Sporti mirditor të dalë nga plogështia.

 -Takim publik-

Në mjediset e kinemasë së qytetit, e hapur rishtas pas 7 vite heshtjeje, takimi i parë në formë auditoriumi, i është rezervuar sportit. Ka qenë departamenti i kulturës, rinisë dhe sporteve në bashkinë e Rrëshenit, që ka ftuar dashamirës dhe kontribues të sportit, për të kërkuar mbështetjen si për ringritjen e ekipit të fubollit “Minatori” dhe qëndrueshmërinë e ekipit të volejbollit për femra, të rritura dhe ekipet zinxhir.

Platformën e këtij aktiviteti që nis dhe vitin kalendarik sportive, e ka shpallur shefi i këtij departamenti në bashkinë Rrëshen, Alfred Shtinja, i cili ka theksuar dhe strategjinë që do të ndiqet në zhvillimin e këtij sektori, duke qenë i hapur në kërkesat ndaj bisnesit dhe faktorëve të tjerë për ta mbështetur sportin. Ai i ka mëshuar faktit se para publikut dhe bisnesit është paraqitur dhe një nisëm e një grupi nismëtar për ringritjen e ekipit të futbollit, të rritur, e kryesisht rreth kësaj cështje dhe është folur e debatuar.

Më pas sekretari i klubit sportiv Mark Kola ka bërë prezent eksperiencat që ka ky klub, ekipet që funksionojnë, nevojën për të mbështetur volejbollin sidomos dhe ekipet zingjir duke paraqitur problemet e theksuara financiare dhe pamundësinë për të patur dhe ekip futbolli të rritur.

Ndërsa Agron Gjoka, si nismëtar i ringritjes së ekipit të futbollit, ka theksuar se gjithçka deri më tash e kam bërë me vullnetin tim dhe të djemve të afruar pa asnjë lloj ndihme, ndërsa kam dërguar një projekt në bashki për ringritjen e ekipit të Minatorit në futboll për të rritur, duke theksuar se dështimi në këtë rast nuk do të ishte personal, por i tërë atyre që kanë mundësi të ndihmojnë dhe institucionalizojnë një ekip të tillë.

Pas këtyre ekspozeve ka patur diskutime të lira nga ish-sportistë, trajnerë dhe aktorë të tjerë që e kanë pasion sportin. Mes tyre kanë folur e dhënë idetë e tyre në fushën e sportit, Ndue Gega, ish futbollist, Ndue Ruçi, ish futbollist dhe trajner, Ndok Mrruku, shef i departamentit të shërbimeve e të tjerë.

Ndërkohë që debati ndahej në dy kampe, një pjesë që e kërkojnë me ngulm ringritjen e ekipit të futbollit, dhe kampi tjetër, kategorik për jo, duke u mbështetur në pamundësinë për ta bërë këtë gjë, duke theksuar sidomos mungesat financiare dhe drejtuesve të kualifikuar. Sa i përket kësaj të fundit, janë vënë në dukje mosimpenjimi i mësuesve të edukimit fizik në shkolla për të përzgjedhur elementë dhe edukuar breza sportistësh.

Ra në sy fjala e Ded Dedaj e Bardhok Dedaj, drejtues vullnetarë të ekipeve zingjirë, thuajse privatë, të 17 vjeçarëve e më poshtë, të cilët kanë patur rezultate pozitive në ballafaqimet jashtë Mirditës.

Nga sa shihej në debatet dhe diskutimet, duket se sportin e ka mbuluar një plogështi e pajustifikuar dhe se duhet një ndërhyrje radikale si nga departamenti përkatës dhe bashkia, për ta kthyer në eficencë duke mirëpërdorur çdo burim të ardhurash, donatimesh dhe harxhimesh, dhe njëkohësisht angazhimin në funksione të përbashkëta dhe të njësive të tjera vendore e kryesisht bashkisë së Rubikut për të ringritur e mbajtur ekipe cilësore që u shërbejnë qytetarëve dhe sidomos rinisë, duke shmangur tendencat aspak të këndshme të vënies në funksion të fushatave politike, duke abuzuar me ringritjen si ekipe të tilla politike!

Në fund kryebashkiaku Gjon Dedaj theksoj se në filozofinë e tij drejtuese sporti dhe kultura janë në qendër të vëmendjes për t’i afruar komunitetit argëtim dhe çlodhje. Ndërsa bashkia dhe taksapaguesit paguajnë shuma të konsiderueshme për të mbajtur këta sektorë, mes të cilëve dhe atë të sportit, si për institucionet sportive dhe punonjësit jo të paktë atje që duhet të justifikojnë aktivitetin me llojshmërinë e sporteve, por  dhe cilësinë sportive.