instrumentistëve virtuozë janë larguar nga grupi për shkak të moshës.

A.    A. Ndoja