Një unazë e re për qytetin e Rrëshenit.

 Prej disa ditësh ka nisur puna intensive për ndërtimin e një unaze me fillim në cepin e urës së qytetit, dhe me përfundim në afërsi të spitalit të Rrëshenit. E gjithë rruga e re do të jetë përgjatë bregut të lumit të Zmesë, aty ku kohë më parë kanë qënë kopshtet e shumë prej qytetarëve. Me këtë synohet që e gjitha lagjia që fillon tek Katedralja dhe përfundon në afërsi të spitalit, të marrë një frymarrje të re, përsa i përket komunikimit. Traseja është mjaft e gjerë dhe pas përfundimit të saj do të përfitohet një lëvizje më komode e mjeteve, por edhe një frymarrje më e madhe për të gjithë qytetin. Ndër të tjera ky segment rrugor, do të bëjë të mundur komunikimin mes tregut industrial dhe atij ushqimor, i ndërtuar i ri pas ish-shtëpisë së ushtarakëve, por i pa vënë në punë deri tani. Ajo që është më e rëndësishme, pas përfundimit kësaj rruge është se do të disiplinohet edhe rrjedha e lumit të Zmesë, por edhe do të përfitohen ambiente të kulturuara me lulishte dhe gjelbërim në një vënd që deri pak kohë më parë, ka qënë i mbushur me ferra dhe plehra.

Në ndihmë të këtij ivestimi të rëndësishëm të nisur nga Bashkia Rrëshen, ka mbërritur në bregun e lumit të Zmesë një ekskovator i tonazhit të rëndë, i cili është në pronësi të Bordit të Kullimit të qarkut Lezhë.

Z. Gjon Dedaj, Kryetar i Bashkisë Rrëshen, thotë se ndihma e pa kufishme e drejtuesit të kësaj ndërmarrje z. Luigj Frangaj, meriton falenderimet më të mëdha. Kjo sepse kjo ndërmarrje ka bërë një punë të konsiderueshme edhe në fshatin Ndërfushaz, ku ka pastruar të gjitha kanalet e kullimit, të cilat nuk janë vënë në përdorim prej 18 vitesh.

Puna e Departamentit të Shërbimeve në këtë segment rrugor, është drejtuar nga drejtori i këtij departamenti z. Nok Mrruku, dhe specialisti i shërbimeve z. Gjon Ndoka. Po ashtu ivestimi është mbështetur nga Policia Bashkiake, e cila ditë më parë ka nisur nga puna për lirimin e trasesë nga kopshtet e pa ligjshme të qytetarëve fermerë.

Ndërsa njëri prej ekskovatoristëve, z. Tom Mirashi, thotë se sëbashku me kolegun tim Agim Haxholli, kemi pesë ditë që po punojmë në këtë segment rrugor. Shpresojmë se puna do të përfundojë në kohë record. Por më parë kemi punuar në Ndërfushaz e Ndërfanë, ku kemi bërë sistemimin e të gjithë rrjetit kullues. Kemi lëvizur nga kanalet 16. 800 m3 dhera që kishin zënë rrjedhën e kanalit. Kemi shkulur mbi 370 rrënjë pemë mbi 40 cm të gjera, që kishin mbirë nga mos pastrimi tyre prej më shumë se 18 vitesh. Sipas ekskovatoristit Mirashi, tashmë fshati Ndërfushas ka përfituar një kullim të sigurtë nga ujrat e pa nevojshme, por fare lehtë ato kanale që tashme janë të pastruara mund të shfrytëzohen edhe për vaditje. 29. 07. 08

A. Ndoja