Krijohet shoqata Kulturore “Mirdita” në Athinë.

Merr pjesë Kryetari i Bashkisë Rrëshen z. Gjon Dedaj

 Dhjetra emigrantë mirditas të cilët kanë zgjedhur të punojnë dhe të jetojnë në Greqi, janë mbledhur për të krijuar shoqatën e tyre e pagëzuar me emrin “Mirdita”. Pjesa më elitare e këtij komuniteti e ka parë të udhës që të organizjnë një eveniment të tillë, të bindur se përmes kësaj shoqate do të dalin më mirë në pah vlerat e një treve të njohur, por edhe ajo do jetë një mundësi më shumë për ti ardhur në ndihmë këtij komuniteti i cili është në numër të konsiderueshëm.Pikërisht pak ditë më parë në ambjentet e Lidhjes të Shoqatave të Emigrantëve Shqiptarë, është bërë edhe ligjërimi përfundimtar i kësaj shoqate në prani të dhjetëra mirditorëve të ardhur aty nga krahina të ndryshme të Greqisë.

Ndërsa një evenimet i tillë i rëndësishëm është vlerësuar edhe nga Kryetari i Bashkisë së Rrëshenit z. Gjon Dedaj i cili ka udhëtuar nga Rrësheni në Athinë për të qënë në mes bashkqyteraëve në këtë ditë të shënuar për ta. Z. Gjon Dedaj është shoqëruar në këtë udhëtim nga historiani i njohur dhe botues i Antologjisë së Mirditës z. Gjet Ndoj, si dhe njëri prej pjetarëve të komunitetit të emigrantëve z. Fran Prenga. Pjesmarrja e tyre u bë e mundur pas ftesës së mbërritur nga grupi nismëtar për krijimin e shoqatës “Mirdita” në Greqi.

Në sallën e zbukuruar me flamuj kombëtar dhe të mbushur me bashkëqytetarë fillimisht e ka marrë fjalën kryetari i sapo zgjedhur i kësaj shoqate z. Mark Laskaj, cili pasi ka përshëndetur dhe ka falenderuar të pranishmit, i ka njohur antarët dhe simpatizantët e shoqatës me programin e statutin e saj.Midis tjerash z. Laskaj ka thënë se “Është nder i madh që sot midis nesh ndodhet kryebashkiaku i qytetit të Rrëshenit, i cili iu përgjigj me shumë dashamirësi ftesës sonë, për të qenë i pranishëm. Është hera e parë që në Greqi merr pjesë një kryetar bashkie në krijimin e shoqatës së vendit të tij. Urimet më të mira në emër të gjithë shoqatës. E sigurojmë zotin Dedaj, se shoqata jonë do të punojë me përkushtim dhe devotshmëri, për promovimin dhe shpalosjen e kulturës dhe të traditave mjaft të mira e të vyera që ka pasur dhe ka Mirdita. Ju premtojmë zoti kryetar se do të japim kontributin tonë që Mirdita dhe qyteti ynë i dashur Rrësheni, të ecë përpara” ka përfunduar ndër kryetari Laskaj.

Pas kësaj pjesmarrës të shumtë gjatë diskutimeve të tyre kanë evidentuar faktin se krijimi i kësaj shoqate do të krijojë kushte më të mira për integrimin e emigrantëve në këtë shtet.

z. Gjon Dedaj duke e marrë fjalen në këtë takim duke falenderuar drejtuesit për ftesën, theksoi se “Është një prej ditëve më të veçanta të jetës time. Unë në fakt nuk ju nderoj, por nderoj veten time në përpjekje për të shlyer një borxh ndaj bashkisë së Rrëshenit dhe Mirditës në përgjithësi, ndaj jush dhe famljeve tuja atje, ku pa dëshirën e të cilëve unë nuk do të isha kryetar bashkie. Në këtë nderim ju përcjell juve që jeni sot këtu, atyre që për një arsye apo një tjetër nuk ndodhen këtu dhe familjeve tuaja, përshëndetjet më të përzemërta dhe urimet më të sinqerta që nga dita në ditë të jemi pjesa integrale e kësaj bote që ndryshon çdo ditë po sigurisht do të ndryshojë bashkë me Shqipërinë. Kam mendimin se ju nuk bëni asgjë tjetër veçse tregoni se vëllazëria ndër mirditorë funksionon në çdo kohë. Aftësia reaguese e mirditorëve funksionon në çdo kohë, virtytet e mirditorëve ia dalin për kundër çdo lloj stresi që mund të prodhojë koha, sepse ju jeni ata që keni krijuar një hapësirë në Mirditë dhe në Shqipëri, nga e cila ne kemi përfituar e ndoshta se kemi përdorur siç duhet”. Midis të tjerave zoti Dedaj i ka njohur bashkqytetarët e tij me arritjet dhe zhvillimet më të fundit në rrethin e Mirditës, si dhe të Shqipërisë në përgjithësi. ‘’Rruga e bashkimit me botën’’ e ka quajtur kryebashkiaku arterien Durrës – Kukës, që kalon nëpër Mirditë. Kjo është një borxh që u kthehet mirditorëve dhe Mirditës, midis shumë borxheve, që dalngadalë koha do ua kthejë. Ai i ka vlersuar emigrantët mirditorë, si një forcë reale në zhvillimet e ndryshimet ekonomike në vend. Duke i përgëzuar për nismën e marrë, ai nuk ka ngurruar që ta vejë theksin tek mësimi dhe ruajtja e gjuhes shqipe dhe veçanërisht për brezin e tretë që jo në pak raste vihet re një harresë për gjuhën e nënës. Kryebashkiaku u ka premtuar se do ta ndihmojë shoqatën me bazë materiale për hapjen e kursit të mësimit plotësues të gjuhës shqipe. Me tu kthyer në atdhe ai ka premtuar se do të interesohet për librat e Abetares, në mënyrë që t’ua sjellë falas fëmijëve të mirditorëve që ndodhen në Greqi. Zoti Dedaj, u ka premtuar bisnesmenëve emigrantë se do ti kenë rrugët e hapura dhe përkrahjen e tij pa rezerva, për të shkuar e për të investuar në vendin e tyre.

 Të pranishmit i ka përshëndetur edhe historiani Gjet Ndoj, i cili gjatë diskutimit të tij i është referuar më shumë historisë së shquar të popullit mirditor dhe të zonës së Mirditës në veçanti. Shoqatën ‘’Mirdita’’ e ka përshëndetur edhe kryetari i Lidhjes së Shoqatave të Emigrantëve Shqiptarë në Greqi, zoti Gjet Nikolli. Zoti Nikolli, gjatë përshëndetjes dhe urimi të tij, i ka premtuar shoqatës së porsa krijuar se që në momentin e tanishëm do të jenë pjesë e Lidhjes. Në përfundim kryesia e shoqatës e ka shpallur kryetarin e Bashkisë së Rrëshenit, zotin Gjon Dedaj, anëtar nderi. Pas takimit, kryebashkiaku ka vizituar disa biznesmenë emigrantë nga Mirdita, si në Megara dhe në vende të tjera të Atikës.

Marrë me përshtatje nga Gazeta “Tribuna”

Gazeta e vetme shqiptare që botohet ne Greqi.