Solidaritet dhe ndihmë për viktimat e termetit në Aquila.

Fjala e plote me kete rast e kryetarit te Bashkise z. Gjon Dedaj

  Celebrimi i Pashkëve nga komuniteti dioqezan në Rëshen, ka patur një moment të vecantë kësaj rradhe, pasi pos kremtimit të ceremonive që nga Katedralja dhe në mjediset e tjera publike, një kortezh i madh qytetarësh ka manifestuar solidaritet unikal në Shqipëri , në nderim te viktimave të rëna në tërmetin shkatërrues në Aquila të Italisë.  Me inicimin e Dioqezës Rrëshen dhe mbështetjen e Bashkisë Rrëshen dhe Rubik si dhe të komunave të rrethit Mirditë, ky kortezh zie ka nisur ecjen nga Katedralja e Rrëshenit në drejtim të sheshit kryesor të qytetit.

Merrnin pjesë qindra qytetarë të Rrëshenit, autoritetet lokale vendore dhe drejtues të arsimit, deputeti i zonës, nënprefekti dhe shumë intelektualë të tjerë. Pas një minute heshtjeje në dhimbje për qindra të rënët, vëllezër italianë por edhe mes tyre 6 shqiptarë, e ka marrë fjalën ipeshkvi Mons. Cristoforo Palmieri, duke ftuar të gjithë qytetarët mirditorë të vuajnë bashkë me vëllezërit italianë dhe t’u jenë pranë edhe me lutje por edhe me ndonjë kontribut të tyre si “dhuratë pashkësh”, ashtu siç edhe vetë Shqipëria kishte qenë e ndihmuar në momentet e daljes nga diktatura komuniste, nga këta vëllezër.

Monsinjor Palmieri ka bërë të ditur se një letër do t’i dërgohet arqipeshkëv të Aquilas, Mons. Giuseppe Molinari, nëpërmjet Nuncit Apostolik, atë ndihmë që do të mblidhet si shenjë e solidaritetit tonë.

 Fjala e ipeshkevit monsinjor Cristoforo Palmieri

  Të dashur!

Si persona civilë dhe solidarë, apo si të krishterë të mirë, kemi menduar mirë të mblidhemi këtu sonte në këtë shesh që na sheh të jetojmë momentet më të rëndësishme të jetës tonë qytetare dhe si të krishterë, për një dëshmi publike solidariteti ndaj atyre shumë vëllezërve dhe motrave, të vegjël e të mëdhenj, të vendeve të prekura nga tërmeti dhe që mjetet e komunikimit shoqërorë, na kanë sjellë jo vetëm nëpër shtëpi, por në zemrat tona, duke transmetuar, tashmë nga gati një javë, gjithçka po vuajnë dhe gjithçka po bëhet për ta, përveçse duke vuajtur për të gjithë ata që kanë vdekur, viktima të forcës së natyrës që njeriu, për aq sa mund të pretendojë të njohë dhe nga ajo të mbrohet, në realitet nuk është akoma i aftë të parashikojë  dhe akoma më pak ta dominojë.

  Të gjithë: të vetëm dhe në grupe, qytetarë të thjeshtë dhe autoritete kompetente, persona të specializuar, mjekë dhe vullnetarë, zjarrfikës, ushtria, deri edhe qen, në qëllimin e ushtruar, janë në veprim për të lehtësuar dhimbjen e të mbijetuarëve, por të privuar tashmë nga gjithçka, përveçse shumë prej tyre, të privuar edhe prej të afërmëve të tyre të dashur: më shumë se 270 persona kanë vdekur nën rrënojat dhe për të cilët sot në mëngjes është celebruar funerali i tyre i krishterë.

  Dhe ne, që nga vetë këta vëllezër italianë, sikur nga shumë të tjerë akoma, kemi qenë në të kaluarën e afërt, të ndihmuar të dilnim përfundimisht nga vuajtjet e diktaturës komuniste, ne që mes këtyre vëllezërve e dijmë që jetojnë jo pak shqiptarë, për fat të mirë të shpëtuar nga shkatërrimi; në fakt vetëm 5 ose 6 të etnisë shqiptare kanë vdekur, nuk mund të mos bënim diçka siç po e bëjmë: me këtë kortezh dhe bashkimi, me këtë reflektim, me solidaritetin tonë afektiv, me një lutje tonën, ndoshta edhe, siç po ju sugjeroj, me një kontribut tonin në parà.

  Përveçse për detyrë, për sensin e solidaritetit vëllazëror, shumë kryetarë shtetesh po e bëjnë, pavarësisht krizës ekonomike që të gjithëve u bën më të vështirë jetën e çdo dite, më të mirën e tyre për të kontribuar në rifillimin e një jete normale dhe në rindërtimin e banesave civile, shkollore, shëndetësore, publike dhe monumenteve historike të këtyre vendeve të shkatërruara nga tërmeti ... edhe kryeministri ynë zoti Sali Berisha ka kontribuar, siç e dimë të gjithë, me një ndihmë prej 50.000 euro-sh.

  Ja pra përvuajtërisht ju propozoj: përpara se të shpërndahemi, do të doja të ishim shembull apo stimul për ata që nuk e kanë bërë: me një kontribut ekonomik, të vogël apo të madh që të jetë, që të bëhemi akoma më shumë solidarë me ata që janë në nevojë për gjithçka.

  Pasi të kemi dëgjuar zotin kryetar të Bashkisë, që edhe ai ndjen nevojën të na thotë një fjalë të tij zyrtare, secili prej jush, me zemrën në njërën dorë dhe me një ofertë në tjetrën, të mund të afrohet tek kryqi që kemi përballë, enkas pa të Kryqëzuarin, që secili që do të afrohet të mund të shohë mbi të, të gozhduar, çdo vëlla të vdekur nga tërmeti dhe, sikur ti shtërngonim dorën, ti ofrojë një dhuratë të tij të vogël apo të madhe që mundemi ta quajmë mjaft mirë “dhuratë pashkësh”. Pashkë në fakt nuk është vetëm të premten e shenjtë, por edhe e shtuna e shenjtë: vdekja dhe ringjallja.

  Unë vetë, të shoqëruar nga një letër e firmosur nga unë dhe zoti kryetar i Bashkisë, si përfaqësuesit tuaj si njerëz civilë dhe besimtarë, letër që do ta bëjmë publike, do ti dërgoj vëllait tonë arqipeshkëv të Aquilas, Mons. Giuseppe Molinari, nëpërmjet Nuncit Apostolik, atë ndihmë që do të mblidhet si shenjë e solidaritetit tonë. Bashkia Rrëshen ... Dioqeza Rrëshen ... veçanërisht secili nga ju qytetarë dhe të krishterë. Ndonjë që rastësisht nuk mund të ofrojë asgjë sonte, për mungesë informacioni, është e qartë që mund të bashkohet me ne, duke e sjellë tek unë ose tek zoti kryetar deri të dielën, që është tamam e diela e ringjalljes dhe e jetës. Faleminderit.

 Më pas kryetari i bashkisë Rrëshen, Gjon Dedaj, në fjalën e tij ka ftuar zotin ambasador të Italisë t’u dërgojë në emër të të gjithëve, ngushëllimet vëllazërore familjeve dhe të afërmëve të të vdekurve duke u dedikuar edhe një kontribut simbolik në para për shkatërrimet e ndodhura, duke ju bashkëngjitur kështu ofertave të qytetarëve dhe të Dioqezës.

Fjala e plotë e Kryetarit të Bashkisë z. Gjon Dedaj:

 Pas kësaj qytetarët i janë afruar kryqit duke nderuar në të çdo vëlla të vdekur në këtë masakër natyrore si dhe duke ofruar ndihmën e tyre për këtë zonë të shkatërruar.

Gj. Marku

Celebrimet meshtare të ditëve të Pashkës

E enjte – e premte – e shtunë e shenjtë

  Është celebruar në thellësinë e fesë, darka e fundit në Katedralen e Rrëshenit, e udhëhequr nga ipeshkvi i Dioqezës Rrëshen, Mons Cristoforo Palmieri, duke filluar kështu katërditëshin e shenjtë të javës së madhe për besimtarët katolikë.

Kisha Katedrale e tejmbushur me besimtarë përveç atmosferës së veçantë të krijuar në ambjentin e saj, dhe fjalëve të ipeshkvit ku ka ftuar të rinjtë e të rejat të jenë pjesë e kësaj dhurate që Hyji ka lënë për mbarë botën, jo vetëm me rrëfimin dhe kungimin, por me ndryshimin e jetës duke jetuar si bij të Hyjit kudo jeta na thërret dhe në çfarëdo lloji misioni gjendemi të kryejmë, ka theksuar Palmieri, ka përjetuar edhe ritin e larjes së këmbëve, në shëmbëlltyrë të asaj që vetë Jezusi Mesi bëri me dymbëdhjetë nxënësit e tij apostuj, duke ju dhënë kështu shembullin më të afërt, më të gjallë, atë të shërbëtorit ndaj gjithë njerëzimit.

Edhe vetë Palmieri në fakt, duke ngjallur emocion të veçantë në asamblenë e besimtarëve, është përulur, duke larë këmbët e dymbëdhjetë burrave të ardhur nga grupe të ndryshme fetare, si ai i neokatekumenaleve dhe grupi i familjes së krishterë dioqezane, dhe duke përsëritur kështu këtë shembull që të gjithë besimtarët janë të thirrur ta bëjnë ndaj çdo personi tjetër, çdo vëllai tjetër, në vuajtje apo jo, në dashuri reciproke.

Celebrimet e Pashkëve kanë vazhduar ditën e premte me udhën e kryqit në Katedrale dhe adhurimin e Krishtit të vdekur mbi durin e mundimeve, ndërsa ditën e shtunë, në një ceremoni me shumë pjesëmarrje, fetare dhe familjare është kryer nga vetë Mons Palmieri, riti i bekimit të ushqimit të drekës së Pashkëve, jo vetëm si shenjë bekimi për këdo që ushqehet nga buka e përditshme, por edhe në shenjë falenderimi ndaj Hyjit si dhe lutje për të gjithë të varfërit që të mos u mungojë kurrë nëpër familjet e tyre.

Përgatiti: L. Gjergji