Rreshen, shugurohet si misionar At Gjergj Ndreka dhe Kushte te perjetshme per Maria Madre del Alma. 

   “Në Shqipëri është vështirë por është bukur”, kështu janë shprehur ata meshtarë që këmba u ka shkelur në vendin tonë, disa vite me pare,dhe që u është dashur të përballojnë vite vuajtje e privacionesh në ndihmë të njerëzve për t’i larguar ata nga udha e humbur dhe për t’i sjellë në udhën e Zotit.

   Por një të riu në moshë dhe si shërbëtor i Zotit, Gjergj Ndreka, vendlindja i është blatuar në shpirt dhe ndërgjegje si dheu i të parëve për të shërbyer tërë përvuajtshmëri e devotshmëri.

   Ndaj të pranishmit e shumtë në këtë ditë shugurimi morën kënaqësi në meshën e mrekullueshme kur ky misionar i ri u shugurua në një ceremonial madhështor në katedralen me emrin simbol “Jezusi i vetmi shpëtimtar i botës”, dhe u përcoll nga qindra besimtarë të ardhur nga tërë krahinat e dioqezës Rrëshen, që shtrihet në zonat e Verilindjes së vendit me qendër në Rrëshen.

   Evenimenti në fjalë duhet përmendur për një fakt të rëndësishëm kur po shtohen rradhët e meshtarëve të rinj vendas, në një krahinë ku regjimi komunist ka bërë të pamundurën për ta shkulur “farën e fesë” dhe për ta shënuar Shqipërinë si vendin e  vetëm ateist në rruzull, ndërsa linçimi ishte tejet ekstrem ndaj klerit katolik ku Mirdita zinte një pjesë të rëndësishme të veprimtarisë së tij baritore dhe patriotike në Shqipëri. Jo shumë kohë më parë në po këtë kishë u shugurua dhe dom Ben Zymi nga Kosova por me origjinë nga Mirdita,që shërben në zonën e Oroshit dhe Fanit,ndërsa po shtohen rradhët e meshtarëve të rinj nga krahina.

   Shugurimi i sotshëm si misionar i At Gjergjit është përcjellur me shumë emocion dhe nga prindërit dhe shumë të afërm të tij, e ku morën pjesë të gjithë misionarët që kanë operuar në Mirditë pas viteve ’90.

  Mesha e shenjtë e shugurimit u drejtua nga ipeshkëvi i dioqezës së Rrëshenit At Cristoforo Palmieri, ndërsa ishte i pranishëm Ati provincial i vincensianëve nga Italia dhe eprorë të tjerë të familjeve vincensiane.

Më pas është vazhduar me ritualin ceremonial.

  Pas zotimeve të të zgjedhurit dhe përgjigjeve të thirrjes, at Gjergjit i është vendosur në qafë shënja dalluese e titullit dhe ka veshur rrobat e misionarit për të shërbyer kudo ka nevojë familja vincensiane në botë.

Duhet përmendur se ky shugurim përkoj dhe me 150 vjetorin e Shën Vincenso De Paulit, udhëheqësi shpirtëror i vincensianëve të sotëm në gjithë botën,ndërsa mesha e parë nga at Gjergji u mbajt në kishën e fshatit Adriatik të Kurbinit ku ai do të shërbejë.

Mesha e shenjtë e Kushteve të Përjetëshme të Maria Madre del Alma 

 Një ditë pas shugurimit si misionar vincensian të at Gjergjit, katedralja e Rrëshenit pati dhe një eveniment tjetër të shenjtë, Meshën e shenjtë të Kushteve të Përjetshme të Maria Madre del Alma,motër argjentinase që shërben prej disa kohësh në dioqezën e Rrëshenit në rradhët e “Shërbëtoreve të Zotit dhe të Virgjëres Matara”.

Mesha e shenjtë është prirë nga ipeshkvi i dioqezës monsinjor Cristoforo Palmieri përmes një ceremonie impresionuese. Pas hyrjes së meshës është mbajtur shërbesa e fjalës me lexim prej veprave të apostujve,psalmit, Ungjillit dhe më pas Ritmi i betimit të përjetshëm, ndermjetësimet, lutja e lituanive.

Emocionues ka qene momenti i betimit te përjetshëm të motër Alma, e cila para Zotit tone dhe gjithe shenjterve të tij,para Madre Maria Correndentora Rodriguez,eprorja provinciale e meshtare te tjere, kerkoj ndermjetesine e Zojes sone, te 12 apostujve dhe te shenjterve te tjere mbrojtes, lutjet e motrave te Institutit “Sherbëtorët e Zotit dhe të Virgjëres Matara”, dhe të vëllezërve në Fjalën e mishëruar.

“Dashuria dhe hiri i të Shenjtërueshmes Trini më ndihmofshin për të qene besnike në veprën që kam vazhduar....”

  Më pastaj ceremonia ka vijuar me bekimin solemn të betueses së re si dhe dhënia e simboleve të betimit,sherbesa eukaristike,ritet e kungimit per tu mbyllur me ritet e perfundimit.

Në këto ceremoniale të shënuara mori pjesë dhe kryetari i bashkisë Rrëshen Gjon Dedaj dhe autoritete të tjera vendore nga komunat etj. 

Gj.Marku