Shoqata e Bashkive të Shqipërisë:

Trajnim për “Mardhëniet me Publikun”

  Si mund të funksionojnë më mirë zyrat e mardhënineve me publikun në bashkitë e ndryshme të vendit, sa dhe si mund të bëhen eficente shërbimet që mund t’u jepet qytetarëve përmes orientimit të saktë që këto “asete” institucionale u bëjnë atyre për zgjidhjen e problemeve të ndryshme në institucionin e bashkisë; si dhe shkëmbimi i eksperiencave në mes bashkive në këtë aspekt; gjithcka nga këto u trajtuan në një takim të përbashkët të organizuar nga ekspertë të Shoqatës së Bashkive të Shqipërisë në ambientet e saj ne Tirane.

Morën pjesë drejtues dhe punonjës të këtij sektori nga bashki të ndryshme të vendit, të cilët pos diskutimeve, debatave dhe shkëmbimit të eksperiencave gojore, paraqitën materiale të ndryshme që nga fletëpalosjet, guida, profile, gazeta e periodikë si dhe formularë aplikimesh si modele bashkërenduese në mes sektorëve, modalitetete që ua afrojnë zyrave apo departementeve të ndryshme në bashki.

Nga specalistët e mardhënieneve me publikun të bashkisë Patos, u sollën modelet e kësaj pune që ata i aplikojnë në bashki, përmes formularëve anketues. Ndër të tjera duhet përmendur eksperienca që u soll në mardhëniet që kjo bashki ka me subjektet e ndryshme për punësimin, duke hapur në miniaturë një “zyrë punësimi” po në bashki.

Kucova erdhi me një përvojë të pasur sa i përket mënyrës së menaxhimit të kësaj zyre, duke dhënë shembuj të mirëfunksionimit të saj, dhe lehtësimin që i bëhet punës të kreut të bashkisë përmes një orientimi të saktë rreth kërkesave që qytetarët paraqesin. Nga bashkia e Vorës është referuar për një përvojë pozitive të ndërtuar me sondazhet me publikun si dhe mënyrat e formulimit të fletë-hyrjeve dhe formularëve apo kordinimit me kryetarët e fshatrave, thuajse në përngjasje të organizimit territorial me bashkinë tonë. Përvoja u sollën deri në detaje të organizimit të pritjes së qytetarëve nga zyrat e ndryshme dhe titullarët e institucionit bashkiak, për të qenë sa më rentabile. Edhe Berati solli eksperienca pozitive që nga organizimi i kësaj zyre, duke dhënë modelin sesi kjo zyrë mund të ndërtohet. Berati solli dhe disa publikime interesante që nga gazeta “Transparenca”, fletëpalosje, celësi i qytetit, guida e kalendare, etj. Ashtu si dhe bashki të tjera u soll eksperienca e publikimeve transparenciale që nga fondet që jepen, investimet që kryhen, kush i fiton ato dhe cilët janë përfituesit, me stenda publike të vendosura në mes të qytetit.

Nga disa bashki si Lushnja e Vlora,etj, u soll eksperienca se si tërhiqej mendimi qytetar duke u paraprirë operacioneve konkrete, si psh, për pastrimin e qytetit, kur në fund të kontratës janë qytetarët që japin mendimin e tyre sesi është punuar, dhe sa ata janë të kënaqur nga puna e bërë. Kjo e kondicionon dhe lidhjen e mëtejshme të kontratës, duke specifikuar kërkesat në rritje të qytetarëve.

Specialistët e kësaj zyre të bashkisë Kucovë sollën eksperiencat e tyre interesante, duke filluar që me ndërtimin e këtyre zyrave, vendin që i jepet në tërë punën e bashkisë. Është kjo zyrë që ndryshe nga të tjerat e fillon punën në 7.30 të cdo dite, duke parapërgatitur terrenin për të mbarëfilluar punën nga sektorët e ndryshëm dhe vetë titullarët e bashkisë.

Kamza solli eksperienca në komunikimin me publikun si atë virtual dhe shkresor, ndër të cilat duhet përmendur buletini statistikor dhe gazeta e bashkisë e përmuajshme. Nga ana e bashkisë Rrëshen, u servir si eksperiencë që u mirëprit nga të pranishmit komunikimi virtual përmes faqes së bashkisë www.bashkiarresh.com, botimet e ndryshme që nga profili i bashkisë, plani strategjik apo botime të tjera, si dhe mënyrës anketuese që përdoret për shërbimin me duar të pastra ndaj qytetarëve. Madje sipas drejtuesve të këtij seminari, në të ardhmen në fillim të verës, kjo shoqatë do të organizojë një takim të tillë në bashkinë e Rrëshenit. Kjo praktikë do të ndiqet dhe për bashki të tjera e si takim i rradhës shkëmbyes eksperiencash do të jetë bashkia Vlorë. Nga ana e shoqatës u dhanë disa materiale informuese për punën e këtyre zyrave.

Në esencë të punës komunikuese duhet përmendur thënia e të famshmit president amerikan Abraham Linkoln:

“Ndjeshmëria e publikut

është gjithcka:

 me ndjeshmërinë e publikut asgjë nuk dështon;

pa të asgë  nuk ecën”

Përgatiti: Gj. Marku