Mat, shkëlqejnë lirikat e ansamblit "Mirdita"

 MAT. Është zhvilluar më 9-10 tetor 2008 në qytetin e Burrelit Festivali Folklorik i Këngës Burimore Lirike, ku ka marrë pjesë dhe grupi i këngës lirike të ansamblit folklorik „Mirdita“.

  Nuk ka qenë aspak e rastësishme kjo pjesëmarrje, pasi Mirdita, shënohet ndër trevat e shquara për këngën lirike, madje për zonat e Veriut të vendit, ndër më të spikaturat. Në trajtën e lirikës qytetare me instrumentet tempera, kënga lirike e Mirditës ka lënë gjurmët e saj në të tërë festivalet folklorike prej dekadash ashtu si dhe në evenimente të tjera artistike kombëtare. Këngët lirike të këtij ansambli këndohen dhe nga këngëtarët më të njohur shiptarë si brenda vendit apo në Kosovë e gjetkë. Ndër të tjera duhen përmendur këngët e „trios lirike“, i konstruktuar nga kantautori Mark Gjoka nën shoqërimin e Anton Gjokës dhe Dod Prendit, me vargjet perlë të Gjokë Becit e Viktor Gjikolës, ku theksohen prurjet tejet interesante nga folku burimor lirik.

  Edhe pse ky festival lirik, i kërkuar prej vitesh nga artistët mirditorë për t’u zhvilluar në Mirditë, por që u realizua në Matin fqinj, tregoj se lirika mirditore është shumë e veçantë, shumë e spikatur, dhe tepër e këndshme.

Spektatori i sallës së tejmbushur të pallatit të kulturës në Burrel, ka ndjekur konkurimin e këngës lirike burimore të Dibrës, Bulqizës, Laçit, Lezhës, Mirditës dhe Matit. Ndonëse i zhvilluar për herë të parë, kësaj rradhe me karakter rajonal, ky festival e ka kryer misionin e tij për t’u kthyer që në vitin e rradhës në një takim kombëtar të Lirikës, gjë që e ka shprehur dhe organizatori i këtij eventi, drejtori i qendrës kombëtare të veprimtarive folklorike, Esat Ruka.

  Por më së pari, artistët dhe këngëtarët e tërë këtyre trevave, kanë performuar kostumet, vallet  dhe ritmet melodioze të tyre nëpër rrugët e qytetit të Burrelit dhe në sheshin kryesor, ku shquheshin ritmet e daulleve, cyrlja, ciftelia e bilbili etj. Kostumografia ishte e larmishme, që nga ato të Dibrës, xhubleta e Lezhës e rrobat vajzërore të Kurbinit, por dhe ato të Mirditës, ku binte në sy kostumi i nuses së Mirditës, performuar nga Bardha Ndrelala, apo kostumi ilir i vajzës performuar nga Ilia Jahja e të tjera.

Ora 18.00 e mbrëmjes ka rezervuar konkurimin në një sallë të ikandeshentuar, për të cilën ishte bërë kujdes që nga skenografia, ndricimi, pultet zanore e deri kujdesi për regjistrim nga një sërë kamerash të tv lokal të Matit e Lezhës si dhe TV publik shqiptar.

Fillimishit ka konkuruar ansambli i Lezhës, që ka sjellë lirikat tipike të zonës, ku është spikatur këngëtari Zef Beka, që është shpallur dhe këngëtari më i mirë i takimit. Me duartrokitje janë pritur vëllezërit Lleshi me humoristiket e tyre.

Më pas ka vijuar grupi i Kurbinit me lirikat karakteristike, grupi modest i Bulqizës dhe i Dibrës, dhe më pas ai i Mirditës.

Lirikat e Mirditës, fytyra e bukur e festivalit

  Ndonëse është punuar në prova vetëm për dy ditë prova për mundësi të kufizuara financiare, grupi i Mirditës ka qenë një befasi e këndshme për spektatorin matjan dhe të ftuarit e shumtë, pasi kanë qenë 8 numëra të një bërthame artistike të mrekullueshme. Programi është hapur me ritmet e dasmës mirditore e kënduar nga grupi i djemve dhe zëri melodioz i vajzave (Tone Gjoka, Prena Beleshi, Drane Ndrelala etj) shoqëruar nga orkestra me çifteli, sharki, llahutë, bilbil e lodër.

  Nikoll Preçi solli lirikën humoristike “Tash kam mbet me lujt derën“, që është shoqëruar me duartrokitje të vazhdueshme për fjalën e gdhendur dhe interpretimin virtuoz.

Më pas janë pritur me shumë endje këngët e kënduara nga Kastriot Kola, Anton Gjoka, Prena Beleshi, Bardhok Deda dhe veçmas nga lirikat e trios me Mark Gjokën, Kol Zefin dhe Mark Dedën, ndërsa me këngën “Si vendlindja jonë nuk ka”, me Mark Gjokën, Anton Gjokën dhe Kol Zefin”, që ishte një interpretim brilant, artistikisht e realizuar me mjeshtëri. Shoqërimi orkestral ka qenë i arrirë në instrumentet tempera realizuar nga artistët Fran Preci, si drejtues i orkestrës, Llesh Lleshi, një nga instrumentistët më virtuoz të gjithë takimit, Besim Lekgega, Ilir Simoni, Gjovalin Ndreca, etj.

  I gjithë grupi artistikisht u përgatit nga udhëheqësi artistik Mark Gjoka dhe shefi i muzkës i pallatit të kulturës Rrëshen Kol Zefi, të cilët në kohë fare të shkurtër arritën të kompaktësojnë gjithë grupin dhe të realizohet kësisoj në shkallë të lartë interpretimi i 8 numërave të programit të ansamblit.

Jo vetëm për këtë kontribut të rradhës, por të disa dekadave artistike, artisti Mark Gjoka, ka qenë njëri prej të lauruarve me medalje nga Qendra Kombëtare e Veprimtarive Folklorike Kombëtare.

  Gjithashtu janë lauruar me medalje nga Lezha Agim Velaj, nga Dibra Liri Rasha, Xhelal Cerpja dhe një familjar i familjes Hilmi Kolgjecaj dhe nga Burreli pjesëtarë të familjes Mynir Shehu, Sabri Aliur, Qamil Beshku e Hajrulla Ceni.

Një nderim i vecantë në këtë takim i është bërë artistit të zëshëm Ymer Neli, i cili prej katër dekadash ka përgatitur një nga orkestrat më virtuoze shqiptare me vegla orkestrale burimore, madje në respekt të punës së këtij mjeshtri të orkestrinës popullore matjane është organizuar dhe një sesion shkencor ndërsa njërës prej sallave të pallatit të kulturës Burrel i është dhënë emri i tij, sallë e kthyer dhe në pavion muze.

  Në këtë takim nga ana e bashkisë Rrëshen mori pjesë dhe kryebashkiaku Gjon Dedaj, drejtori i drejtorisë arsimore Mirditë Bardhok Filopati dhe udhëheqësi artistik i QFK Rrëshen Kol Picaku. Në mes të tjerash kryebashkiaku i Rrëshenit është ftuar nga organizatorët të dorëzojë dhe një nga medaljet për artistët e përmendur, duke e vlerësuar këtë takim si dhe gjithë artistët për prurjet interesante të folkut lirik burimor, duke i konceptuar dhe si ura bashkëpunimi në mes krahinash.

Për artistët dhe të ftuarit, u organizua dhe një darkë. Grupi i Mirditës është vlerësuar nga të pranishmit dhe ndonëse administratrivisht mori çmimin e dytë, për publikun matjan ishte më i konsoliduari dhe më i pëlqyeshmi. Për këtë duke marrë çmimin drejtori i ansamblit “Mirdita” Gjergj Marku e ka falenderuar objektivitetin e këtij publiku. Konfidencialisht vlerësimin maksimal e shprehu dhe zv/ministri i Kulturës e Turizmit Ekrem Spahia.

Ndërkaq me çmim të parë u vlerësua grupi i Matit dhe me çmim të tretë ai i Kurbinit. Me çmim special është vlerësua “trio e Mirditës” nën drejtimin e Mark Gjokës.

Ky program mendohet të jepet në javët e ardhshme edhe për publikun e Rrëshenit.

Pranvera Ndoj