Zhvillon punimet mbledhja e Këshillit Bashkiak

-Miratohen tre projekt-vendime të paraqitura administrata e Bashkise-

Është zhvilluar mbledhja e rradhës e Këshillit Bashkiak të Rrëshenit nën drejtimin e z. Ded Gjoka në cilësinë e Kryetarit të këtij Këshilli. Kjo ishte mbledhja e parë e dalë nga konstituimi i datës 18 korrik, dhe ne axhendën e kësaj mbledhje ishin lajmeruar tre projekt vendime.

I pari kishte të bënte me miratimin e listës së ndihmës ekonomike, ndërsa dy të tjerët bënin fjalë për disa ndryshime në buxhetin e këtij viti, si dhe ngritjen e komisioneve të përhershme të këshillit.

Në fillim z. Ded Gjoka tha se janë sjellë për miratim ndryshimet në lista, pasi lista e plotë është e njohur dhe kërkon kosto të lartë në printime.

Këshilltari Ndrec Biba kërkoi që listat e plota tu nisen në mënyrë elektronike te cdo anëtar këshilli, propozim i cili u mirprit nga sekretari i këshillit dhe zyra e ndihmës ekonomike. Këshilltarët Gjovalin Valca dhe Gjon Marku kërkuan me insistim që të njihen me listat e plota, sidomos në mbledhjet vijuese. Ndërsa z. Pjetër Pjetri tha se ne jemi të njohur me listat të cilat nuk ndryshojnë në masë të konsiderueshme, por në këtë këshill janë shtatë anëtarë të ardhur rishtazi, dhe duhen të njihen me listat e plota.

Në fund lista e përfituesve të ndihmës ekonomike është miratuar me shumicë votash.

Në pikën e dytë ka qënë shefi i ekonomisë në bashki z. Alfred Përgjoni i cili ka sqaruar këshilltarët se ndryshimet në buxhet janë të detyrueshme, pas një vendimi detyrues të Këshillit të Ministrave për uljen e shpenzimeve në masën 3 përqint. Këshilltarët Lindita Çupi dhe Ndrec Biba kanë kërkuar të detajohet qartë se në cilin zë janë parashikuar të ulen shpenzimet. Në përgjigje të interesimit përkatës z. Përgjoni tha se ka një vendim tjetër të Këshillit të Ministrave sipas të cilit ato investime që nuk janë tenderuar deri më datën 1 gusht do të anullohen. Në këtë kuadër z. Përgjoni tha se ne kemi zgjedhur të suprimojmë fazën e katër të investimeve në rrugën te ish pallatet e fermës. Ky ivestim përputhet me masën 2 milion lekë, sa kërkohet të zbritet nga buxheti.

Duke qënë se vendimi ishte detyrues, për këtë pikë nuk ka pasur shumë debat, ndaj është miratuar me shumicë votash.

Më tej ka vijuar mbledhja me miratimin e shtatë komisioneve të përhershme të këshillit, shumica e të cilëve janë kompozuar me kompromis mes dy grupimeve politike dhe në përputhje me profesionet që kanë anëtarët e këshillit.

a.n 17 gusht 2011