Tre të drejta studimi falas për maturantët e Rrëshenit

 Universiteti Europian i Tiranës ka akorduar sot tre të drejta studimi falas për nxënësit më të mirë maturantë të gjimnazit të Rrëshenit, duke sjellë një përvojë të re bashkëpunimi por dhe një nga financimet më interesante dhe të frytshme në fushën e dijes. Janë tre të drejta studimi që i drejtohen fakultetit të drejtësisë, atij të ekonomisë dhe të shkencave sociale.

Kjo u bë e mundur në saj të interlekutimit të Ndrecë Dedajt me këtë universitet si një financim që vetëm në vlerë lekësh në krye të viteve përfundimtare konvertohet në 8 milion lekë të reja, pa përmendur impaktet e tjera. Por më me rëndësi mbetet fakti i financimeve të tilla, në atë që sipas Nik Nikollit drejtor i shkollës, përbën kontribut në “industrinë” e dijes.

Në takimin e zhvilluar me këtë rast në Rrëshen, drejtuesit e këtij universiteti kanë gjetur pritjen e ngrohtë të maturantëve të Rrëshenit, të cilët edhe pak ditë do të ulen në tavolinat e provimeve të maturës. Po ashtu kanë marrë pjesë në takimin e organizuar me këtë rast në sallën e pallatit të kulturës në Rrëshen, dhe autoritetet vendore e të tjerë.

Rektori i këtij universiteti profesor i asocuar, dr Adrian Civici, është shprehur se kjo është një nga eksperiencat e para për ta shtrirë ndihmën dhe në zona të tilla që quhen “të vogla” e të thella dhe jo vetëm ku janë metropolet, për faktin se këto zona kanë më shumë se askund nevojë për njerëz të shkolluar. Ai ka sqaruar mbi mënyrën sesi funksionon ky universitet jopublik, duke u ndalur në pesë benifice shumë të rëndësihme që ofrohen në këtë institucion shkollimi që nga filozofia dhe misioni, këshillimi akademik & karrierë e tutoriat, kërkimi shkencor dhe botimet, mësimi interaktiv & aktivitetet e shërbimet si dhe komuniteti social & kulturor.

Edhe pedagogu i këtij universiteti analisti i njohur Henri Çili, duke bërë ekspozenë e punës që bëhet në këtë universitet jopublik, është shprehur se ia vlen shtrirja edhe në zona të tilla, duke paraqitur para maturantëve alternativa të shkollimit serioz në të lartën.

Takimin e ka përshëndetur dhe drejtori i zyrës arsimore Bardhok Filopati, i cili përpos shkollimit publik, ka përgëzuar inisiativa të tilla, por duke bërë dhe sqarime të duhura për maturantët në përzgjedhjet e degëve ku ata duan të studiojnë, për tu treguar më të kujdesshëm se vitet e  tjera.  Ka përshendetur dhe mësuesi Ndue Gega, duke i përgëzuar tërë faktorët që e bënë të mundur këtë ndihmë.

Kryebashkiaku i Rrëshenit Gjon Dedaj, duke iu referuar investimeve të tilla, deduktoi faktin se mbi të gjitha është dija, dhe ne kemi nevojë për njerëz të ditur, ndaj dhe të tilla inisiativa qoftë private apo institucionesh të ndryshme publike apo jo publike janë të pritura në rajonin tonë të etur për progres, progres i cili më së pari fillon nga klasat dhe auditorët e shkollimit.

Më pas nga paneli ështe komunikuar me vetë nxënësit maturantë të interesuar për këtë universitet a të tjerë, ndërsa është bërë i ditur vendimi i nxjerrë nga stafi i universitetit europian të Tiranës për të akorduar tre të drejta studimi falas për maturantët e Rrëshenit sipas një përzgjedhje meritative. 28. 05. 2008