Kryetarja e Parlamentit znj. Jozefina Topalli, takohet në ambientet e Bashkisë Rrëshen, me drejtuesit lokalë të Mirditës.

  Përkujtimi i ditës kur 17 vite më parë mirditasit krijuan degën e të të parës parti opzitare, ka sjellë në Mirditë Kryetaren e Parlamentit Shqiptar znj. Jozefina Topalli. Në hyrje të bashkisë Rrëshen ajo është pritur nga kryetari i bashkisë z. Gjon Dedaj, ndërsa ajo shoqërohej nga deputeti i zonës z. Gjovalin Prenga njëherit edhe kryetar i degës së PD-së Mirditë, dhe nga n/kryetarja e kësaj dege, znj. Albina Deda. Pika e parë e  agjendës së Topallit në Mirditë  ka qënë një takim në sallën e mbledhjeve të bashkisë, me të gjithë drejtuesit e emëruar dhe ato të zgjedhur në Mirditë.

  Në fillim të këtij takimi, deputeti i zonës z. Gjovalin Prenga  ka bërë një pasqyrë të situatës social-ekonomike në Mirditë. Duke folur fillimisht për arritjet gjatë këtyre dy viteve, z. Prenga vuri në dukje se se më mirë paraqitet sektori i elektrikut, pasi niveli i arkëtimeve është mbi 90 përqint, ndërsa humbjet teknike janë në nivele të pa përfillshme. Edhe sektori i tatimpaguesve të mëdhenj është në nivelet më të mira me mbi 100 përqint të realizimit të planit. Po ashtu ka arritje në sektorë të tjerë si në arsim dhe shëndetësi. Më tej z. Prenga ka ngritur si shqetësim uljen drastike të numrit të policëve për frymë të popullsisë. Sipas deputetit Prenga, në shkallë vëndi mesatarja është një polic për 3500 banorë, ndërkohë në Mirditë për 38 mijë banorë janë në dispozicion vetëm 50 policë. Madje si pasojë e shkurtimeve drastike në këtë sektor është bërë mbyllja e postës policore të Rubikut. Nga ana e saj kryeparlamentarja Topalli, ka reaguar e habitur në lidhje me këtë fakt dhe ka premtuar se do të komunikonte me ministrinë e rendit.

  Ndërsa kryetari i bashkisë së Rubikut z. Mark Ruçi, pasi e ka falenderuar kryetaren Topalli për vizitën dhe për mbështetjen që i ka dhënë Mirditës, i kërkoi asaj që të ndikojë që në të ardhmen të krijohet një bashkëpunim më i mirë mes shoqatës së bashkive dhe ministrive të linjës, kur është fjala për hartimin e projektligjeve që kanë të bëjnë me pushtetin vendor dhe decentralizimin e tij. Me tej z. Ruçi ka kritikuar ministritë të cilat nuk bashkëpunojnë aspak me bashkitë, madje ata nuk denjojnë që ti kthejnë përgjigje shkresave dhe letrave për probleme të ndryshme që bëhen nga pushteti vendor. Madje sipas kryebashkiakut të Rubikut, nuk është e vërtetë që se nuk ka projekte por që fatkeqësisht nga ministritë ose janë anashkaluar ose injoruar. Sipas tij nuk duhet që për shkak të ndërtimit të rrugës Durrës-Kukës, pushteti vendorë të privohet nga ivestimet e tjera që janë të domosdoshme dhe jetike për banorët. Në përgjigje të problemeve të ngrituara nga kryebashkiaku Ruçi, znj. Topalli e ka falenderuar për ngritjen e këtyre problemeve, madje është treguar mjaft e gatshme që shumë prej tyre të realizohen menjëherë. Ndërsa kreu i qarkut të Lezhës, z. Bardh Rica ka kritikuar faktin që Mirdita është zbrazur nga të gjitha institucionet duke i zhvendosuar ato në Lezhë apo Laç.

  Në fjalën e tij Ipeshkëvi i dioqezës së Rrëshenit Kristoforo Palmieri kërkoi që të ndërhyhet pranë Ministrisë së Financave për ta përjashtuar nga taksat dhe tatimet për një shtesë në shkollën profesionale e cila funksionon prej disa vitesh, dhe kur është ndërtuar ajo është përjashtuar nga zhdoganimi për çdo objekt të ardhur nga Italia. Madje Ipeshkëvi nuk ka hezituar t’i kërkojë Topallit që qeveria të ndërhyjë në rrugët e Mirditës, pasi shumica e tyre janë në gjëndje të rënduar.

  Nga ana e saj kryetarja e Parlamentit Jozefina Topalli i ka nxituar të gjithë që të ngrejnë problemet e tyre, duke velerësuar se dera e saj ka për të qënë e hapur për të gjithë të zgjedhurit pa dallim ngjyrimesh politike. Duke folur për reformën që po realizohet nga qeveria, ajo tha se kur erdhëm ne në pushtet gjithshka notonte në informalitet. Ne na u dasht në fillim të thanim “kënetën” e informalitetit, e më pas të vendosim shinat e një ekonomie të qëndrueshme. Ajo tha se reformat gjithnjë e kanë një kosto, por që shpejt do të shikohen edhe efektet e saj. Në fjalën e saj, znj. Topalli foli për ivestimin gjigand siç është autostrada Durrës-Kukës, e cila kalon nëpër Mirditë. Në fund ajo ka premtuar se me të shkuar në Tiranë, do tu japë zgjidhje shumë prej problemeve të ngrituara duke vequar atë që ka të bëjë me rendin në Rubik, për ujsjellësin e Barxhanës, por edhe për problemet e ngrituara nga kreu i bashkisë së Rubikut. Më tej është zhvilluar një ceremoni festive me rastin e përvjetorit të 17-të të krijimit të degës së PD-së në Mirditë.

A. N